Read Hmong Njua Teev Npe 12 Bible Online

Teev Npe 12 - Hmong Njua bible

Teev Npe 12

¹Mauxes moog yuav tsaav tuabneeg Kusis ib tug ntxhais lug ua quaspuj, mas Aloos hab Milias obtug thuam Mauxes rua qhov nwg yuav tug quaspuj ntawd.

²Obtug has tas, “Tug TSWV tsuas cevlug rua Mauxes tuab leeg xwb los? Nwg txawm tsi cevlug rua wb le los?” Obtug has le caag los tug TSWV yeej nov huv tuabsi lawm.

³(Mauxes yog ib tug tuabneeg txu fwjchim heev, nwg txu fwjchim tshaaj plawg tej tuabneeg kws nyob huv qaab ntuj nuav huv tuabsi.)

⁴Taamsim ntawd tug TSWV txawm has rua Mauxes, Aloos hab Milias has tas, “Kuv xaav kuas mej peb tug ko ca le tawm huv lub Tsevntaub kws yog kuv qhov chaw sis ntsib moog.” Puab txawm tawm lug,

⁵hab tug TSWV nyob huv tauv fuab, nwg sawv ntawm qhovrooj Tsevntaub hu has tas, “Aloos! Milias!” Obtug txawm txaav zog moog sawv tom hauv ntej,

⁶hab tug TSWV has tas, “Nwgnuav meb ca le noog tej lug kws kuv has! Thaus muaj ib tug cev Vaajtswv lug nrug mej nyob, kuv qha kuv rua nwg pum huv ywgtoog hab kuv has rua nwg huv npau suav.

⁷Tabsis thaus kuv nrug kuv tug tubkhai Mauxes thaam, kuv tsi ua le ntawd; kuv tsaa nwg ua tug kaav taagnrho kuv tsaav tuabneeg Yixalayees.

⁸Yog le ntawd, kuv txhaj nrug nwg thaam tim ntsej tim muag meej nplhav tsi yog ua npau suav xwb; nwg yeej pum kuv tug dluab lawm! Vim le caag meb yuav has lug saib tsi taug kuv tug tubkhai Mauxes le?”

⁹Tug TSWV chim heev rua obtug; hab nwg txawm ncaim obtug moog lawm,

¹⁰tauv fuab txawm tshem ntawm lub Tsevntaub sis ntsib moog lawm hab. Taamsim ntawd Milias lub cev ca le mob ruas thoob plawg hab dlawb paug ib yaam le te. Thaus Aloos tig saib Milias hab pum nwg mob ruas thoob plawg ib ce lawm,

¹¹Aloos has rua Mauxes has tas, “Thov lauj, kuv tug tswv, thov tsi xob rau txim nyaav npaum le nuav rua wb, vim wb tau ua tej yaam ruag le nuav.

¹²Thov tsi xob ca nwg zoo le tug mivnyuas kws yug tau huv nwg nam plaab lug tub tuag hab ib nraab nqaj lwj taag lawm.”

¹³Yog le ntawd, Mauxes txhaj quaj thov tug TSWV has tas, “Vaajtswv, thov koj khu Milias lauj!”

¹⁴Tug TSWV teb has tas, “Yog nwg txiv ntu quavncaug rua nwg lub ntsejmuag, nwg yuav ris kev txaajmuag xyaa nub. Ca le ntab kuas nwg tawm huv lub yeej nuav moog nyob saab nrau xyaa nub, hab tom qaab ntawd maam coj nwg rov lug rua huv lub yeej.”

¹⁵Milias raug ntab tawm moog rua saab nrau ntug yeej xyaa nub, cov tuabneeg txhaj tsi tau sawv kev moog txug thaus kws coj Milias rov lug rua huv lub yeej.

¹⁶Ces puab maam le sawv kev tawm huv Haxelaus moog tsuam yeej nyob rua ntawm lub taj mojsaab qhua Palaas.