Read Hmong Njua Daniyees 9 Bible Online

Daniyees 9 - Hmong Njua bible

Daniyees 9

¹Vaajntxwv Xawxes kws yog tuabneeg Medes tug tub Dali-us ua vaajntxwv kaav lub tebchaws Npanpiloos.

²Daniyees has tas, thawj xyoos kws Dali-us ua vaajntxwv kaav tebchaws, kuv kawm Vaajtswv txujlug hab kuv xaav txug lub nroog Yeluxalees kws yuav raug puamtsuaj xyaa caum xyoo, lawv le tug TSWV tau has rua Yelemis kws yog tug cev Vaajtswv lug sau tseg lawm.

³Kuv kub sab lug thov tug Tswv kws yog Vaajtswv. Kuv yoo mov, kuv naav ntaub tsaaj, hab kuv nyob huv qhov tshauv.

⁴Kuv thov tug Tswv kws yog Vaajtswv, hab kuv leeg tej kev txhum kws kuv tsaav tuabneeg ua. Kuv thov has tas, “Tug Tswv kws yog Vaajtswv. Koj yog tug kws muaj fwjchim luj, peb fwm koj. Koj yeej ua lawv le koj tej lug cog tseg. Koj hlub tug kws muab sab npuab koj hab ua lawv le koj tej lug.

⁵“Peb tau ua txhum, peb lub sab yeej phem hab peb yuam kev lawm. Peb tsi noog koj lug, hab peb tsi kaam ua tej kws koj qha kuas peb ua lawv le koj lub sab nyam.

⁶Peb pheej tsi ntseeg tej kws koj cov cevlug qha peb. Puab yog koj cov tubkhai kws koj khaiv lug pav qha rua peb cov vaajntxwv, cov numtswv, cov yawmkoob hab rua peb tsaav tuabneeg suavdlawg.

⁷Tug TSWV, koj yog tug kws ncaaj nceeg, tabsis peb suavdlawg pheej ua txhum. Luas saib tsi taug peb cov Yixalayees kws nyob tim lub tebchaws Yudas, cov kws nyob huv lub nroog Yeluxalees hab cov kws raug koj ntab tawm tsiv moog rua lwm lub tebchaws dleb hab ze lawm. Luas saib tsi taug peb, vim peb tsi muab sab npuab koj.

⁸Tug Tswv, peb cov vaajntxwv, peb cov numtswv hab peb suavdlawg tau ua phem ua qas rua koj.

⁹Txawm yog peb pheej ntxeev sab rua koj los koj tseem hlub hab zaam peb lub txim.

¹⁰Tug TSWV kws yog peb tug Vaajtswv, thaus koj khaiv koj cov cevlug kws yog koj cov tubkhai tuaj qha kuas peb ua lawv le koj tej Kevcai los peb tsi noog koj tej lug le.

¹¹Cov Yixalayees puavleej ua txhum koj tej Kevcai hab tsi noog koj tej lug. Peb suavdlawg tau ua txhum, koj txhaj rau txim rua peb lawv le koj tej lug foom phem kws sau rua huv koj tug tubkhai Mauxes phoo Kevcai lawm.

¹²Koj rau txim rua peb hab cov numtswv lawv le koj tau has tseg. Koj rau txim rua lub nroog Yeluxalees nyaav tshaaj le kws koj rau txim rua lwm lub nroog huv nplajteb nua huv tuabsi.

¹³Peb raug ib puas tsaav yaam txim lawv le tej lug kws Mauxes phoo Kevcai qha tseg. Tug Tswv kws yog peb tug Vaajtswv, txawm yog nwgnuav los peb tseem tsi mob sab ua lawv le koj lub sab nyam. Peb pheej ua kev txhum tsi tso tseg, hab peb tsi ua lawv le qhov tseeb.

¹⁴Tug TSWV kws yog peb tug Vaajtswv, koj yeej xaav tseg lawm has tas, koj yuav rau txim rua peb, nwgnuav koj tub rau txim rua peb le ntawd lawm tag, rua qhov ib puas tsaav yaam kws koj ua, koj yeej ua ncaaj, tabsis yog peb tsi noog koj lug xwb.

¹⁵“Tug TSWV kws yog peb tug Vaajtswv, qhov kws koj coj koj tsaav tuabneeg tsiv tawm nraag tebchaws Iziv lug, yog ua rua kuas suavdlawg pum koj lub fwjchim. Naj nub nuav los peb tseem ncu ntsoov koj lub fwjchim ntawd. Peb tau ua txhum lawm tag, peb yeej muaj txim.

¹⁶Yaav taag lug lawm, koj tau tsomkwm peb, mas thov koj tsi xob chim rua lub nroog Yeluxalees ntxiv lawm. Yeluxalees yog koj lub nroog hab yog koj lub roob kws dlawbhuv. Taagnrho cov tebchaws kws nyob puagncig peb txobthuam lub nroog ntawd hab koj tsaav tuabneeg, vim peb tej kev txhum, hab tej kev phem kev qas kws peb cov yawmkoob tau ua taag lug.

¹⁷Vaajtswv, thov koj noog kuv tej lug thov. Thov koj paab kuas rov muaj tuabneeg txhim khu koj lub Tuamtsev kws puag taag lawm, kuas rov qaab zoo le qub, suavdlawg txhaj le yuav paub has tas, koj yog Vaajtswv.

¹⁸Vaajtswv, thov koj noog peb lub suab thov. Thov koj tsaa qhovmuag saib peb cov kws raug kev ntxhuv sab hab saib cov tuabneeg kws raug kev txomnyem huv lub nroog kws hu lawv le koj lub npe. Peb tsaa ncauj thov koj tsi yog vim peb yog tuabneeg ncaaj nceeg, tabsis vim koj yog tug kws hlub peb hab yog tug ncaaj nceeg.

¹⁹Tug TSWV, thov koj noog peb tej lug thov. Tug TSWV, thov koj zaam peb lub txim. Tug TSWV, thov koj noog hab teb peb tej lug thov! Tug TSWV, thov koj tsi xob tog ntev, suavdlawg txhaj paub has tas koj yog Vaajtswv! Lub nroog hab cov tuabneeg nuav yog koj tug.”

²⁰Kuv thov Vaajtswv, kuv leeg kuv tej kev txhum hab kuv cov tuabneeg tej kev txhum rua Vaajtswv. Kuv thov tug TSWV kws yog kuv tug Vaajtswv kuas rov muaj kev txhim khu lub Tuamtsev.

²¹Thaus kuv tseem thov, tug timtswv Khali-ees kws thawj zag kuv ua ywgtoog pum txawm lug cuag kuv. Lub sijhawm kuv thov Vaajtswv ntawd, yog lub caij kws tua tsaj fij thaus yuav tsaus ntuj.

²²Khali-ees has rua kuv tas, “Daniyees, kuv lug qha kuas koj totaub zaaj kws yuav muaj lug yaav tom ntej nuav.

²³Thaus koj pib thov Vaajtswv, nwg tub teb koj tej lug thov lawm, nwg yeej hlub koj. Nwgnuav kuv yuav qha zaaj ywgtoog ntawd rua koj, koj ua tuab zoo noog kuv has.

²⁴“Xyaa caum zag xyaa ntawd, yog lub sijhawm kws teem ca rua koj tsaav tuabneeg hab lub nroog dlawbhuv kws dlim ntawm tej kev phem kev qas. Hab Vaajtswv yuav zaam txim rua cov tuabneeg kws ua txhum. Txij thaus ntawd moog yuav muaj kev ncaaj nceeg moog ibtxhis, txhaj yuav muaj lawv le tej zaaj ywgtoog kws has txug yaav tom ntej nuav. Hab yuav rov muab lub Tuamtsev dlawbhuv fij rua Vaajtswv dlua.

²⁵Koj yuavtsum tau ua tuab zoo xaav kuas txhua txhua, hab totaub meej meej txug tej kws kuv yuav has nuav. Suav txij le nub kws Vaajtswv has kuas rov txhim khu lub nroog Yeluxalees dlua tshab moog txug thaus tug kws Vaajtswv xaiv lug ua tug thawjtswj lug txug lawm, yuav ntev txug plaub caug cuaj xyoos. Lub nroog Yeluxalees kws luas txhim khu dlua tshab ntawd, yuav muaj ntau txujkev hab tej ntsaa yeej yuav khov kho vij lub nroog. Lub nroog nuav yuav nyob ruaj khov plaub puas peb caug plaub xyoos kws yog tam muaj kev txomnyem ntxhuv sab.

²⁶Thaus kawg tam ntawd, tug kws Vaajtswv xaiv ca ua tug thawj, txawm yog nwg tsi tau ua txhum los nwg yuav raug luas muab tua povtseg. Ib tug thawjtswj tebchaws kws muaj fwjchim luj tej tubrog yuav tuaj rhuav lub nroog hab lub Tuamtsev. Tej kev tsuv kev rog kws Vaajtswv kuas muaj thaus kawg, yuav ua rua ib puas tsaav yaam puamtsuaj taag ib yaam le thaus dlej nyaab.”

²⁷Tug thawjtswj tebchaws ntawd, yuav nrug ntau leej coglug ruaj khov hab muaj kev sis raug zoo txug xyaa xyoo. Thaus xyoo xyaa ntawd moog txug ib nraab, nwg yuav ua kuas suavdlawg tseg tsi tua tsaj hab tsi muab khoom fij rua Vaajtswv lawm. Nyob sau lub Tuamtsev qhov chaw kws sab tshaaj plawg, yuav muaj ib yaam txawv txawv kws phem qas kawg nkaus teeb rua sau, hab yaam ntawd yuav nyob sau moog txug thaus tug kws nqaa yaam ntawd tuaj, raug txim lawv le Vaajtswv tau npaaj tseg rua nwg lawm.