Read Hmong Njua Yaunas 1 Bible Online

Yaunas 1 - Hmong Njua bible

Yaunas 1

¹Muaj ib nub Vaajtswv has rua Yaunas kws yog Amitais tug tub.

²Vaajtswv has tas, “Koj ca le moog rua peg lub nroog Nineves kws luj heev hab qha rua lub nroog ntawd; vim puab tej kev ua phem ua qas tub nrov tuaj txug kuv lawm.”

³Tabsis Yaunas xaav tsiv ntawm Vaajtswv moog, nwg txhaj moog rua lwm qhov lawm. Nwg moog rua huv lub nroog Yaupas. Thaus nwg moog txug nraag, nwg pum ib lub nkoj kws taabtom yuav sawv kev moog rua tim tebchaws Xapees. Nwg txawm them nqe nkoj hab nrug cov tuabneeg ntawd moog rua tim tebchaws Xapees, kuas nwg nyob dleb ntawm tug TSWV.

⁴Tabsis tug TSWV tso cua dlaaj cua dlub hlub heev lug ntsawj havtxwv, ua rua lub nkoj yuav tog.

⁵Cov tuabneeg kws nyob huv lub nkoj ntshai heev hab quaj qw, nyag thov nyag tug vaajtswv paab. Puab thau tej khoom nyaav huv nkoj povtseg rua huv havtxwv kuas lub nkoj sib. Thaus ntawd Yaunas moog pw tsaug zug rua txheej huv qaab lawm.

⁶Tug thawj tsaav nkoj nqeg moog pum Yaunas hab has rua nwg tas, “Koj tseem pw tsaug zug ua dlaabtsi? Ca le sawv hab thov koj tug Vaajtswv paab, tej zag nwg yuav hlub peb hab cawm peb txujsa.”

⁷Cov tuabneeg huv lub nkoj sis thaam zum zawg has tas, “Ca peb sau suavdlawg npe hab rhu ntawv saib leejtwg yog tug ua txhum, txhaj ua rua peb raug kev txhawj ntshai le nuav.” Puab txawm pum zoo ua le ntawd, ces puab rhu tau Yaunas lub npe.

⁸Yog le ntawd puab txhaj has rua Yaunas has tas, “Koj ca le qha rua peb taamsim nuav saib! Leejtwg yog tug kws ua txhum txhaj le muaj tej xwm nuav? Koj tuaj ua dlaabtsi ntawm nuav? Koj tuaj lub tebchaws twg tuaj? Hab koj yog tsaav tuabneeg dlaabtsi?”

⁹Yaunas teb has tas, “Kuv yog tuabneeg Henplais, kuv pehawm tug TSWV kws yog Vaajtswv tug nyob sau ntuj, nwg yog tug tsim lub nplajteb hab dlej havtxwv.”

¹⁰Yaunas qha rua puab has tas, nwg taabtom tsiv tug TSWV. Cov tuabneeg huv nkoj ntshai heev, hab puab has rua Yaunas has tas, “Qhov kws koj ua nuav yog ib qhov tsi zoo hab tsi tsimnyog ua hlo le!”

¹¹Cua dlaaj cua dlub ntsawj hlub heev zuj zug, yog le ntawd cov tuabneeg huv nkoj txhaj le nug Yaunas has tas, “Peb yuav ua le caag rua koj cua txhaj tu?”

¹²Yaunas teb has tas, “Mej muab kuv pov rua huv havtxwv cua txhaj yuav tu. Kuv paub has tas kuv yog tug kws ua txhum lawm txhaj muaj cua dlaaj cua dlub lug ntsawj mej le nuav.”

¹³Txawm yog le ntawd los cov tuabneeg huv nkoj tsi ua lawv le Yaunas has, puab pheej taag zug nkuam kuas lub nkoj moog lawm tim ntug xwb, tabsis cua dlaaj cua dlub pheej ntsawj hlub heev zuj zug tuaj, ua rua puab nkuam lub nkoj moog tsi tau rua qhov twg le.

¹⁴Yog le ntawd puab txhaj tsaa suab thov tug TSWV has tas, “Tug TSWV, thov koj tsi xob rau txim tuag rua peb vim qhov kws peb txuv tug txivneej nuav txujsa. Tug TSWV, thov koj leeg paub tej nuav; tub yog koj ua txhaj muaj tej nuav ntaag.”

¹⁵Ces puab txawm muab Yaunas pov rua huv havtxwv, hab taamsim ntawd havtxwv ca le tug hab tsi ndlaas lawm.

¹⁶Thaus cov tuabneeg huv lub nkoj pum le ntawd, ua rua puab ntshai tug TSWV heev, puab muab khoom hlawv fij rua tug TSWV hab coglug yuav pehawm nwg.

¹⁷Tabsis tug TSWV kuas ib tug ntseg luj heev tuaj nqog Yaunas, Yaunas nyob huv ntseg plaab tau peb nub peb mos.