Read Hmong Njua Exekees 36 Bible Online

Exekees 36 - Hmong Njua bible

Exekees 36

¹Tug TSWV has tas, “Tub noobneej, koj ca le has rua Yixalayees tej roob kuas puab noog

²tug TSWV kws kaav ib puas tsaav yaam tej lug kws has le nuav: Mej cov yeebncuab has rua mej tas, ‘Tej roob kws nyob thaus u lug puavleej yog peb le!’

³“Koj ca le tshev puab lawv le tug TSWV kws kaav ib puas tsaav yaam tej lug kws has le nuav: Thaus cov tuabneeg nyob puagncig cov Yixalayees tuaj tua hab txeeb cov Yixalayees tej roob, puab txhua tug luag cov Yixalayees plig.

⁴Cov Yixalayees tej roob, mej ca le noog tug TSWV kws kaav ib puas tsaav yaam tej lug kws has rua tej roob, tej laaj roob, tej dlej, tej haav, tej chaw kws pob puag taag kws nyob qhuav nkuag ca hab tej nroog kws tuabneeg tsiv taag kws raug tej tebchaws nyob puagncig tsimtxom hab luag plig.

⁵“Tug TSWV kws kaav ib puas tsaav yaam has tas, vim kuv khib heev kuv txhaj tawmtsaam cov tuabneeg kws nyob puagncig cov Yixalayees, hab tawmtsaam cov Edoos kws muaj plhus ntxag tuaj txeeb kuv lub tebchaws hab kuv tej tshaav zaub ua puab tug lawm.

⁶“Yog le ntawd koj ca le has rua lub tebchaws Yixalayees, has rua tej roob, tej laaj roob, tej dlej hab tej haav lawv le tug TSWV kws kaav ib puas tsaav yaam tej lug kws has tas, ‘Kuv khib hab chim heev, vim kuv tsaav tuabneeg raug cov tuabneeg kws nyob puagncig puab thuam hab saib tsi taug.

⁷Kuv yog tug TSWV kws kaav ib puas tsaav yaam, kuv coglug has tas, lwm tsaav tuabneeg kws nyob puagncig koj yuav raug rhuav kuas poob ntsejmuag.

⁸Tabsis tej ntoo sau cov Yixalayees tej roob yuav rov hlaav nplooj hab tawg paaj txi txiv rua cov Yixalayees kws yog kuv tsaav tuabneeg. Mej yuav tau rov lug nyob huv mej lub tebchaws sai sai.

⁹Kuv tuaj mej tog, kuv yuav ua kuas mej rov tau laij mej tej teb hab cog mej tej qoobloo.

¹⁰Kuv yuav ua kuas mej tsaav tuabneeg fuamvaam coob tuaj. Mej yuav rov lug nyob huv mej tej nroog hab yuav rov txhim khu tej kws pob puag taag lawm.

¹¹Kuv yuav ua kuas tuabneeg hab tsaj txhu fuamvaam coob. Mej yuav coob tshaaj yaav taag lug ntau npaug hab mej yuav muaj tubki coob. Kuv yuav ca mej nyob huv lub tebchaws ntawd ib yaam le mej nyob lug lawm, hab kuv yuav ua kuas mej vaammeej tshaaj yaav taag lug. Mej txhaj yuav paub has tas kuv yog tug TSWV.

¹²Kuv yuav coj cov Yixalayees kws yog kuv tsaav tuabneeg rov lug nyob huv lub tebchaws. Lub tebchaws yuav yog mej tug, hab mej tej mivnyuas yuav tsi tshaib tsi nqhes lawm.’

¹³“Kuv kws yog tug TSWV kws kaav ib puas tsaav yaam has le nuav: Tej tuabneeg hu koj has tas koj yog lub tebchaws noj tuabneeg hab has tas, nwg nyag nwg tej mivnyuas.

¹⁴Tabsis txij nuav moog koj yuav tsi noj tuabneeg hab tsi nyag koj tej mivnyuas lawm. Kuv yog tug TSWV kws kaav ib puas tsaav yaam has le ntawd.

¹⁵Kuv yuav tsi pub koj lub tebchaws nov lwm tsaav tuabneeg tej lug txobthuam, koj yuav tsi tau ris txujkev txaajmuag. Hab koj yuav tsi nyag koj tsaav tuabneeg tej mivnyuas lawm.” Kuv yog tug TSWV kws kaav ib puas tsaav yaam has le ntawd.

¹⁶Tug TSWV has rua kuv tas:

¹⁷“Tub noobneej, thaus cov Yixalayees tseem nyob huv puab lub tebchaws, puab lub neej hab teg num ua rua lub tebchaws tsi huv lawm. Kuv saib puab teg num tsi huv ib yaam le tug quaspuj kws coj khaub dluag.

¹⁸Vim puab tua tuabneeg hab pe mlom ua rua puab lub tebchaws tsi huv lawm. Kuv txhaj ca puab raug kuv txujkev chim kws luj kawg nkaus.

¹⁹Kuv rau txim rua puab vim puab lub neej hab teg num tsi zoo, kuv txhaj ntab puab moog nyob rua lwm tebchaws lawm.

²⁰Txawm yog puab moog nyob lub tebchaws twg los puab ua rua luas txobthuam kuv lub npe kws dlawbhuv; rua qhov luas has tas, ‘Cov tuabneeg ntawd yog tug TSWV tsaav tuabneeg, tabsis puab raug ntab tawm huv tug TSWV lub tebchaws moog lawm.’

²¹Kuv fwm kuv lub npe kws dlawbhuv, txhua qhov kws cov Yixalayees moog nyob, puab ua rua kuv poob ntsejmuag.

²²“Yog le ntawd, koj ca le has tug TSWV kws kaav ib puas tsaav yaam tej lug rua cov Yixalayees le nuav: Yaam kws kuv yuav ua tsi yog saib rua sau cov Yixalayees, tabsis vim kuv lub npe dlawbhuv kws mej ua rua kuv poob ntsejmuag rua huv txhua lub tebchaws kws mej moog nyob.

²³Thaus kuv qha kuv lub npe kws dlawbhuv rua lwm tsaav tuabneeg, yog lub npe kws mej ua rua kuv poob ntsejmuag taabmeeg puab, puab txhaj yuav paub has tas kuv yog tug TSWV. Kuv yog tug TSWV kws kaav ib puas tsaav yaam has le ntawd. Kuv khaiv mej moog qha rua ntau tsaav tuabneeg paub has tas, kuv yog Vaajtswv tug kws dlawbhuv.

²⁴Kuv yuav tso mej tawm huv txhua tsaav tuabneeg tej tebchaws hab coj mej rov lug nyob huv mej lub tebchaws.

²⁵Kuv yuav muab dlej nchus rua mej hab ntxuav kuas mej huv ntawm mej tej mlom hab txhua yaam kws ua rua mej tsi huv lawm.

²⁶Kuv yuav muab lub sab tshab hab txujkev xaav tshab rua mej. Kuv yuav muab mej lub sab kws tawv le pobzeb povtseg, hab muab lub sab kws noog lug rua mej.

²⁷Kuv yuav pub kuv tug Ntsujplig rua mej, kuas mej coj tau lawv le kuv txuj kevcai hab ceev kuv tej lug saamfwm.

²⁸Mej yuav tau nyob huv lub tebchaws kws kuv muab rua mej cov yawmkoob lawm. Mej yuav yog kuv tsaav tuabneeg hab kuv yuav yog mej tug Vaajtswv.

²⁹Kuv yuav cawm kuas mej dlim ntawm txhua yaam kws ua rua mej tsi huv. Kuv yuav ua kuas muaj qoobloo nplua mag rua mej, mej txhaj yuav tsi tshaib tsi nqhes ntxiv lawm.

³⁰Kuv yuav ua kuas mej tej txiv ntoo txi txiv ncw hab ua rua mej tej teb ntsu qoobloo, mej txhaj yuav tsi tshaib tsi nqhes hab tsi poob ntsejmuag rua luas lwm tsaav tuabneeg.

³¹Mej yuav ncu txug tej kev phem kev qas hab tej kws mej ua tsi zoo, mej yuav rov ntxub mej, vim tej kev txhum kws mej tau ua taag lug lawm.

³²Cov Yixalayees, kuv xaav kuas mej paub has tas, tej kws kuv ua nuav tsi yog saib rua sau mej. Tabsis yog kuv xaav kuas mej paub txaajmuag rua tej kws mej ua ntawd. Kuv yog tug TSWV kws kaav ib puas tsaav yaam has le ntawd.”

³³Tug TSWV kws kaav ib puas tsaav yaam has tas, “Thaus kuv ntxuav kuas mej huv ntawm mej tej kev txhum lawm, kuv yuav coj mej rov moog nyob huv mej tej nroog hab mej yuav rov txhim khu tej nroog kws pob puag taag lawm.

³⁴Txhua tug kws dlua kev moog lug hlaa mej lub tebchaws, puab pum has tas mej lub tebchaws nyob qhuav nkuag ca, tabsis nwgnuav kuv yuav ca mej rov lug cog qoobloo rua huv mej lub tebchaws.

³⁵Tej tuabneeg yuav sis thaam has tas, yaav taag lug lub tebchaws nuav nyob qhuav nkuag ca, tabsis nwgnuav rov zoo le lub Vaaj Edees lawm. Tej nroog kws pob puag taag hab nyob qhuav nkuag ca rov muaj vaaj tse khov kho hab tuabneeg nyob xauv npo le qub.

³⁶Lwm tsaav tuabneeg kws seem nyob puagncig koj txhaj yuav paub has tas kuv yog tug TSWV kws rov txhim khu tej nroog kws pob puag taag lawm hab rov cog qoobloo rua huv lub tebchaws kws nyob qhuav nkuag lawm. Kuv yog tug TSWV, kuv coglug has tas kuv yuav ua tej nuav, kuv yuav ua le ntawd tag.”

³⁷Tug TSWV kws kaav ib puas tsaav yaam has tas, “Kuv yuav ca cov Yixalayees rov lug thov kuv paab puab dlua ib zag hab kuv yuav pub kuas puab fuamvaam coob ua npoj ntwg ib yaam le paab yaaj.

³⁸Tej nroog kws nwgnuav pob puag taag lawm, yuav rov muaj tuabneeg lug nyob puv nkaus ib yaam le lub nroog Yeluxalees kws yaav taag lug muaj yaaj nyob puv nkaus hab muab tua ua khoom fij rua nub kws ua kevcai. Ces puab txhaj yuav paub has tas, kuv yog tug TSWV.”