Read Hmong Njua Nahus 2 Bible Online

Nahus 2 - Hmong Njua bible

Nahus 2

¹Nineves, koj yuav raug luas tua! lub fwjchim kws yuav tsoo koj tub lug txug lawm; tug tubrog kws tiv thaiv, ca le ua tuab zoo zuv kev! Ca le npaaj tog sis tua!

²(Tug TSWV tub rov txhim khu kuas tsaav tuabneeg Yixalayees tau koob meej ib yaam le yaav thaus u kws puab cov yeebncuab tseem tsi tau tuaj tua puab.)

³Yeebncuab tej tubrog nqaa tej dlaim thaiv nav ntaaj kws lab ploog hab naav tej rig tsho kws lab ploog, Puab yeej npaaj txhij tuaj ua rog lawm! Puab tej tsheb neeg ntaus rog cig laam lug cuag nplaim tawg! Puab tej neeg dlha raag ntwg tuaj!

⁴Puab tej tsheb neeg ntaus rog nas tsaus tsi lug rua huv tej plawv kev; hab tej neeg hai tsheb, dlha moog dlha lug huv plawv nroog. Tej tsheb ntawd cig laam lug ib yaam le teg tsau hab cig laim lag cuag tsaglig xub!

⁵Nwg hu cov thawj tubrog, thaus puab sis tw dlha moog; puab dlawm qaug pawg lug. Puab dlha nplawg nta moog rua ntawm tug ntsaa yeej, hab rhu puab tej thaiv nav ntaaj lug npaaj tog.

⁶Tej roojvaag kws nyob ze tug dlej los qheb lug ca; muaj kev txhawj ntshai luj heev nyob huv lub loog.

⁷Tug puj vaajntxwv los raug nteg coj moog; nwg cov ntxhais qhev quaj ntsuag ib yaam le nquab quaj; hab puab ntaus puab tej hauvsab quaj tu sab nrho.

⁸Thaus cov tuabneeg tsiv tawm huv nroog Nineves, zoo ib yaam le cov dlej paim huv lub paag dlej tauv. Muaj ib lub suab qw nrov nrov has tas “Nreg! Nreg!” Tabsis tsi muaj leejtwg tig rov qaab le.

⁹Ca le fuab tej nyaj! Ca le fuab tej kub! Muaj nyaj hab kub puv nkaus huv lub nroog!

¹⁰Nineves raug puamtsuaj, ua suabpuam hab nyob qhuav nkuag ca! Puab tej sab ntsws puag taag vim txujkev txhawj ntshai, puab tej hauvcaug tshee ndluas txag, puab zug ntaug hab ntsejmuag dlaaj taag.

¹¹Puas yog nwgnuav lub nroog ntawd zoo ib yaam le lub qhov tsuv ntxhuav kws yog qhov chaw tsuv ntxhuav pub mivnyuas mig; hab yog qhov chaw kws tug txiv hab tug maum tsuv ntxhuav moog qhov twg lawm los cov mivnyuas tsuv ntxhuav nyob tso sab plhuav?

¹²Tsuv ntxhuav yuav muab tug tsaj kws nwg tum tau dlua faib rua lwm tug hab nwg cov mivnyuas noj; hab nwg yuav muab tej nqaj dlua pov pawg lug rua huv nwg lub chaw.

¹³Tug TSWV kws muaj Fwjchim Luj kawg nkaus has tas, “Kuv yog koj tug yeebncuab ntaag! Kuv yuav muab koj tej tsheb neeg hlawv kuas kub nyab taag. Koj cov tubrog yuav raug tua tuag taag rua huv tshaav rog, hab kuv yuav coj txhua yaam kws koj moog txeeb tau ntawm lwm tug lug moog huv tuabsi, hab yuav tsi nov koj tej tuabneeg xaa xuv tej suab ntxiv lawm.”