Read Hmong Njua Teev Npe 21 Bible Online

Teev Npe 21 - Hmong Njua bible

Teev Npe 21

¹Thaus cov Kana-aas tug vaajntxwv kws kaav lub nroog Aladis huv tebchaws Kana-aas saab qaabteb nov has tas, cov Yixalayees taabtom taug txujkev Athalis lug lawm, nwg txawm txhij tubrog moog tua puab hab nteg tau cov Yixalayees qee leej coj moog ua qhev.

²Ces cov Yixalayees txhaj coglug rua tug TSWV has tas, “Yog koj pub peb tua yeej cov tuabneeg nuav, peb yuav muab puab hab puab tej nroog fij hlo rua koj, hab peb yuav muab puab ua kuas puamtsuaj taag huv tuabsi.”

³Tug TSWV nov puab tej lug thov, hab nwg paab puab tua yeej cov Kana-aas. Vim le nuav cov Yixalayees txhaj muab cov Kana-aas hab puab tej nroog ua puamtsuaj taag, hab muab qhov chaw ntawd tis npe hu ua Haulemas.

⁴Cov Yixalayees sawv kev ntawm lub Roob Haules moog rua nraag Havtxwv Akanpas, puab yuav zos kev ncig lub tebchaws Edoos. Tabsis thaus puab tseem taabtom taug kev moog ntawd, puab ua tsi taug sab ntev nyaj kev txomnyem,

⁵puab txawm tshev Vaajtswv hab Mauxes. Puab ywg has tas, “Vim le caag meb txhaj coj peb tawm nraag tebchaws Iziv lug kuas peb tuag taag rua huv taj suabpuam, qhov chaw kws tsi muaj mov noj hab tsi muaj dlej haus nuav? Peb noj tsi taug tej zaub mov zoo le nuav lawm!”

⁶Ces tug TSWV txhaj tso cov naab muaj taug lug rua huv cov Yixalayees, cov Yixalayees coob leej txhaj raug naab tum tuag lawm.

⁷Cov pejxeem txhaj tuaj cuag Mauxes hab has tas, “Thaus peb tshev tug TSWV hab tshev koj, tub yog peb ua txhum ntaag. Nwgnuav thov koj thov tug TSWV muab cov naab nuav tshem tawm moog.” Yog le ntawd, Mauxes txhaj thov tug TSWV paab cov pejxeem.

⁸Tug TSWV kuas Mauxes muab tooj nchuav ua ib tug naab hab muab moog ntsa rua ntawm ib tug ncej, yog naab tum leejtwg, kuas tug ntawd tsaa qhovmuag saib tug naab tooj ntawd nwg txhaj tsi tuag.

⁹Mauxes txawm nchuav tau ib tug naab tooj hab muab ntsa rua sau ib tug ncej. Thaus naab tum leejtwg, yog nwg tsaa qhovmuag saib tug naab tooj ntawd, nwg txawm tsi tuag.

¹⁰Cov Yixalayees moog tsuam yeej rua ntawm Aunpaus.

¹¹Ces puab sawv kev ntawm Aunpaus moog tsuam yeej rua ntawm Anpalees kws nyob huv lub taj suabpuam ntawm tebchaws Mau-am saab nubtuaj.

¹²Puab sawv kev ntawm qhov chaw ntawd moog tsuam yeej rua huv lub Haav Zeles.

¹³Puab sawv kev qhov ntawd hab moog tsuam yeej rua ntawm tug Dlej Alenoos saab qaumteb, ntawm lub taj suabpuam kws moog tshuam rua tebchaws Amaules. (Tug dlej Alenoos, yog tug nrim rua lub tebchaws Mau-am hab lub tebchaws Amaules.)

¹⁴Tub yog le nuav, phoo ntawv kws teev tug TSWV tej kev ua rog txhaj le has txug: “…lub zog Vahes kws nyob huv cheebtsaam Xufas, huv tej haav ntawm tug dlej Alenoos,

¹⁵hab tej kwj haa kws nqeg moog rua nraag lub zog Ales hab ndlwg moog tshuam rua nraag nrimteb Mau-am.”

¹⁶Puab sawv kev qhov ntawd moog txug rua ntawm ib qhov chaw hu ua tej Qhov Tshij, yog qhov chaw kws tug TSWV has rua Mauxes has tas, “Coj cov pejxeem tuaj ua ke, hab kuv yuav muab dlej rua puab haus.”

¹⁷Lub sijhawm ntawd, cov Yixalayees zoo sab heev hab hu zaaj nkauj nuav: “Tej qhov tshij, mej ca le txhawv dlej laub lug tawm lug; Hab peb yuav zoo sab hu nkauj tog cov dlej ntawd.

¹⁸Lub qhov tshij nuav yog cov numtswv hab cov pejxeem tej thawjcoj khawb, yog siv vaajntxwv tug cwj hab puab tej paas nreg khawb ntaag.” Ces puab txhaj sawv kev ntawm taj suabpuam moog rua ntawm Matanas,

¹⁹hab sawv kev ntawm Matanas moog rua ntawm Nahaliyees, hab sawv kev ntawm Nahaliyees moog rua ntawm Npamaus,

²⁰hab sawv kev ntawm Npamaus moog rua ntawm lub haav kws nyob huv tebchaws Mau-am. Qhov chaw ntawd nyob sau lub ncov Roob Pinkas, xyuam yaaj lug saib ntsoov rua tim taj suabpuam.

²¹Cov Yixalayees tso tuabneeg moog thov cov Amaules tug vaajntxwv Xihoos has tas:

²²“Thov pub peb hlaa mej lub tebchaws moog. Peb hab peb tej tsaj yuav tsi plos moog tsuj huv mej tej teb lossis mej tej vaaj txiv maab, hab peb yuav tsi haus tej dlej huv mej tej qhov tshij; peb yuav taug txujkev luj ncaaj nraim moog kuas dlhau plawg mej cheebtsaam aav.”

²³Tabsis Xihoos tsi pub cov Yixalayees hlaa nwg lub tebchaws moog. Nwg txhaj txhij nwg cov tubrog moog rua ntawm Yahas kws nyob tom taj suabpuam hab moog puav tua cov Yixalayees.

²⁴Tabsis cov Yixalayees tua cov yeebncuab tuag coob heev rua huv tshaav rog hab txeeb tau puab lub tebchaws txij kag ntawm tug Dlej Alenoos saab qaumteb moog txug ndlua rua tim Yanpaus, hab dlhau plawg moog rua tim tebchaws Amoos, rua qhov cov tubrog Amoos kws zuv ntawm nrimteb sab tawv hab zuv nruj heev.

²⁵Yog le ntawd cov Yixalayees txhaj txeeb tau taagnrho cov Amaules tej nroog, hab tseem txeeb tau lub tuamceeb nroog Hesenpoos hab tej nroog miv kws nyob ibncig ntawd huv tuabsi. Puab txhaj moog nyob puv nkaus rua huv tej nroog ntawd.

²⁶Hesenpoos yog lub tuamceeb nroog kws yog cov Amaules tug vaajntxwv Xihoos nyob ntaag, hab nwg yog tug kws ntxeev sab ua rog tawmtsaam cov Mau-am tug vaajntxwv qub thaus u hab txeeb tau taagnrho Mau-am lub tebchaws moog txug ndlua ntawm tug Dlej Alenoos.

²⁷Tub yog vim le ntawd, cov hu nkauj txhaj le hu zaaj nkauj nuav: “Ca le lug rua huv lub nroog Hesenpoos kws yog vaajntxwv Xihoos lub nroog! Peb xaav pum lub nroog ntawd rov txhim khu dlua tshab.

²⁸Xihoos cov tubrog tawm huv lub nroog Hesenpoos tuaj moog ib yaam le cov nplaim tawg; mas nwg rhuav lub nroog Ales huv lub tebchaws Mau-am hab nqog taagnrho tej hauv roob peg Alenoos.

²⁹Cov Mau-am, mej yuav raug txomnyem lauj! Mej pe tug mlom Khemaus kws taabtom coj kev puamtsuaj lug! Mej tug vaajtswv yuav coj cov txivneej moog poob kev txomnyem, hab cov quaspuj yuav raug cov Amaules tug vaajntxwv Xihoos nteg coj moog.

³⁰Tabsis taamsim nuav peb tub muab puab cov xeebntxwv tua puamtsuaj taag, Txij ndlua tom Hesenpoos lug txug ndlua ntawm Dinpoos, hab pib kag tom Nasees moog ti nkaus rua tim Naufas kws ze rua ntawm Medenpas.”

³¹Yog le ntawd, cov Yixalayees txhaj le moog nyob puv nkaus rua huv tebchaws Amaules,

³²Mauxes tso tuabneeg moog soj hab tua lub nroog Yaxes. Cov Yixalayees txeeb tau lub nroog ntawd nrug tej zog kws nyob ibncig, hab muab cov Amaules kws nyob huv tej zog ntawd lawv tawm tsiv huv tuabsi lawm.

³³Cov Yixalayees tig rov lug hab taug kev moog rua tom lub zog Npasaas. Tug vaajntxwv kws kaav lub tebchaws Npasaas txhaj txhij nwg cov tubrog nrug nwg moog tua cov Yixalayees rua tom Edele-is.

³⁴Tug TSWV has rua Mauxes has tas, “Mej tsi xob ntshai Aunkas. Kuv yuav pub kuas mej tua yeej nwg, yeej taagnrho nwg cov tuabneeg hab nwg lub tebchaws huv tuabsi. Mej yuav ua rua nwg ib yaam le mej ua rua Xihoos kws yog tug vaajntxwv kaav lub nroog Hesenpoos hab ntaag.”

³⁵Yog le ntawd, cov Yixalayees txhaj muab Aunkas, nwg cov tub hab taagnrho nwg cov tuabneeg tua tuag taag tsi tshuav ib tug seem le, hab cov Yixalayees tau lug nyob nwg lub tebchaws.