Read Hmong Njua Teev Npe 4 Bible Online

Teev Npe 4 - Hmong Njua bible

Teev Npe 4

¹Tug TSWV has rua Mauxes hab Aloos has tas,

²“Meb yuavtsum sau cov Levis kws yog cuab Kauhas tej npe lawv le tej tsev tuabneeg,

³ca le sau taagnrho cov txivneej kws noobnyoog peb caug xyoo moog rua tsib caug xyoo npe, kuas puab tuaj ua num ntawm tug TSWV lub Tsevntaub sis ntsib.

⁴Ntawm nuav yog cuab Kauhas teg num kws nyob huv tug TSWV lub Tsevntaub sis ntsib: puab yog cov tu txhua yaam khoom kws dlawbhuv.

⁵“Thaus twg txug sijhawm mej lauj lub yeej mas yuavtsum ca Aloos hab nwg cov tub moog rua huv lub Tsevntaub, moog txu dlaim ntaub thaiv lub Phijxaab kws ntim Vaajtswv tej lug cog tseg, hab muab dlaim ntaub ntawd npug lub Phijxaab tsaiv.

⁶Puab yuavtsum muab ib dlaim tawv tsaj kws zoo heev lug npug thoob plawg lub Phijxaab, hab muab ib dlaim ntaub xav npug tshooj rua sau hab muab ob tug laag kwv ntxig rua.

⁷“Puab yuavtsum muab ib dlaim ntaub xav nthuav npug lub rooj kws rau ncuav fij rua tug TSWV hab muab tej twj taig tso rua sau, cov taig phab rau moov tshuaj tsw qaab, cov taig phab rau khoom fij, hab lub hub ntim cawv txiv maab ua khoom fij. Cov ncuav yuavtsum tso rua sau lub rooj taag moog le.

⁸Kuas puab muab ib dlaim ntaub lab nthuav npug cov ncuav, hab muab ib dlaim tawv tsaj kws zoo heev nthuav npug tshooj rua sau dlaim ntaub, hab muab ob tug laag kwv ntxig rua.

⁹“Kuas puab muab ib dlaim ntaub xav nthuav khwb tug ncej txawb teeb hab cov teeb, cov txab txav teebxeeb hab cov roj kws saam teeb.

¹⁰Hab kuas puab muab tej khoom siv rua lub teeb, qhwv ua ib pob hab muab ib dlaim tawv tsaj kws zoo heev qhwv tuaj saab nrau hab muab tso rua sau ob tug laag.

¹¹“Puab yuavtsum muab ib dlaim ntaub xav nthuav npug lub thaaj kub, muab ib dlaim tawv tsaj kws zoo heev npug tshooj rua sau hab, ces muab ob tug laag kwv ntxig rua.

¹²Puab yuavtsum muab taagnrho cov cuabyeej siv huv Chaav Dlawbhuv qhwv ua ib pob tso rua sau dlaim ntaub xav, muab ib dlaim tawv tsaj kws zoo heev qhwv tuaj saab nrau, hab muab tso rua sau ob tug laag kws kwv lub thaaj kub ntawd.

¹³Puab yuavtsum muab cov tshauv kws ntub roj sau lub thaaj laub tawm hab muab ib dlaim ntaub paajyeeb nthuav vuv lub thaaj.

¹⁴Ces puab muab tej cuabyeej siv coj moog tso huv tuabsi rua sau lub thaaj: cov laujkaub rau ncaig tawg, cov nqailauj, cov dluav hab cov taig tooj. Ces puab yuavtsum muab ib dlaim tawv tsaj kws zoo heev lug npug lub thaaj hab muab ob tug laag kwv ntxig rua.

¹⁵Thaus lub sijhawm kws puab lauj lub yeej yuav tshais chaw, puab yuavtsum ca cuab Kauhas lug ua cov kwv tej khoom dlawbhuv kws Aloos hab nwg cov tub, tub muab qhwv tau taag lawm. Cov Kauhas yuavtsum tsi xob tuav tej khoom dlawbhuv ntawd hlo le, yog puab kov, puab yuav raug tua tuag. “Tej kws has taag lug nuav yog cuab Kauhas lub luag num kws yog thaus muab tug TSWV lub Tsevntaub sis ntsib tshais chaw coj tawm moog.

¹⁶“Eli-axas kws yog Aloos tug tub lub luag num, yog ua tug saib lub Tsevntaub sis ntsib hab tej roj saam teeb, tej moov tshuaj tsw qaab, tej moov nplej kws coj tuaj fij, tej roj txhawb meejthawj hab txhua yaam khoom dlawbhuv huv lub Tsevntaub sis ntsib kws tub muab fij rua tug TSWV lawm.”

¹⁷Tug TSWV has rua Mauxes hab Aloos has tas,

¹⁸“Tsi xob ca cuab Kauhas raug tua tuag taag huv xeem Levis moog.

¹⁹Qhov kws puab yuav tsi raug tua tuag, thaus puab moog ze tej khoom dlawbhuv tshaaj plawg, mas ua le nuav: kuas Aloos hab Aloos cov tub moog qha saib tug twg yog tug kwv yaam twg, ces nwg tsuas kwv yaam ntawd xwb.

²⁰Yog cov Kauhas nkaag moog huv lub Tsevntaub hab saib cov povthawj tu tej khoom dlawbhuv kws coj tshais chaw tawm moog ntawd, mas puab yuav raug tua tuag.”

²¹Tug TSWV has rua Mauxes has tas,

²²“Koj ca le sau cov Levis kws yog cuab Nkesoos tej npe lawv le puab tej tsev tuabneeg,

²³hab sau txhua tug txivneej kws noobnyoog peb caug xyoo moog txug tsib caug xyoo, kuas puab tuaj ua num ntawm tug TSWV lub Tsevntaub sis ntsib.

²⁴Puab lub luag num yog yuavtsum kwv tej khoom le nraag qaab nuav:

²⁵lub Tsevntaub sis ntsib, dlaim ntaub vuv saab huv nruab nrog, dlaim ntaub vuv saab nrau, dlaim tseem tawv tsaj kws vuv tuaj sau, dlaim ntaub thaiv qhovrooj,

²⁶cov ntaub xov lub tshaav puam kws ncig lub Tsevntaub sis ntsib hab lub thaaj, dlaim ntaub roojvaag ntawm lub tshaav puam, cov hlua hab txhua yaam khoom kws siv rua lub Tsevntaub. Puab yuavtsum ua txhua yaam num nuav kuas tav.

²⁷Mauxes hab Aloos obtug yuavtsum saib cov Nkesoos ua tej num nuav hab kwv txhua yaam kws Aloos hab nwg cov tub muab cob rua puab lawm.

²⁸Qhov nuav yog teg num kws cov Nkesoos yuavtsum ua huv tug TSWV lub Tsevntaub sis ntsib, puab kwv txhua yaam lawv le tug povthawj Ithamas kws yog Aloos tug tub qha rua puab lawm.”

²⁹Tug TSWV has kuas Mauxes sau cov Levis kws yog cuab Melalis tej npe lawv le puab tej tsev tuabneeg,

³⁰hab sau txhua tug txivneej kws noobnyoog peb caug xyoo moog rua tsib caug xyoo tej npe, kuas puab tuaj ua num ntawm tug TSWV lub Tsevntaub sis ntsib.

³¹Hab ntawm nuav yog lub luag num kws puab ua ntawm tug TSWV lub Tsevntaub sis ntsib: puab kwv tej nqaaj, tej ncej, tej tag taw xov lub Tsevntaub,

³²tej ncej laajkaab, tej nqaaj, tej ntsa hab tej hlua paav laajkaab kws xov lub taj tshaav puam ncig lub Tsevntaub, hab txhua yaam khoom siv rua tej ntawd. Yog faib yaam twg rua tug twg kwv, nwg tsuas kwv yaam ntawd xwb.

³³Qhov nuav yog teg num kws cov Melalis yuavtsum ua rua ntawm tug TSWV lub Tsevntaub sis ntsib; puab yuav kwv tej khoom ntawd tawm moog lawv le tug povthawj Ithamas kws yog Aloos tug tub qha kuas puab kwv.

³⁴Mauxes, Aloos hab cov thawjcoj ntawm cov pejxeem suav cuab Kauhas lawv le puab cov yawmkoob tej tsev tuabneeg npe.

³⁵Suav taagnrho cov txivneej kws noobnyoog peb caug xyoo moog txug tsib caug xyoo kws puab tuaj ua num ntawm tug TSWV lub Tsevntaub sis ntsib,

³⁶hab suav taagnrho puab tej tsev tuabneeg, muaj ob txheeb xyaa pua tsib caug leej.

³⁷Taagnrho cov kws sau tau npe ntawd puavleej yog cuab Kauhas xwb, puab yog cov ua num ntawm tug TSWV lub Tsevntaub sis ntsib, Mauxes hab Aloos sau puab npe lawv le tug TSWV saamfwm tseg lawm.

³⁸Suav cuab Nkesoos lawv le puab cov yawmkoob tej tsev tuabneeg npe,

³⁹taagnrho cov txivneej kws noobnyoog peb caug xyoo moog txug tsib caug xyoo kws tuaj ua num ntawm tug TSWV lub Tsevntaub sis ntsib,

⁴⁰muaj ob txheeb rau pua peb caug leej.

⁴¹Taagnrho cov kws suav tau npe ntawd puavleej yog cuab Nkesoos xwb, puab yog cov ua num ntawm tug TSWV lub Tsevntaub sis ntsib, Mauxes hab Aloos sau puab npe lawv le tug TSWV tau saamfwm tseg lawm.

⁴²Suav cuab Melalis lawv le puab cov yawmkoob tej tsev tuabneeg npe,

⁴³taagnrho cov txivneej kws noobnyoog peb caug xyoo moog txug tsib caug xyoo kws tuaj ua num ntawm tug TSWV lub Tsevntaub sis ntsib,

⁴⁴muaj peb txheeb ob puas leej.

⁴⁵Taagnrho cov kws suav tau npe ntawd puavleej yog cuab Melalis kws Mauxes hab Aloos sau puab tej npe lawv le tug TSWV tau saamfwm tseg lawm.

⁴⁶Yog le ntawd, Mauxes, Aloos hab cov Yixalayees tej thawjcoj txhaj sau taagnrho cov Levis txhua cuab hab txhua yim tuabneeg npe.

⁴⁷Txhua tug txivneej kws noobnyoog peb caug xyoo moog txug tsib caug xyoo txhaj tau tuaj ua num hab ua cov kwv tug TSWV lub Tsevntaub sis ntsib,

⁴⁸cov kws suav tau npe lawm muaj yim txheeb tsib puas yim caum leej.

⁴⁹Txhua tug txivneej puavleej tuaj sau npe lawv le tug TSWV tau saamfwm rua Mauxes lawm; faib num rua txhua tug yog leejtwg ua yaam twg lossis kwv yaam twg, nwg tsuas ua yaam ntawd lossis kwv yaam ntawd xwb.