Read Hmong Njua Teev Npe 27 Bible Online

Teev Npe 27 - Hmong Njua bible

Teev Npe 27

¹Malas, Nau-es, Haunkelas, Milekas hab Tilexas, puavleej yog Hefeles tug tub Xelaufehas cov ntxhais, (Xelaufehas yog Hefeles tub, Hefeles yog Nkele-as tub, Nkele-as yog Makis tub, Makis yog Manaxes tub hab Manaxes yog Yauxej tub.)

²Puab moog sawv taabmeeg Mauxes, tug povthawj Ele-axas, cov thawjcoj hab taagnrho cov pejxeem rua ntawm tug TSWV lub Tsevntaub sis ntsib lub qhovrooj hab thov has tas,

³“Peb txiv tuag rua tom taj suabpuam lawm nwg tsi muaj tub le, nwg tsi koom sab nrug Kaulas cov phoojywg ntxeev sab rua tug TSWV; nwg tuag vim nwg tej kev txhum nkaus xwb.

⁴Tub yog peb txiv tsi muaj ib tug tub, yog le ntawd peb txiv lub npe txawm yuav pluj huv tsaav tuabneeg Yixalayees moog le los? Thov muab peb txiv tej qubtxeeg qubteg ntawm nwg cov kwvtij lug faib rua peb hab.”

⁵Mauxes coj puab tej lug moog has rua tug TSWV,

⁶ces tug TSWV has rua Mauxes has tas,

⁷“Xelaufehas cov ntxhais tej lug thov yeej yog lawm; koj ca le muab tej qubtxeeg qubteg ntawm puab txiv cov kwvtij lug rua puab. Ca puab yuav puab txiv tej qubtxeeg qubteg ntawd.

⁸Qha rua cov Yixalayees has tas yog thaus ib tug txivneej twg tuag lawm, nwg tsi muaj tub lug tuav nwg tej qubtxeeg qubteg, nwg tug ntxhais yog tug lug tuav nwg tej qubtxeeg qubteg ntaag.

⁹Yog nwg tsi muaj ntxhais le hab, maam le ca nwg cov kwvtij tuav nwg tej qubtxeeg qubteg.

¹⁰Yog nwg tsi muaj kwvtij le, nwg txiv cov kwvtij yog cov tuav nwg tej qubtxeeg qubteg ntawd.

¹¹Yog nwg tsi muaj kwvtij lossis txiv ntxawm lossis yawm laug le, ces nwg tej kwvtij txheeb ze yog cov tuav nwg tej qubtxeeg qubteg. Cov Yixalayees yuavtsum ceev zaaj nuav ua ib txuj kevcai rua puab suavdlawg coj, lawv le kuv kws yog tug TSWV tau has rua koj lawm.”

¹²Tug TSWV has rua Mauxes has tas, “Koj ca le moog rua sau lub Roob Anpalees hab tuaj sau saib lub tebchaws kws kuv yuav muab rua cov Yixalayees nyob.

¹³Tom qaab kws koj saib taag, koj yuav tuag moog ib yaam le koj tug tijlaug Aloos.

¹⁴Rua qhov meb ob kwvtij ntxeev sab rua kuv tej lug saamfwm nraag taj suabpuam Xees. Thaus cov pejxeem ywg kuv nraag Melinpas, meb tsi kaam ua kuv lub fwjchim kws luj kawg nkaus taabmeeg rua puab pum.” (Melinpas yog lub npe qhovdlej txhawv kws nyob huv lub nroog Kades nraag taj suabpuam Xees.)

¹⁵Mauxes thov Vaajtswv has tas,

¹⁶“Tug TSWV, Vaajtswv kws yog tug tuav suavdlawg txujsa hab ib puas tsaav yaam huv tuabsi, kuv thov koj tsaa ib tug lug ua tug coj cov tuabneeg nuav,

¹⁷hab coj puab moog ntaus rog, kuas koj tsaav tuabneeg txhaj yuav tsi zoo le paab yaaj kws tsi muaj tug tswv yug.”

¹⁸Tug TSWV has rua Mauxes has tas, “Koj ca le moog coj Noos tug tub Yausuas kws yog tug tuabneeg thoob tsib to nrog tuaj, hab tsaa koj txhais teg rua sau nwg taubhau.

¹⁹Kuas nwg tuaj sawv taabmeeg tug povthawj Ele-axas hab cov pejxeem, hab tsaa nwg ua tug hloov koj chaw taabmeeg suavdlawg.

²⁰Muab koj lub fwjchim faib rua nwg, kuas cov Yixalayees txhaj yuav fwm nwg.

²¹Yausuas yuav nrug tug povthawj Ele-axas siv lub Ulees hab lub Thumees. Ua le nuav Ele-axas txhaj qha tau rua Yausuas hab cov Yixalayees ua hum tug TSWV sab.”

²²Mauxes ua lawv le tug TSWV has rua nwg. Nwg txhaj coj Yausuas moog sawv taabmeeg tug povthawj Ele-axas hab cov pejxeem Yixalayees.

²³Mauxes tsaa nwg ob txhais teg rua sau Yausuas taubhau hab tsaa Yausuas ua tug hloov Mauxes chaw, lawv le tug TSWV tau has rua Mauxes lawm.