Read Hmong Njua Exekees 21 Bible Online

Exekees 21 - Hmong Njua bible

Exekees 21

¹Tug TSWV has rua kuv tas,

²“Tub noobneej, koj ca le cev kuv tej lug tshev lub nroog Yeluxalees hab foom phem rua tej chaw kws tuabneeg pe mlom. Koj has rua cov Yixalayees lub tebchaws tas,

³kuv yog tug TSWV kws kaav ib puas tsaav yaam, kuv has le nuav: kuv yog mej tug yeebncuab! Kuv yuav rhu kuv raab ntaaj tua mej txhua tug, tsi has tug ua zoo lossis tug ua phem.

⁴Kuv yuav siv kuv nraab ntaaj tawmtsaam txhua tug, pib saab qaumteb moog ti nkaus saab qaabteb.

⁵Txhua tug yuav paub has tas kuv yog tug TSWV. Kuv rhu kuv raab ntaaj lawm, mas kuv yuav tsi muab ntsaws rua huv naab hlo le.

⁶“Tub Noobneej, koj ca le quaj le tug tuabneeg kws taag kev ca sab lawm. Koj quaj le ntawd taabmeeg suavdlawg.

⁷Thaus puab nug koj has tas vim le caag koj quaj le ntawd? Koj teb puab has tas, vim puab yuav nov xuv tsi zoo, thaus puab nov tej xuv ntawd, puab yuav ntshai kawg nkaus, puab tej npaab yuav tsaug leeg, puab tug zug yuav ntaug hab puab tej hauvcaug yuav tshee nyo. Lub sijhawm tub lug txug lawm; tej nuav yeej yuav tshwmsim.” Tug TSWV kws kaav ib puas tsaav yaam has le ntawd.

⁸Tug TSWV has rua kuv tas:

⁹“Tub noobneej, koj ca le cev tug TSWV kws kaav ib puas tsaav yaam tej lug rua puab has tas: Muaj ib raab ntaaj, raab ntaaj ntawd luas tub huv tau ntse hab txhuam ci nplaag lawm.

¹⁰Luas huv raab ntaaj ntawd tua tuabneeg, hab txhuam ci nplaag cuag tsaglig xub laim. Yuav tsi muaj kev kaaj sab rua kuv tsaav tuabneeg kws tsi noog kuv tej lug hab tsi quavntsej kuv tej kev rau txim.

¹¹Luas txhuam raab ntaaj ci nplaag npaaj ca siv lawm xwb. Luas huv hab txhuam raab ntaaj ci nplaag coj moog cob rua tug tuabneeg tua tuabneeg txhais teg.

¹²Tub noobneej, ca le quaj tu sab; rua qhov raab ntaaj ntawd yuav tua kuv tsaav tuabneeg, hab tua taagnrho cov Yixalayees tej thawjcoj huv tuabsi. Puab yuav raug tua tuag taag nrug kuv tsaav tuabneeg. Ca le ntaus koj hauvsab vim tsi muaj kev ca sab lawm!

¹³Kuv taabtom sim kuv tsaav tuabneeg, yog puab tsi kaam hloov sab, tej kws kuv has ntawd yuav lug raug puab.

¹⁴“Tub noobneej, koj ca le cevlug. Koj ca le npuaj teg, ces raab ntaaj yuav txav moog txav lug, raab ntaaj ntawd yog raab ntaaj tua tuabneeg kws txaus ntshai heev, hab yog raab ntaaj kws txuv tuabneeg txujsa.

¹⁵Raab ntaaj ntawd yuav ua rua kuv tsaav tuabneeg zug ntaug hab qaug. Kuv yuav muab kuv raab ntaaj kws tua tuabneeg huv ci nplaag cuag tsaglig xub laim, hem puab huv lub nroog.

¹⁶Raab ntaaj kws ntse heev, koj ca le txav moog rua saab xis hab saab txhumphem! Koj ca le txav moog rua txhua phaab

¹⁷Kuv los yuav npuaj teg hab kuv txujkev chim yuav ntaug. Kuv yog tug TSWV kws has le ntawd.”

¹⁸Tug TSWV has rua kuv tas,

¹⁹“Tub noobneej, koj ca le tshuam phaj rua ntawm ob txujkev kws tug vaajntxwv Npanpiloos yuav coj nwg raab ntaaj tuaj. Ob txujkev ntawd tuaj huv tuab lub tebchaws tuaj. Koj tshuam dlaim phaj rua ntawm ob txujkev tshuam kws moog rua huv lub nroog.

²⁰Tshuam ib dlaim phaj qha vaajntxwv kev moog rua huv cov Amoos lub nroog Lanpas, hab ib dlaim qha kev moog rua huv lub nroog Yeluxalees kws muaj chaw faajxwm ruaj khov huv tebchaws Yudas.

²¹Tug vaajntxwv kws kaav Npanpiloos tuaj sawv ntawm ob dlaim phaj ntawm kev tshuam. Nwg tsi paub has tas yuav moog txuj twg, ces nwg muab cov xub neevnti cu, nwg tuavxaam nrug nwg tej mlom, hab saib tug tsaj kws tua ua khoom fij lub sab.

²²Vaajntxwv saab teg xis tuav rawv ib tug vug sau has tas lub nroog ‘Yeluxalees!’ Tug vug ntawd qha rua vaajntxwv kuas ca le qw ntaus rog, khawb aav puab ntswg hab khawb kwj ncig lub nroog.

²³Cov tuabneeg huv Yeluxalees yuav tsi ntseeg tej nuav, rua qhov puab tau coglug tseg lawm. Tabsis tej lug qha tshwm ntawd, yog qha puab tej kev txhum hab ceebtoom rua puab paub has tas puab yuav raug nteg.

²⁴Tom qaab ntawd tug TSWV kws kaav ib puas tsaav yaam has rua puab le nuav: ‘Mej tej kev txhum tub tshwm rua suavdlawg pum lawm. Txhua tug pum has tas mej tau ua txhum luj heev. Txhua yaam kws mej ua qha rua suavdlawg paub has tas mej ua txhum. Txug sijhawm rau txim rua mej lawm, kuv yuav muab mej cob rua mej cov yeebncuab.

²⁵“ ‘Cov Yixalayees tej thawjcoj kws ua phem hab tsi dlawbhuv, nub kws rau txim zag kawg rua mej tub lug txug lawm.

²⁶Kuv yog tug TSWV kws kaav ib puas tsaav yaam, tej lug nuav yog kuv has. Ca le hle mej tej mom kub, hab hle pluaj ntaub kws khi mej taubhau tseg. Yuav tsi zoo le qub lawm. Yuav tsaa cov tuabneeg pluag kuas muaj fwjchim! Hab yuav txu cov thawjtswj kuas poob fwjchim!

²⁷Puamtsuaj, puamtsuaj! Kuv yuav ua kuas lub nroog puamtsuaj. Tabsis tej xwm nuav yuav tsi tau muaj moog txug thaus tug kws kuv xaiv lug rau txim rua lub nroog lug txug. Kuv yuav muab lub nroog cob rua tug ntawd.

²⁸“ ‘Tub noobneej, koj ca le cev tug TSWV kws kaav ib puas tsaav yaam tej lug rua cov Amoos kws txobthuam cov Yixalayees le nuav: “Npaaj raab ntaaj txhij lawm; luas txhuam raab ntaaj ntawd ci nplaag cuag tsaglig xub laim ca tua tuabneeg lawm xwb.

²⁹Tej ywgtoog cuav kws mej pum hab tej lug qha tshwm kws mej has yog lug dlaag xwb. Mej ua kev phem kev qas, nub kws rau txim zag kawg rua mej lug txug lawm. Raab ntaaj yuav lug txav mej cejdlaab.

³⁰“ ‘ “Ca le ntsaws raab ntaaj rua huv naab! Kuv yuav txav txim rua mej ntawm thaaj chaw kws kuv tsim mej, hab huv lub tebchaws kws yug mej.

³¹Kuv yuav ua kuas mej raug kuv txujkev chim kws cig le nplaim tawg. Hab kuv yuav muab mej cob rua cov tuabneeg nruj tsiv kws muaj cuabkaav ua kuas mej raug puamtsuaj.

³²Mej yuav raug suavtawg hlawv kuas kub nyab taag. Mej cov ntshaav yuav nrug rua huv mej lub tebchaws, hab yuav tsi muaj leejtwg ncu txug mej lawm.” ’ ” Tug TSWV has le ntawd.