Read Hmong Njua Mikhas 1 Bible Online

Mikhas 1 - Hmong Njua bible

Mikhas 1

¹Ntu kws Yauthaas, Ahas hab Hexekiyas ua vaajntxwv kaav tebchaws Yudas, tug TSWV tau has tej lug nuav rua Mikhas kws yog tug cev Vaajtswv lug kws nyob rua huv lub nroog Mauleses. Tug TSWV qha txhua yaam nuav rua Mikhas txug lub nroog Xamalis hab lub nroog Yeluxalees.

²Txhua tsaav tuabneeg, mej ca le noog tej lug nuav; Txhua tug tuabneeg kws nyob huv nplajteb mej ca le noog tej lug nuav; Tug TSWV kws kaav ib puas tsaav yaam yuav ua timkhawv tawmtsaam mej. Ca le noog! Nwg has tej lug nuav huv nwg lub Tuamtsev sau ntuj tuaj.

³Tug TSWV taabtom nqeg sau nwg lub chaw kws dlawbhuv lug; nwg yuav nqeg hab taug kev sau tej ncov roob lug.

⁴Ces tej hauv roob yuav yaaj huv nwg qaab xibtaws ib yaam le muab cab ntaab sub sau suavtawg; tej hauv roob yuav ndlwg laub lug, lug rua huv tej haav ib yaam le dlej ndlwg sau tej ncov roob lug.

⁵Txhua yaam nuav yuav muaj tshwmsim lug vim cov Yixalayees tau ua txhum luj heev hab tau ntxeev sab rua Vaajtswv. Leejtwg yog tug kws ua rua cov Yixalayees ntxeev sab? Tub yog cov tuabneeg huv lub nroog Xamalis ntaag! Leejtwg tau pe mlom huv tebchaws Yudas? Tub yog cov tuabneeg huv lub nroog Yeluxalees ntaag!

⁶Yog le ntawd tug TSWV txhaj has tas, “Kuv yuav ua kuas lub nroog Xamalis puamtsuaj taag ua ib pawg rua huv taj nraag hab ua chaw rua luas cog txiv maab. Kuv yuav muab lub nroog ntawd tej thwvcib nchuav rua huv kwj haa, tsuas tseg tej dlaim txag zeb kws pua lub nroog lawm xwb.

⁷Lub nroog ntawd tej mlom yuav raug luas muab tsoo tawg ntsoog ntxawg; txhua yaam kws tuabneeg nqaa tuaj fij rua huv lub tsev namndlav yuav kub nyab, hab lub nroog ntawd tej mlom yuav raug rhuav kuas puamtsuaj taag. Lub nroog Xamalis muab tej ntawd lug teev lug pe, tabsis nwgnuav nwg cov yeebncuab yuav tuaj nqaa tej ntawd coj moog teev rua huv lwm lub tsev namndlav.”

⁸Mikhas has tas, “Vim tej xwm nuav kuv txhaj ntxhuv sab hab quaj ntsuag. Kuv yuav moog kutaw dlo hab labqaab moog qha rua suavdlawg paub kuv tej kev nyuaj sab. Kuv yuav tsaa suab hlo quaj ib yaam le tug maa nqov ntuj, hab quaj seev quas yeeg ib yaam le tug noog ntxhuav quaj.

⁹Vim tsi muaj tuabneeg khu tau Xamalis tej qhov txhaab, hab Yudas yuav raug kev txomnyem ib yaam nkaus le ntawd; kev puamtsuaj tub tuaj ti ntawm lub nroog Yeluxalees tej roojvaag kws kuv tsaav tuabneeg nyob lawm.”

¹⁰Tsi xob qha rua peb cov yeebncuab kws nyob huv lub nroog Nkathas paub has tas peb swb lawm; tsi xob ca puab pum mej quaj ntsuag. Cov tuabneeg Npes-Le-afalas, mej ca le quaj dlaa huv aav qha has tas mej taag kev ca sab lawm!

¹¹Cov tuabneeg kws nyob huv lub nroog Safis raug luas nteg coj labqaab ploog moog hab txaajmuag ntsuav. Cov tuabneeg kws nyob huv Xa-anaas yuav tsi muaj cuabkaav tawm huv puab lub nroog moog rua saab nrau. Thaus mej nov cov tuabneeg huv Npethexees nyav, mej yuav paub has tas tsi muaj chaw cawm sav nyob qhov twg lawm.

¹²Cov tuabneeg kws nyob huv Malaus ua neej nyob lwj sab ntsuav tog nrhw txujkev cawm dlim rua qhov tug TSWV tub tso txujkev puamtsuaj tuaj ti lub nroog Yeluxalees lawm.

¹³Mej cov kws nyob huv lub nroog Lakhis, ca le muab neeg lug hai tej tsheb neeg ua rog. Mej nyam ua txhum ib yaam le cov tuabneeg Yixalayees ua txhaj ua rua cov tuabneeg kws nyob huv lub nroog Yeluxalees ua txhum taag.

¹⁴Cov Yudas, taamsim nuav mej ca le tsiv tawm huv lub nroog Mauleses Nkas moog. Cov tuabneeg huv lub nroog Akhaxis yuav tsi tuaj paab cov Yixalayees tej vaajntxwv lawm.

¹⁵Cov Melesas, tug TSWV yuav muab mej cob rua cov yeebncuab kws tuaj txeeb mej lub nroog. Cov Yixalayees tej thawjcoj yuav tsiv moog nkaum rua huv lub qhov tsua ntawm Adulaas.

¹⁶Cov Yudas, mej ca le txav mej tej plaubhau hab quaj nyav mej tej mivnyuas kws mej hlub. Chais mej tej plaubhau kuas dlo dlus ib yaam le taubhau dlaav npoj, rua qhov mej tej mivnyuas yuav raug luas nteg coj moog nyob rua lwm qhov.