Read Hmong Njua Hauxeyas 8 Bible Online

Hauxeyas 8 - Hmong Njua bible

Hauxeyas 8

¹Tug TSWV has tas, “Ca le tshuab xyu ceebtoom suavdlawg! Yeebncuab sau nthwv tuaj rua huv kuv lub tebchaws ib yaam le tug dlaav yaa tuaj! Kuv tsaav tuabneeg tsi ua lawv le tej lug kws kuv tau cog tseg rua puab hab puab tau ntxeev sab tawmtsaam kuv tej lug qha.

²Txawm yog le ntawd los puab tseem muaj plhus hu kuv ua puab tug Vaajtswv hab khaav has tas puab yog kuv tsaav tuabneeg hab paub kuv,

³tabsis puab tsi kaam leeg yuav qhov zoo. Vim le ntawm puab cov yeebncuab txhaj caum puab tua.

⁴“Kuv tsaav tuabneeg xaiv puab cov vaajntxwv, tabsis puab xaiv lawv le puab pum zoo xwb. Puab tsaa tej thawjcoj tabsis kuv tsi pum zoo. Puab muab puab tej nyaj tej kub coj moog nchuav mlom rua puab pe. Puab ua le ntawd tub yog puab rov ua rua puab raug kev puamtsuaj ntaag.

⁵Kuv ntxub tug mlom nyuj kws cov tuabneeg huv lub nroog Xamalis pe kawg le. Kuv npautawg heev rua puab. Thaus twg puab maam le tso puab txujkev pe mlom ntawd tseg?

⁶Tug mlom kws tug tuabneeg Yixalayees nchuav ntawd, yeej tsi yog tug Vaajtswv tag. Tug mlom nyuj kws suavdlawg pe huv lub nroog Xamalis yuav raug muab tsoo kuas tawg mog nyoos!

⁷Yog puab tseb cua, puab yuav tau sau naag xub naag cua! Cov nplej huv dlaim teb kws tseem tsi tau sav yeej muab tsi tau lug ua ncuav le. Tabsis yog sav lawm, tej tuabneeg txawv tebchaws yuav tuaj muab noj taag!

⁸Cov Yixalayees zoo ib yaam le lwm tsaav tuabneeg, hab tsi muaj nqes ib yaam le lub laujkaub aav kws tawg lawm.

⁹Cov Yixalayees tawv ncauj npaum nkaus le tej neeg luav qus, puab ua lawv le puab lub sab nyam xwb. Puab moog thov cov Axilias tuaj paab hab puab moog ndlav lwm tsaav tuabneeg tuaj paab tiv thaiv puab lub tebchaws.

¹⁰Tabsis nwgnuav kuv yuav sau zog puab lug ua ke hab rau txim rua puab. Tshuav tsi ntev, tug vaajntxwv kws kaav tebchaws Axilias yuav tuaj tsimtxom puab, puab yuav raug mob quaj dlaa pis luam.

¹¹“Cov Yixalayees yimfuab teeb ntau lub thaaj lug dlaws kev txhum, mas yimfuab muaj ntau lub chaw rua puab moog ua kev txhum ntxiv!

¹²Kuv sau tau ntau zaaj lug qhuab ntuag kws suav tsi txheeb qha rua cov Yixalayees, tabsis puab tsi leeg yuav, puab suav has tas yog tej lug kws puab tsi tau nov dlua hab yog lwm tsaav tuabneeg le.

¹³Puab coj tsaj tuaj tua fij rua kuv, hab puab noj tej nqaj kws yog cov khoom fij ntawd. Tabsis kuv yog tug TSWV, kuv tsi txaus sab rua puab, nwgnuav kuv yuav cim ntsoov puab tej kev txhum hab rau txim rua puab, vim tej kws puab tau ua ntawd; kuv yuav xaa puab rov qaab moog rua nraag tebchaws Iziv!

¹⁴“Cov Yixalayees ua tau ntau lub loog, tabsis puab tsi ncu qaab tug kws tsim puab lawm. Hab cov Yudas tsim tau ntau lub nroog kws txhim ntsaa yeej khov kho. Tabsis kuv yuav tso suavtawg lug hlawv puab tej loog hab tej nroog kuas puamtsuaj taag.”