Read Hmong Njua Hanpakus 2 Bible Online

Hanpakus 2 - Hmong Njua bible

Hanpakus 2

¹Kuv yuav nce moog rua sau kuv lub chaw tsomfaaj hab tog saib tug TSWV yuav kuas kuv has le caag, hab nwg yuav teb kuv tej lug ywg le caag.

²Tug TSWV teb le nuav rua kuv has tas: “Koj ca le muab zaaj kws kuv qha rua koj huv nruab npau suav sau kuas meej rua ntawm tej ntxag zeb, kuas tug tuabneeg kws dlha ceev los txhaj nyeem tau.

³Koj ca le muab tej lug nuav sau tseg ca, rua qhov tej xwm kws kuv qha rua koj nuav tseem tsi tau txug caij tshwm lug. Tabsis lub sijhawm ntawd yuav lug txug sai sai, hab tej kws kuv qha rua koj yuav tshwm lawv le ntawd. Yuav pum tej ntawd maam maam tshwm lug, tabsis koj ua sab ntev tog; tej ntawd yuav muaj lug tag, hab yuav tsi ncua sijhawm ntxiv le lawm.

⁴Cov lug ntawd yog has le nuav: ‘Cov tuabneeg ua phem ua qas yuav tsi muaj sa nyob, tabsis cov tuabneeg kws ncaaj nceeg yuav muaj sa nyob, rua qhov puab ntseeg Vaajtswv.’ ”

⁵Kev muaj txag npluanuj ntxag tau tuabneeg yuam kev. Cov tuabneeg sab hlub kws khaavtheeb hab xaav tau ntau tsi paub txaus, ib yaam le txujkev tuag. Tub yog vim le ntawd, puab txhaj txeeb ib lub tebchaws rua ib lub tebchaws kuas tau lug ua puab tug.

⁶Txhua tsaav tuabneeg kws raug tua swb lawm, yuav tshev hab saib tsi taug cov tuabneeg kws tuaj tua yeej puab. Puab yuav tshev has tas, “Mej tau txeeb luas tug lug ua mej tug, tabsis mej yuav raug kev puamtsuaj! Mej yuav yuam cov tuabneeg kws tshuav mej nqe them rov rua mej kuas mej npluanuj moog txug nub twg?”

⁷Tabsis thaus mej raag txug, cov tuabneeg kws mej tsimtxom tub sau nthwv tuaj tsib tej nqe kws mej tshuav puab hab yuam kuas mej them ib npaug ntxiv rua puab. Yeebncuab yuav tuaj hab ua rua mej ntshai tshee nyo. Puab yuav fuab txhua yaam kws mej muaj nqaa huv tuabsi moog!

⁸Mej tau moog fuab ntau tsaav tuabneeg, tabsis nwgnuav cov tuabneeg kws seem yuav tuaj fuab mej, vim mej tua tuabneeg hab ua limham tawmtsaam tej tuabneeg thoob nplajteb, hab txeeb luas tej nroog.

⁹Mej raug puamtsuaj lawm! Mej lub cuab lub yig muaj txag npluanuj rua qhov mej moog yuam cai txeeb luas tug, hab mej tseem xaav ua kuas mej tsev tuabneeg tau zoo nyob tso sab lug tsi ntshai dlaabtsi le!

¹⁰Tabsis mej tej tswvyim phem ntawd, tub ua rua mej tsev tuabneeg txaajmuag kawg nkaus. Qhov kws mej muab ntau tsaav tuabneeg ua puamtsuaj taag lawm, tub yog mej rov lob kev puamtsuaj lug rua mej ntaag.

¹¹Txawm yog tej ntsaa yeej pobzeb los yuav quaj qw ntshu nrooj tshev mej, hab tej qhaab tse los yuav nyos mej ntsoog qeeg.

¹²Mej raug puamtsuaj lawm! Mej ua kev nruj kev tsiv hab tua tuabneeg, mej txhaj rhawv hab tsim ntau lub nroog.

¹³Txhua tsaav tuabneeg kws mej ntaus yeej, ua num nkim puab lub zug qhuav xwb, hab txhua yaam kws puab ua ntawd puavleej raug kub nyab taag huv tuabsi. Tug TSWV kws muaj fwjchim luj kawg nkaus yog tug kws ua tej nuav ntaag.

¹⁴Tabsis lub nplajteb yuav puv nkaus tug TSWV txujkev txawj ntse hab tug tshwjchim ib yaam le muaj dlej puv nkaus havtxwv.

¹⁵Mej raug puamtsuaj lawm! Thaus mej npautawg, mej ua rua tej tuabneeg zej zog poob ntsejmuag taag; mej tau ua rua puab moog kev qaug puj poog ib yaam le tug tuabneeg qaug cawv.

¹⁶Mej xaav has tas, mej ua le ntawd mej txhaj yuav tau ntsejmuag, tabsis mej hajyam yuav poob ntsejmuag heev. Txawm yog mej los yuav qaug cawv puj poog ib yaam nkaus. Tug TSWV yuav muab lub khob kws yog txujkev txav txim lug rua mej haus, hab mej lub koob meej yuav hloov moog ua kev poob ntsejmuag.

¹⁷Mej muab tej ntoo peg Roob Lenpanoos ntuv taag le caag, nwgnuav mej yuav raug luas ntuv ib yaam le ntawd. Mej muab tej tsaj peg Roob Lenpanoos tua taag le caag; nwgnuav tej tsaj ntawd yuav ua kuas mej ntshai heev le ntawd. Tej xwm nuav tshwm tuaj tub yog vim txujkev txhum kws mej tua tuabneeg hab vim tej kws mej tau ua rua tuabneeg nplajteb hab puab tej nroog puamtsuaj.

¹⁸Tej mlom ntawd muaj nqes dlaabtsi? Nwg yog yaam kws tuabneeg ob txhais teg puab hab nwg yeej qha tsi tau ib yaam tseeb rua mej tsuas yog dlaag xwb. Tug mlom ntawd ua puas tau dlaabtsi zoo kuas tug kws puab nwg ca sab rua nwg, nwg yog tug vaajtswv kws tsi txawj has lug xwb los sav!

¹⁹Mej raug puamtsuaj lawm! Mej has rua ib thooj ntoo tas, “Ca le tsim dlheev!” lossis has rua ib lub pobzeb tas, “Ca le sawv!” Tug mlom ntawd puas qha tau ib zaaj dlaabtsi rua mej? Txawm yog luas muab nyaj muab kub vuam tug mlom ntawd ci nplaag los nwg yeej tsi muaj sa le.

²⁰Tug TSWV nyob huv nwg lub Tuamtsev kws dlawbhuv; txhua tug tuabneeg kws nyob huv nplajteb nuav ca le nyob tuabywv ntawm nwg lub xubndlag.