Read Hmong Njua Mikhas 4 Bible Online

Mikhas 4 - Hmong Njua bible

Mikhas 4

¹Muaj ib nub tom ntej nuav lub roob kws ua lub Tuamtsev rua sau yuav yog lub kws sab tshaaj cov; nwg tshwm sab dlua txhua lub pov roob huv tuabsi. Ntau tsaav tuabneeg yuav nchuav nthwv tuaj rua ntawm lub roob ntawd,

²hab puab yuav has tas, “Peb ca le nce moog rua sau tug TSWV lub ncov roob, moog rua sau cov Yixalayees tug Vaajtswv lub Tuamtsev. Vaajtswv yuav qha rua peb paub tej kws nwg xaav kuas peb ua; peb yuav taug txujkev kws nwg tau xaiv rua peb lawm. Tug TSWV tej lug qhuab qha taabtom tawm huv Yeluxalees tuaj; nwg tuaj sau lub Roob Xi-oos has rua nwg tsaav tuabneeg.”

³Nwg yuav txav txim rua txhua tsaav tuabneeg rua cov tuabneeg kws muaj fwjchim luj tsi has nyob dleb hab nyob ze. Puab yuav muab puab tej ntaaj ntaus ua khais hab yuav muab puab tej muv ntaus ua lag. Txhua tsaav tuabneeg yuav tseg tsi ua rog hab tsi npaaj sis tua ntxiv lawm.

⁴Txhua tug yuav nyob kaaj sab lug ntawm nyag tej vaaj txiv maab, txiv ncuav pas, hab yuav tsi muaj leejtwg ua rua nwg tau kev txhawj kev ntshai le. Tug TSWV kws muaj Fwjchim Luj kawg nkaus tau coglug tseg le ntawd.

⁵Txhua tsaav tuabneeg nyag pe hab noog nyag tug vaajtswv lug, tabsis peb yuav pe hab noog tug TSWV kws yog peb tug Vaajtswv lug moog ibtxhis tsi kawg.

⁶Tug TSWV has tas, “Thaus txug lub sijhawm lawm, kuv yuav sau taagnrho cov tuabneeg kws kuv tau rau txim rua kuas luas nteg coj moog ua qhev txomnyem ntsuav ntawd rov qaab lug nyob ua ke dlua.

⁷Puab puavleej yog tuabneeg saav ceg hab nyob dleb ntawm puab tej vaaj tse, tabsis kuv yuav tsaa cov tuabneeg kws seem kuas pib ua dlua lub neej tshab, hab puab yuav ua ib tsaav tuabneeg kws muaj fwjchim heev. Kuv yuav nyob sau lub Roob Xi-oos kaav puab suav txij nub ntawd moog ibtxhis le.”

⁸Lub nroog Yeluxalees, koj yog lub nroog kws Vaajtswv zuv rawv tsomkwm nwg tsaav tuabneeg ib yaam le tug tswv yug yaaj kws sawv sau lub chaw tsomfaaj zuv nwg paab yaaj; koj yuav rov tau ua lub tuamceeb nroog rua koj lub tebchaws ib yaam le yaav thaus u.

⁹Vim le caag koj quaj nrov ua luaj? Vim le caag koj raug kev txomnyem npaum nkaus le tug quaspuj kws taabtom yug mivnyuas? Puas yog koj tsi muaj vaajntxwv hab koj cov tuavxaam tuag taag lawm?

¹⁰Cov tuabneeg kws nyob huv Yeluxalees, mej ca le quaj ntswj pis yog hab ntsaaj ib yaam le tug quaspuj kws taabtom yug mivnyuas, rua qhov nwgnuav mej yuav tau tso mej lub nroog tseg hab moog nyob tom tej roob mojsaab. Mej yuav tau moog nyob tim tebchaws Npanpiloos, tabsis tug TSWV yuav paab kuas mej dlim ntawm mej cov yeebncuab.

¹¹Ntau tsaav tuabneeg tau sis sau tuaj tua koj. Puab has tas, “Peb yuavtsum rhuav kuas tau lub nroog Yeluxalees! Peb yuav pum lub nroog nuav raug puamtsuaj lauj!”

¹²Tabsis tej tsaav tuabneeg ntawd tsi paub tej kws tug TSWV xaav. Puab tub tsi paub has tas, tug TSWV sau puab lug ua ke yuav txav txim rua puab ib yaam le luas sau nplej lug tib ca yuav muab ntaus.

¹³Tug TSWV has tas, “Cov tuabneeg kws nyob huv Yeluxalees, mej ca le moog rau txim rua mej cov yeebncuab! Kuv yuav ua kuas mej muaj zug ib yaam le tug txiv nyuj kws muaj txwm kub hlau hab muaj rau tooj. Mej yuav ntaus yeej ntau tsaav tuabneeg hab coj tej nyaj kws puab moog txeeb tau lug, tuaj pub rua kuv kws yog tug TSWV kws kaav lub nplajteb.”