Read Hmong Njua Xefaniyas 2 Bible Online

Xefaniyas 2 - Hmong Njua bible

Xefaniyas 2

¹Tsaav tuabneeg kws tsi paub txaajmuag, mej ca le lug sis sau ua ke

²ua ntej mej yuav ntsws hab tuag ib yaam le tej paaj ntoos, ua ntej tug TSWV txujkev chim lug kub mej hab ua ntej nub kws tug TSWV qha nwg txujkev npautawg rua mej.

³Cov tuabneeg kws txu fwjchim nyob huv lub tebchaws nuav hab cov tuabneeg kws noog nwg tej lug, mej txhua tug ca le tig lug cuag tug TSWV. Ca le ua ncaaj nceeg hab txu fwjchim taabmeeg tug TSWV. Tej zag mej yuav tsiv dlim ntawm tug TSWV txujkev txav txim, nub kws tug TSWV qha nwg txujkev chim rua mej.

⁴Yuav tsi muaj ib tug tuabneeg seem nyob huv lub nroog Nkaxas le lawm. Asekeloos yuav ua suabpuam taag. Cov tuabneeg huv Asedaus yuav raug ntab tawm moog thaus taav su, hab cov tuabneeg huv Ekiloos yuav raug ntab tawm tsiv huv puab lub nroog moog.

⁵Mej cov Filitees kws nyob lawv ntug havtxwv raug kev puamtsuaj lawm lauj! Tug TSWV tub txav txim rua mej lawm. Nwg yuav ua kuas mej puamtsuaj taag hab yuav tsi tseg mej ib tug seem hlo le.

⁶Mej tej aav kws nyob lawv ntug havtxwv yuav ua tshaav zaub rua cov tub yug yaaj tuaj ua tsev hab ua nkuaj rua puab tej yaaj nyob.

⁷Cov Yudas kws seem yuav kaav mej lub tebchaws. Puab yuav coj puab tej tsaj tuaj noj zaub hab pw huv cov Akeseloos tej tsev. Tug TSWV kws yog puab tug Vaajtswv yuav nrug nraim puab hab paab kuas puab lub neej rov vaammeej.

⁸Tug TSWV kws muaj Fwjchim Luj kawg nkaus has tas, “Kuv tub nov cov Mau-am hab cov Amoos tej lug thuam hab tej lug has saib tsi taug kuv tsaav tuabneeg hab khaav has tas yuav tuaj txeeb kuv tsaav tuabneeg lub tebchaws.

⁹Kuv qha tseeb rua mej has tas kuv yog tug TSWV kws yog cov Yixalayees tug Vaajtswv kws muaj sa nyob, kuv coglug has tas, cov Mau-am hab cov Amoos yuav raug muab rhuav kuas puamtsuaj taag ib yaam le lub nroog Xaudoos hab lub nroog Kaumaulas. Puab yuav caj ua qhov ntsev hab puamtsuaj moog ibtxhis, tej nroj tsuag yuav tuaj faab nyo thoob plawg xwb. Kuv tsaav tuabneeg kws seem yuav fuab hab txeeb puab lub tebchaws.”

¹⁰Tub yog vim le ntawd, cov Mau-am hab cov Amoos kws khaavtheeb yuav raug txim rua qhov puab txobthuam tug TSWV kws muaj Fwjchim Luj kawg nkaus tsaav tuabneeg.

¹¹Tug TSWV yuav ua kuas puab ntshai heev; nwg yuav muab tej vaajtswv kws nyob huv nplajteb nuav txu kuas tsi muaj qaabhau, ces txhua tsaav tuabneeg nyag txhaj yuav nyob huv nyag lub tebchaws pehawm tug TSWV.

¹²Tug TSWV tseem yuav tua cov tuabneeg Sudaas kuas tuag taag huv tuabsi hab.

¹³Tug TSWV yuav siv nwg lub fwjchim rhuav lub tebchaws Axilias kuas puamtsuaj. Nwg yuav muab lub nroog Nineves rhuav kuas puamtsuaj ua suabpuam taag nyob qhuav nkuag ca.

¹⁴Ces Nineves yuav ua lub chaw rua tej yaaj, tej tshis hab txhua yaam tsaj yuav lug nyob lug pw. Plaas yuav lug nyob huv tej tsev kws puag taag ntawd hab quaj ntawm tej qhovrais. Uab laag yuav lug quaj ntawm tej taw rooj. Tej ntoo cab kws xov tej tsev huv lub nroog yuav raug muab tsoo coj moog povtseg.

¹⁵Tub yog vim le ntawd, txhaj muaj tej nuav tshwmsim lug raug lub nroog kws khaavtheeb txug nwg tug zug hab xaav has tas nwg tau zoo nyob kaaj sab lug lawm. Hab nwg cov tuabneeg xaav has tas puab lub nroog yog lub kws luj tshaaj plawg tej nroog huv lub nplajteb nuav. Lub nroog ntawd yuav nyob ntsag tu hab yuav ua chaw rua tej tsaj qus lug nyob lawm xwb! Tej tuabneeg kws dlua kev yuav ntshai yoob taag hab thim rov qaab.