Read Hmong Njua Hauxeyas 4 Bible Online

Hauxeyas 4 - Hmong Njua bible

Hauxeyas 4

¹Tug TSWV muaj lug kom cov tuabneeg kws nyob huv lub tebchaws nuav. Cov Yixalayees, mej ca le noog tej lug kws has tas, “Cov tuabneeg kws nyob huv lub tebchaws nuav tsi muaj kev ncaaj nceeg lossis kev hlub hab tsi leeg paub has tas kuv yog puab tug Vaajtswv.

²Puab coglug hab tsi ua lawv le tej lug cog tseg ntawd; puab has lug dlaag, tua tuabneeg, ua tubsaab hab ua kev nkauj kev nraug. Muaj kev phem kev qas ntau zuj zug, hab muaj kev tua tuabneeg ib tug taag ib tug tuaj.

³Yog le ntawd, lub tebchaws yuav qhuav hab txhua tsaav yaam kws nyob huv lub tebchaws yuav tuag taag. Txhua yaam tsaj hab noog, hab txawm yog tej ntseg huv dlej los yuav tuag taag huv tuabsi.”

⁴Tug TSWV has tas, “Tsi pub mej leejtwg kom lossis tshev tej pejxeem hlo le, kuv tsuas tshev mej cov kws yog povthawj xwb.

⁵Mej naj nub naj mo ua txhum hab cov cevlug los ua txhum ib yaam le mej. Kuv yuav muab tsaav tuabneeg Yixalayees kws yog mej nam rhuav kuas puamtsuaj moog.

⁶Kuv tsaav tuabneeg raug puamtsuaj vim puab tsi leeg paub kuv. Mej cov kws yog povthawj los tsi leeg paub kuv hab tso kuv tej lug qhuab qha tseg, yog le ntawd kuv txhaj tsi leeg paub mej hab tsi pub mej cov tub lug ua kuv cov povthawj.

⁷“Mej yimfuab muaj povthawj coob, mej yimfuab ua txhum tawmtsaam kuv, yog le ntawd, kuv yuav muab mej tej kev tau ntsejmuag hloov ua kev poob ntsejmuag.

⁸Mej muaj txag npluanuj vim mej ca kuv tsaav tuabneeg moog ua kev txhum, yog le ntawd mej txhaj xaav kuas puab hajyam ua kev txhum ntau zuj zug ntxiv.

⁹Mej yuav raug txim txomnyem ib yaam le tej tuabneeg ntaag! Kuv yuav rau txim rua mej lawv le tej kws mej tau ua lawm.

¹⁰Mej yuav tau noj tej khoom fij kws yog mej tug, tabsis tseem tshaib plaab qeeg, mej yuav pe hab thov ntau tug vaajtswv kuas mej muaj tubki, tabsis mej yuav muaj tsi taug tubki, rua qhov mej tau tso kuv tseg hab moog pe lwm tug vaajtswv lawm.”

¹¹Tug TSWV has tas, “Tub yog tej cawv txiv maab qub hab tshab ua rua kuv tsaav tuabneeg tsi meejpem lawm!

¹²Puab moog pe tej mlom ntoo! Puab khov kuam saib tej kws puab xaav paub! Puab tso kuv tseg. Puab muab puab fij rua lwm tug vaajtswv ib yaam le tug quaspuj kws moog ua namndlav.

¹³Puab coj khoom moog fij sau tej roob, hab hlawv moov tshuaj tsw qaab huv tej qaab ntoo kws muaj nplooj ntxoov nyog sau tej roob, rua qhov tug dluab ntxoov ntxoo ua rua laaj sab ntxag! “Yog le ntawd, mej tej ntxhais txhaj moog ua namndlav hab mej tej nyaab txhaj moog ntxag hluas nraug.

¹⁴Txawm le ntawd los kuv yuav tsi rau txim rua mej tej ntxhais hab tej nyaab kws ua txhum le ntawd, rua qhov mej cov kws yog txivneej tub moog nrug tej namndlav nyob ua ke huv lub tsev teev mlom, hab nrug luas koom muab khoom fij rua dlaab rua mlom. Lawv le muaj paajlug has tseg tas, ‘Ib tug tuabneeg kws tsi muaj tswvyim yuav raug puamtsuaj.’

¹⁵“Txawm yog mej cov Yixalayees tsi muab sab npuab kuv los thov kuas cov Yudas tsi xob moog ua txhum le mej ua. Tsi xob moog pehawm huv lub nroog Nkilenkas lossis huv lub nroog Npethavees, lossis tsi xob moog nyob huv tej nroog ntawd tuav tug TSWV kws muaj sa nyob lub npe coglug le.

¹⁶Cov Yixalayees tawv ncauj ib yaam le tej neeg zaag. Kuv yuav ua le caag yug tau puab ib yaam le yug paab yaaj huv tshaav zaub?

¹⁷Cov Yixalayees qaug rua txujkev pe mlom lawm, ca puab ua ywj puab lub sab.

¹⁸Thaus puab haus cawv txiv maab ntau lawm, puab zoo sab hlo moog sis ntxag, puab nyam kev poob ntsejmuag heev dlua tau ntsejmuag.

¹⁹Puab yuav raug luas caab moog ib yaam le cua ntsawj, hab puab yuav raug kev txaajmuag vim qhov kws puab fij khoom rua dlaab.