Read Hmong Njua Exekees 38 Bible Online

Exekees 38 - Hmong Njua bible

Exekees 38

¹Tug TSWV has rua kuv tas:

²“Tub noobneej, koj ca le cev kuv tej lug tawmtsaam Nkos kws yog tug vaajntxwv kaav lub nroog Mesej hab Tunpas kws nyob huv tebchaws Mankos. Koj ca le cev kuv tej lug tshev Nkos

³hab has rua nwg tas, tug TSWV kws kaav ib puas tsaav yaam has tas, kuv yog nwg tug yeebncuab.

⁴Kuv yuav muab nwg tig rov qaab hab muab tej nuv chob nwg pobtxhaa puabtsaig, caab nwg, nwg cov tubrog, nwg cov neeg hab cov tubrog caij neeg rov qaab. Cov tubrog ntawd coob heev, puab coj cuabyeej ua rog: coj dlaim thaiv nav ntaaj, sa hlaab hab coj ntaaj.

⁵Cov tubrog Pawxias, Sudaas hab Linpias nrug nwg tuaj. Cov tubrog ntawd puavleej muaj dlaim thaiv nav ntaaj hab muaj mom hlau.

⁶Cov tubrog kws nyob huv Nkaumeles hab Npethes Taunkamas saab qaumteb hab muaj lwm tsaav tuabneeg tej tubrog coob heev nrug nwg tuaj.

⁷Nkos hab cov tubrog kws nwg kaav ca le npaaj kuas txhij.

⁸Ntau xyoo tom qaab, nwg yuav moog ntaus lub tebchaws kws cov tuabneeg kws nyavnyuas rov huv lwm tebchaws lug nyob, hab puab nyob tsi ntshai kev tsuv kev rog. Nwg yuav moog vij cov Yixalayees tej roob kws nyob qhuav nkuag tau ntau xyoo lug lawm. Tabsis nwgnuav puab nyob kaaj sab lug.

⁹Nwg hab nwg cov tubrog nrug lwm tsaav tuabneeg cov tubrog moog ntaus rog ib yaam le naag xub naag cua hab ib yaam le tauv fuab lug roog lub tebchaws.”

¹⁰Tug TSWV kws kaav ib puas tsaav yaam has rua Nkos has tas: “Thaus txug lub sijhawm ntawd, koj yuav xaav hab npaaj ua phem.

¹¹Koj has tas, kuv yuav moog vij lub tebchaws kws tej zog tsi muaj ntsaa yeej thaiv; kuv yuav tua cov tuabneeg kws nyob tso sab lug. Puab tej zog tsi muaj ntsaa yeej hab tsi muaj roojvaag thaiv.

¹²Koj yuav fuab cov tuabneeg kws nyob huv cov nroog kws yaav taag lug tub raug puamtsuaj ib zag lawm. Puab tawm huv lwm tebchaws rov lug sis sau ua ke, nwgnuav puab muaj tsaj txhu, muaj tebchaws hab nyob huv plawv nplajteb.

¹³Cov tuabneeg Senpas, Dedaas hab cov tub laag tub luam kws nyob huv cov nroog huv tebchaws Xapees yuav tuaj nug koj has tas, ‘Koj tub txhij tau tubrog moog tua rog hab fuab khoom lawm los? Puas yog koj xaav tau nyaj tau kub, tsaj txhu hab khoom noj khoom haus nplua mag rov lug tsev?’ ”

¹⁴Tug TSWV kws kaav ib puas tsaav yaam has kuas kuv moog cev tug TSWV tej lug rua Nkos has tas, “Nwgnuav kuv tsaav tuabneeg Yixalayees nyob tso sab lug, koj yuav sawv kev

¹⁵ntawm koj qhov chaw kws nyob saab qaumteb, coj koj cov tubrog hab lwm tsaav tuabneeg cov tubrog kws coob heev tuaj. Cov tubrog ntawd txhua tug puavleej caij neeg.

¹⁶Koj yuav tuaj tua kuv tsaav tuabneeg Yixalayees ib yaam le naag xub naag cua lug thoob plawg lub tebchaws. Thaus txug lub sijhawm ntawd, kuv yuav kuas koj moog tua kuv lub tebchaws. Qhov kws kuv ca koj ua le ntawd, ua rua ntau tsaav tuabneeg paub has tas, kuv yog tug TSWV kws dlawbhuv.

¹⁷Koj yog tug kws ntau xyoo dlhau lug kuv cov tubkhai kws yog Yixalayees cov cev Vaajtswv lug tau has txug, txug thaus ntawd kuv yuav coj koj tuaj tua cov Yixalayees.” Tug TSWV kws kaav ib puas tsaav yaam has le ntawd.

¹⁸Tug TSWV kws kaav ib puas tsaav yaam has tas, “Nub kws Nkos tuaj tua cov Yixalayees, kuv yuav chim heev.

¹⁹Thaus kuv chim hab npautawg, kuv txujkev chim yuav kub cuag suavtawg, nub ntawd aav yuav qeeg luj heev nyob huv cov Yixalayees lub tebchaws.

²⁰Tej ntseg, tej noog, tej tsaj luj tsaj miv hab txhua tug tuabneeg kws nyob huv nplajteb puavleej ntshai kuv tshee nyo. Tej roob sab yuav nphau, tej roob zeb roob tsuas yuav ua zug koog hab tej ntsaa yeej yuav pob taag.

²¹Kuv yuav tso kev puamtsuaj lug ua rua Nkos ntshai heev. Ces Nkos cov tubrog yuav rhu ntaaj rov sis tua. Kuv yog tug TSWV kws kaav ib puas tsaav yaam has le ntawd.

²²Kuv yuav rau txim rua Nkos, kuas raug kaab mob hab muaj kev sis ntaus sis tua. Kuv yuav tso naag xub naag cua nrug lawg hab nplaim suavtawg leejfaaj lug rua nwg, nwg cov tubrog hab lwm tsaav tuabneeg cov tubrog.

²³Qhov kws kuv ua le ntawd, yog qha rua lwm tsaav tuabneeg paub has tas, kuv yog tug muaj fwjchim luj hab yog tug kws dlawbhuv. Puab txhaj paub has tas, kuv yog tug TSWV.”