Read Hmong Njua Xefaniyas 1 Bible Online

Xefaniyas 1 - Hmong Njua bible

Xefaniyas 1

¹Cov lug nuav yog tug TSWV has rua Xefaniyas kws yog tug cev Vaajtswv lug ntu kws Amoos tug tub Yauxiyas ua vaajntxwv kaav tebchaws Yudas. (Xefaniyas yog caajceg lug ntawm Vaajntxwv Hexekiyas, Amaliyas, Kedaliyas hab Kusis.)

²Tug TSWV has tas, “Kuv taabtom yuav rhuav kuas ib puas tsaav yaam kws nyob huv lub nplajteb raug puamtsuaj,

³tsi has tej tuabneeg, tej tsaj txhu, tej noog hab tej ntseg huv tuabsi. Kuv yuav muab cov tuabneeg ua phem ua qas rhuav kuas puamtsuaj taag. Kuv yuav rhuav txhua tsaav tuabneeg kuas puamtsuaj taag tsi tseg ib tug le. Kuv yog tug TSWV kws has tej lug nuav.

⁴“Kuv yuav rau txim rua cov tuabneeg huv Yeluxalees hab cov Yudas. Kuv yuav muab tej chaw kws luas pe Npa-aas ua kuas puamtsuaj taag moog hab yuav tsi muaj leejtwg ncu tau cov thawj kws coj Npa-aas kevcai le lawm.

⁵Kuv yuav muab txhua tug tuabneeg kws nce moog rua sau ruv tsev hab pe lub nub, lub hli hab tej nubqub ua kuas puamtsuaj taag. Kuv tseem yuav muab cov tuabneeg kws pehawm kuv hab muab lub sab npuab kuv tabsis tsua tuav tug vaajtswv Maulej lub npe coglug ua kuas puamtsuaj huv tuabsi.

⁶Kuv yuav muab txhua tug tuabneeg kws tso kuv tseg, tsi lawv kuv qaab hab tsi lug cuag kuv lossis tsi thov kuv ua tug coj puab txuj hauv kev ua kuas puamtsuaj taag.”

⁷Nub kws tug TSWV yuav nyob ntawm nwg lub zwmtxwv txav txim tub lug ze lawm; yog le ntawd, mej ca le nyob tuabywv ntawm nwg xubndlag. Tug TSWV taabtom npaaj nwg tsaav tuabneeg moog ua khoom fij hab tub caw yeebncuab tuaj fuab cov Yudas lawm.

⁸Tug TSWV has tas, “Txug nub kws tua cov Yudas, kuv yuav rau txim rua cov numtswv, vaajntxwv cov tub hab txhua tug kws moog xyum coj lwm tsaav tuabneeg tej kevcai.

⁹Kuv yuav rau txim rua cov tuabneeg pe dlaab, ua tubsaab hab moog tua tuabneeg fuab luas tej khoom nqaa lug tso puv nkaus huv puab tug tswv lub tsev.”

¹⁰Tug TSWV has tas, “Thaus txug nub ntawd, mej yuav nov lub suab quaj ntawm lub Roojvaag Ntseg huv lub nroog Yeluxalees tuaj. Mej yuav nov tej suab quaj ntsoog qeeg ntawm lub nroog txuas tshab hab nov tej suab sis tsoo nrov qeeg nkawg sau tej pov roob tuaj.

¹¹Mej cov kws nyob theem qeg ntawm lub nroog, mej ca le quaj ntsuag thaus mej nov tej nuav rua qhov mej tej tub laag tub luam hab puab tej khoom muaj nqes puamtsuaj taag lawm!

¹²“Thaus ntawd kuv yuav taws teeb moog tshawb lub nroog Yeluxalees. Kuv yuav rau txim rua cov tuabneeg kws txaus sab hab ca sab rua puab xwb; cov kws puab xaav huv puab lub sab has tas, ‘Tug TSWV yeej tsi ua zoo lossis ua phem le!’

¹³Puab tej nyaj yuav raug luas fuab hab puab tej vaaj tse yuav raug rhuav kuas puamtsuaj taag. Puab yuav tsi tau nyob huv tej tsev kws puab taabtom ua lossis yuav tsi tau haus tej cawv txiv maab kws puab cog rua huv puab tej vaaj.”

¹⁴Nub tseemceeb kws yog tug TSWV nub tub lug ze lawm, nub ntawd lug ze zuj zug hab lug ceev heev le! Nub ntawd yuav ab sab kawg, txawm yog tej tubrog kws sab tawv los yuav ca le tsaa suab hlo quaj hab taag kev ca sab!

¹⁵Nub ntawd yuav yog ib nub kws npautawg heev, yog nub kws muaj kev txomnyem hab ntxhuv sab kawg, yog nub kws muaj kev puamtsuaj, yog nub kws tsaus ntuj nti, yog nub kws tsaus dlub ncab hab pus fuab nti,

¹⁶yog nub kws nov tej suab raaj suab xyu txhij tubrog, hab nov tej suab sis ntaus sis tua quaj ntsoog qeeg huv tej nroog kws txhim zeb khov kho hab sau tej chaw tsomfaaj tuaj.

¹⁷Tug TSWV has tas, “Kuv yuav tso sub tawg sub ntshaa lug rua tuabneeg kuas txhua tug moog kev ib yaam le tug dligmuag. Vim puab tau ua txhum tawmtsaam kuv, mas nwgnuav puab cov ntshaav yuav raug muab laub tawm ib yaam le laub dlej hab puab tej cev tuag yuav lwj pawg lug rua sau npoo aav.”

¹⁸Thaus txug nub ntawd, tug TSWV yuav qha nwg txujkev chim rua suavdlawg; txawm yog puab tej nyaj tej kub los yuav cawm tsi tau puab dlim. Lub nplajteb yuav raug tug TSWV txujkev chim ib yaam le suavtawg kub; nwg yuav ua kuas txhua tug kws nyob huv lub nplajteb nuav puamtsuaj taamsim.