Read Hmong Njua Mikhas 5 Bible Online

Mikhas 5 - Hmong Njua bible

Mikhas 5

¹Cov Yixalayees, ca le txhij mej cov tubrog! Luas tub tuaj vij peb lawm! Luas tub tuaj tawmtsaam cov Yixalayees tug thawjcoj lawm.

²Tug TSWV has tas, “Npelehees Efalathas, koj yog ib lub nroog kws miv tshaaj plawg nyob huv tebchaws Yudas, tabsis kuv yuav tso ib tug thawjcoj lug tshwm rua huv koj lug kaav cov Yixalayees, nwg yeej muaj caajceg sis txuas ua ntu zug thaus u lug.”

³Yog le ntawd tug TSWV yuav muab nwg tsaav tuabneeg tso rua puab cov yeebncuab txhais teg moog txug thaus tug quaspuj suab mivnyuas yug tau nwg tug tub. Ces nwg tsaav tuabneeg kws raug luas nteg moog lawm yuav rov sis sau lug ua ib tsaav tuabneeg dlua.

⁴Thaus nwg lug, tug TSWV kws yog Vaajtswv yuav pub nwg tug zug hab lub fwjchim rua nwg kaav nwg tsaav tuabneeg. Nwg tsaav tuabneeg yuav nyob kaaj sab lug rua qhov txhua tsaav tuabneeg thoob nplajteb yuav leeg has tas, nwg yog tug kws muaj fwjchim luj kawg nkaus,

⁵hab nwg yuav coj txujkev kaaj sab lug rua suavdlawg. Thaus cov Axilias tuaj vij peb lub tebchaws hab hlaa tuaj rua huv peb nrim dlej nrim aav, peb yuav tso peb cov thawj tubrog kws sab tawv tshaaj plawg moog tua puab.

⁶Puab yuav rhu puab tej ntaaj tua yeej lub tebchaws Axilias, lub tebchaws Nilaus hab puab yuav paab kuas peb dlim ntawm cov Axilias kws tuaj tua peb lub tebchaws.

⁷Cov Yixalayees kws seem yuav zoo ib yaam le tej lwg dlej kws tug TSWV tso lug yug ntau tsaav tuabneeg hab zoo ib yaam le cov naag kws lug yug tej qoobloo. Puab yuav vaamkhom Vaajtswv xwb tsi vaamkhom tuabneeg lawm.

⁸Cov seem kws tseem nrug txhua tsaav tuabneeg nyob yuav zoo ib yaam le tug tsuv ntxhuav kws moog nrhav tsaj tum noj huv haav zoov lossis huv tshaav zaub: nwg nkaag moog nyob huv paab yaaj, dlha moog mos paab yaaj, hab muab cov yaaj dlua ua tej dlaim; nyob qhov ntawd yeej tsi muaj kev ca sab rua leejtwg yuav paab tau dlim.

⁹Cov Yixalayees yuav tua yeej puab cov yeebncuab hab ua kuas cov yeebncuab ntawd puamtsuaj taag.

¹⁰Tug TSWV has tas, “Thaus lub sijhawm ntawd kuv yuav caab mej cov neeg moog hab muab tej tsheb neeg rhuav kuas puamtsuaj taag.

¹¹Kuv yuav rhuav mej tej nroog kws nyob huv mej lub tebchaws hab muab mej tej ntsaa yeej tsoo kuas pob puag taag huv tuabsi.

¹²Kuv yuav rhuav tshem mej tej khawvkoob kuas puamtsuaj hab tsi pub mej cov tuabneeg kws saib moov ib tug seem nyob qhov twg le.

¹³Kuv yuav muab tej mlom kws mej pe hab tej ncej zeb kws mej teev tsoo povtseg; mej yuav tsi tau pe tej mlom kws mej txhais teg puab ib zag ntxiv le lawm.

¹⁴Kuv yuav muab tej mlom quaspuj Aselas huv mej lub tebchaws tsoo povtseg hab muab mej tej nroog rhuav kuas puamtsuaj taag.

¹⁵Vim kuv chim heev, kuv yuav ua nruj ua tsiv pauj txhua tsaav tuabneeg kws tsi noog kuv lug.”