Read Hmong Njua Exekees 8 Bible Online

Exekees 8 - Hmong Njua bible

Exekees 8

¹Lub rau hli ntuj, nub xab tsib xyoo rau kws peb raug nteg moog nyob rua lwm tebchaws, cov Yudas tej thawjcoj kws raug nteg moog nrug kuv nyob ua ke huv kuv tsev. Taamsim ntawd tug TSWV kws kaav ib puas tsaav yaam lub fwjchim lug kaav hlo kuv.

²Kuv tsaa qhovmuag saib rua sau, kuv pum muaj ib yaam zoo le tug tuabneeg. Txij ntawm nwg lub dluav rov huv zoo le suavtawg hab txij ntawm nwg lub dluav rov sau zoo le tej tooj dlaag kws luas muab txhuam ci ci lawm.

³Nwg cev ib yaam zoo le txhais teg tuaj kov kuv cov plaubhau. Nyob huv zaaj ywgtoog ntawd, Vaajtswv tug ntsujplig txawm lug nqaa hlo kuv moog rua sau nruab ntug, hab coj kuv moog rua huv Yeluxalees, nwg coj kuv nkaag ntawm lub roojvaag saab qaumteb moog rua huv lub Tuamtsev. Nyob qhov ntawd muaj ib tug mlom kws Vaajtswv ntxub heev.

⁴Kuv pum cov Yixalayees tug Vaajtswv tug tshwjchim zoo ib yaam le kuv tau pum zag taag lug ntawm ntug Dlej Khenpales.

⁵Vaajtswv has rua kuv tas, “Tub noobneej, koj ca le saib moog rua saab qaumteb.” Kuv txawm saib rua peg, kuv pum ib tug mlom kws Vaajtswv ntxub heev nyob ze ntawm lub thaaj kws yog txujkev lug tom lub roojvaag lug.

⁶Vaajtswv has rua kuv tas, “Tub noobneej, koj puas pum muaj dlaabtsi tshwmsim? Koj saib tej kev phem kev qas kws cov Yixalayees ua ntawm nuav, ua rua kuv tsiv dleb zuj zug ntawm kuv lub chaw dlawbhuv moog lawm. Koj tseem yuav pum muaj tej yaam kws phem tshaaj tej nuav hab.”

⁷Nwg coj kuv moog rua ntawm txujkev kws lug nrau lub tshaav puam lug, hab qha kuv saib ib lub qhov ntawm saab phaab ntsaa.

⁸Nwg has tas, “Tub noobneej, koj ca le tsoo saab phaab ntsaa nuav.” Kuv txawm tsoo saab phaab ntsaa ntawd tawg txua rua huv hab pum ib lub qhovrooj.

⁹Nwg has rua kuv tas, “Koj ca le moog rua saab huv hab saib tej kev phem kev qas kws puab ua nyob huv.”

¹⁰Yog le ntawd, kuv txhaj moog rua huv hab saib, kuv pum luas nraaj tej dluab ua tej tug naab hab lwm yaam tsaj tsi huv, hab tej mlom kws cov Yixalayees pe puv nkaus rua tim tej phaab ntsaa.

¹¹Cov Yixalayees tej thawjcoj xyaa caum leej tuaj nyob ntawd. Safas tug tub Ya-axaniyas los nrug puab nyob ntawd hab. Puab cov ntawd ib leeg tuav rawv ib qho moov tshuaj tsw qaab hlawv ua paa nchu auv quas nab.

¹²Vaajtswv nug kuv has tas, “Tub noobneej, koj puas pum tej kws cov Yixalayees tej thawjcoj tuaj ua nyob nraim quas nkoog ntawd? Puab taabtom pehawm huv chaav kws muaj tej dluab mlom nyob puv nkaus. Puab has tas: ‘Tug TSWV tsi pum peb le! Nwg tub tso peb lub tebchaws tseg lawm.’ ”

¹³Ces tug TSWV has rua kuv tas, “Koj tseem yuav pum puab ua tej kev phem kev qas kws phem tshaaj ntawd hab.”

¹⁴Tug TSWV coj kuv moog rua ntawm lub roojvaag saab peg lub Tuamtsev, hab qha kuas kuv saib cov quaspuj kws tuaj quaj nyav tug mlom Tamus.

¹⁵Nwg nug kuv has tas, “Tub noobneej, koj puas pum tej ntawd? Koj tseem yuav pum tej yaam kws phem tshaaj tej ntawd hab.”

¹⁶Yog le ntawd nwg coj kuv moog saib chaav huv plawv lub Tuamtsev. Nyob ze ntawm txujkev kws moog rua huv chaav pehawm Vaajtswv, ntu nruab nraab ntawm qaab khaav hab lub thaaj, muaj neeg nkaum tsib leeg txivneej nyob ntawd. Puab tig nrausqaum rua ntawm chaav pehawm Vaajtswv, tig xubndlag hab nyo taubhau rua saab nubtuaj, pe lub nub kws taabtom tawm tuaj.

¹⁷Tug TSWV has rua kuv ntxiv tas, “Tub noobneej, koj puas pum tej ntawd? Cov tuabneeg Yudas tseem tsi tau txaus sab rua tej kev phem kev qas kws koj tau pum ntawd, hab tej kev kub ntxhuv kws muaj thoob plawg lub tebchaws le. Tsi taag le ntawd xwb, puab tseem tuaj rua huv lub Tuamtsev nuav ua kuas txaus puab sab hab ua kuas kuv chim. Koj saib! Puab ua txhua yaam tawmtsaam kuv npaum le puab yuav ua tau.

¹⁸Puab yuav raug kuv txujkev chim kws luj kawg nkaus. Kuv yuav tsi tseg hab tsi taabncuab puab le. Txawm yog puab yuav quaj thov kuv los kuv yuav tsi noog puab tej lug thov.”