Read Hmong Njua Xakaliyas 10 Bible Online

Xakaliyas 10 - Hmong Njua bible

Xakaliyas 10

¹Ca le thov kuas tug TSWV tso naag tshab lug rua lub caij nplooj ntoos hlaav. Tug TSWV yog tug kws tso naag tshauv hab tuamtsaam naag lug, ua kuas tej qoobloo hlub ntsuab xwbxab rua txhua leej txhua tug.

²Tej tuabneeg moog pe mlom hab saib moov, tabsis tej lug kws luas teb rua puab yog lug dlaag hab tsi muaj qaabhau dlaabtsi. Muaj qee leej txhais npau suav, tabsis coj mej kuas ua yuam kev xwb; tej lug kws puab nplig mej sab yeej tsi muaj tseeb le. Yog le ntawd, cov tuabneeg txhaj ncig moog ncig lug ib yaam le tug yaaj kws yuam kev lawm. Puab raug luas tsimtxom vim puab tsi muaj thawjcoj.

³Tug TSWV has tas, “Kuv chim heev rua cov tuabneeg txawv tebchaws kws kaav kuv tsaav tuabneeg, hab kuv yuav rau txim rua puab. Cov Yudas yog kuv tsaav tuabneeg, hab kuv yog tug TSWV kws muaj Fwjchim Luj kawg nkaus, kuv yuav tsomkwm puab. Puab yuav zoo le kuv cov neeg kws caij ntaus rog kws muaj zug heev huv tshaav rog.

⁴Yuav muaj cov numtswv, cov thawjcoj hab cov thawj tubrog sawv huv puab lug tswjfwm kuv tsaav tuabneeg.

⁵Cov Yudas yuav muaj yeej ib yaam le cov tubrog kws muab puab cov yeebncuab tsuj nthi rua huv cov aav nkus ntawm tej kev. Puab yuav moog ntaus rog rua qhov tug TSWV nrug nraim puab, hab txawm yog cov yeebncuab tej tubrog kws caij neeg los puab yuav tua yeej.

⁶“Kuv yuav ua kuas cov Yudas muaj zug heev; kuv yuav cawm cov Yixalayees kuas dlim plawg lug. Kuv yuav hlub tshua puab hab coj puab rov lug tsev. Puab yuav nyob xauv npo ib yaam le kws kuv tsi tau tso puab tseg. Kuv yog tug TSWV kws yog puab tug Vaajtswv; kuv yuav teb puab tej lug thov.

⁷Cov Yixalayees yuav muaj zug ib yaam le paab tubrog, yuav zoo sab ib yaam le cov tuabneeg kws haus cawv txiv maab. Puab cov xeebntxwv yuav ncu ntsoov txujkev kws muaj yeej, hab zoo sab heev rua tej kws tug TSWV tau ua taag lug lawm.

⁸“Kuv yuav hu kuv tsaav tuabneeg hab sau puab rov lug nyob ua ke. Kuv yuav cawm puab hab ua kuas puab rov fuamvaam coob ib yaam le thaus u.

⁹Txawm yog kuv muab puab ntab moog nrug txhua tsaav tuabneeg nyob, hab txawm yog puab moog nyob puag tim tej tebchaws kws dleb heev los puab tseem yuav ncu ntsoov kuv; puab hab puab tej mivnyuas yuav dlim, hab yuav ua ke rov lug tsev.

¹⁰Kuv yuav coj puab tawm huv tebchaws Iziv hab Axilias rov lug, hab ca puab rov lug nyob huv puab lub tebchaws. Kuv yuav ca puab moog nyob huv Nkile-as hab peg Lenpanoos huv tuabsi; yuav muaj tuabneeg moog nyob thoob plawg huv lub tebchaws.

¹¹Txawm yog thaus puab hlaa havtxwv muaj teebmeem rua puab los kuv yog tug TSWV, kuv yuav ua kuas tej dlej ndlaas ntawd tug, hab tug Dlej Niles kws tub tshaaj plawg yuav nqhuab taag. Cov Axilias txujkev khaavtheeb yuav raug txu kuas qeg, hab lub tebchaws Iziv kws muaj zug heev yuav poob fwjchim.

¹²Kuv yuav txhawb kuas kuv tsaav tuabneeg muaj zug heev; puab txhaj yuav pehawm kuv hab noog kuv lug.” Tug TSWV yog tug kws has tej lug nuav.