Read Hmong Njua Teev Npe 24 Bible Online

Teev Npe 24 - Hmong Njua bible

Teev Npe 24

¹Zag nuav Npala-aas paub has tas, Vaajtswv xaav kuas nwg foom koob moov rua cov Yixalayees, yog le ntawd nwg txhaj tsi moog tsawv moov, ib yaam le nwg tau ua taag lug lawm. Nwg tig hlo xubndlag moog rua tim taj suabpuam,

²hab pum cov Yixalayees tsaa tsevntaub nyob ib xeem quas ib xeem. Vaajtswv tug ntsujplig tshoov Npala-aas sab,

³nwg txhaj cevlug has tas: “Tej lug tseemceeb nuav yog Npe-aus tug tub Npala-aas has, yog tug txivneej kws pum qhov tseeb tej lug.

⁴Kuv yog tug nov Vaajtswv tej lug, kuv yog tug kws qhovmuag rua plav pum ntsoov tej kws Vaajtswv tug kws muaj fwjchim luj kawg nkaus ua rua kuv pum.

⁵Cov Yixalayees tej tsevntaub zoo nkauj kawg le.

⁶Zoo ib yaam le tej leej toovlaaj kws nplooj npug luas Lossis zoo ib yaam le tej vaaj zaub kws nyob lawv ntug dlej, zoo ib yaam le tsob ntoo tsw qaab kws tug TSWV cog tseg lossis zoo le tej ntoo cab kws tuaj ntawm ntug dlej.

⁷Puab lub tebchaws yuav muaj dlej naag nplua mag hab puab yuav cog tej noob qoob rua thaaj teb kws aav noo zaws. Puab tug vaajntxwv muaj fwjchim heev dlua Vaajntxwv Ankas, hab nwg yuav kaav lub tebchaws nthuav moog dleb hab dlaav zuj zug.

⁸Vaajtswv coj puab nraag tebchaws Iziv lug, Nwg paab puab tawmtsaam yeebncuab ib yaam le tug phaws nyuj qus. Puab rhuav cov yeebncuab, tsoo puab cov yeebncuab tej pobtxhaa muab yeebncuab tej xub nee luv taag.

⁹Tsaav tuabneeg nuav zoo ib yaam le tug tsuv ntxhuav kws muaj zug heev; thaus nwg pw tsaug zug lawm, tsi muaj leejtwg tsaa tau nwg sawv. Tug kws foom koob moov rua cov Yixalayees, tug ntawd yuav tau koob moov, hab tug kws foom tsi zoo rua cov Yixalayees, tug ntawd yuav raug foom tsi zoo.”

¹⁰Npalaj sawv tseeg nyem nrig npautawg vog hab has rua Npala-aas has tas, “Kuv coj koj tuaj ntawm nuav, yog coj tuaj foom tsi zoo rua kuv cov yeebncuab, tabsis koj tsi foom phem rua puab, koj ca le foom koob moov rua puab peb zag rua zag nuav lawm.

¹¹Koj ca le rov moog tsev taamsim nuav! Kuv yeej coglug muab nqe zug rua koj, tabsis tug TSWV txwv tsi pub koj yuav tej nqe zug nuav.”

¹²Npala-aas teb has tas, “Kuv tub yeej has rua koj cov tuabneeg kws koj khaiv tuaj hu kuv lawm,

¹³txawm yog koj yuav muab taagnrho tej nyaj tej kub huv koj lub txhaab nyaj rua kuv los kuv yeej tsi muaj cuabkaav ua ib yaam dlaabtsi le, yog tej ntawd yuav ua rua kuv hlaa tug TSWV tej lug. Kuv tsuas muaj cuabkaav has tej lug kws tug TSWV kuas kuv has xwb.”

¹⁴Npala-aas has rua Npalaj has tas, “Nwgnuav kuv yuav rov moog cuag kuv tsaav tuabneeg, tabsis ua ntej kuv yuav sawv kev moog, kuv qha rua koj has txug tej kws yaav tom ntej cov Yixalayees yuav ua rua koj tsaav tuabneeg.”

¹⁵Ces Npala-aas txhaj cevlug has tas, “Tej lug tseemceeb nuav yog Npe-aus tug tub Npala-aas has, tej lug nuav yog tug txivneej kws pum qhov tseeb has.

¹⁶Kuv yog tug nov Vaajtswv tej lug, hab khaws nkaus Vaajtswv tug kws muaj fwjchim luj kawg nkaus lub tswvyim rua nruab sab. Kuv yog tug kws lub qhovmuag rua plav saib ntsoov tej kws Vaajtswv tug muaj fwjchim luj kawg nkaus ua rua kuv pum.

¹⁷Kuv pum nwg, tabsis tsi yog taamsim nuav, kuv saib ntsoov nwg, tabsis tsi nyob ze, yuav muaj ib lub nubqub tshwm huv Yakhauj tuaj, yuav muaj ib tug cwj vaajntxwv tshwm huv cov Yixalayees lug. Nwg yuav tsoo cov Mau-am hauvplaj kuas ntsoog, hab yuav ntaus Xej cov tuabneeg kuas swb taagnrho.

¹⁸Nwg yuav tua yeej cov Edoos hab txeeb tau nwg cov yeebncuab lub tebchaws lug ua nwg tug; ces cov Yixalayees yuav muaj yeej luj zuj zug.

¹⁹Cov Yixalayees yuav sawv lug tswj teb kaav chaw; hab yuav tua cov tuabneeg kws seem huv tej nroog kuas tuag taag.”

²⁰Nyob huv Npala-aas zaaj ywgtoog, mas nwg pum cov Amalej, nwg txhaj cevlug has tas: “Cov Amalej yog tsaav tuabneeg kws muaj fwjchim luj dlua ndlais huv tuabsi, Tabsis thaus kawg tsaav tuabneeg nuav yuav raug kev puamtsuaj taag.”

²¹Nyob huv Npala-aas zaaj ywgtoog, mas nwg pum cov Kenais, nwg txhaj cevlug has tas: “Mej tej chaw nyob ruaj khov kho tso sab lug ib yaam le tej zeg noog kws nyob sau tej hauv tsua kws sab tshaaj plawg,

²²Tabsis cov Kenais, mej yuav raug kev puamtsuaj, thaus cov Axilias tuaj nteg tau mej lawm.”

²³Npala-aas cevlug dlua has tas: “Tuag lauj, yog Vaajtswv ua tej nuav, leejtwg tseem yuav muaj sa nyob hab?

²⁴Cov tuabneeg kws tuaj txeeb yuav tsaav nkoj tim Xaipas tuaj; puab yuav tua yeej cov Axilias hab cov Enpes, tabsis thaus kawg, puab yuav tuag tu noob nrho.”

²⁵Ces Npala-aas txawm tu nraa hab sawv kev rov qaab moog tsev lawm, Npalaj los kuj sawv kev rov qaab lug tsev lawm hab.