Read Hmong Njua Xakaliyas 13 Bible Online

Xakaliyas 13 - Hmong Njua bible

Xakaliyas 13

¹Tug TSWV kws muaj Fwjchim Luj kawg nkaus has tas, “Thaus txug lub sijhawm ntawd, lub qhovdlej ntshab kws huv sab si yuav qheb hlo ntxuav Daviv cov xeebntxwv hab cov tuabneeg kws nyob huv lub nroog Yeluxalees tej kev txhum hab tej kev pe mlom moog povtseg.

²Lub sijhawm ntawd kuv yuav tshem cov mlom kws nyob huv lub tebchaws ntawd tej npe tawm moog kuas taag, hab tsi muaj leejtwg yuav ncu txug puab ntxiv le lawm. Kuv yuav tshem txhua tug kws khaav has tas nwg yog tug cev Vaajtswv lug hab muab puab txujkev kws ntshaw pe mlom coj moog povtseg.

³Yog leejtwg tseem nyam ua tug cevlug, mas nwg nam nwg txiv yuavtsum qha rua nwg has tas, ‘Nwg yuav raug muab tua kuas tuag, rua qhov nwg khaav has tas yog nwg qha tug TSWV txujlug, tabsis yog nwg has tej lug dlaag xwb.’ Thaus nwg cevlug, nwg nam hab nwg txiv yuavtsum muab nwg ntaus kuas tuag.

⁴Thaus txug lub sijhawm ntawd, cov cevlug yuav raug txaajmuag, txhua tug yuav tsi khaav puab tej ywgtoog; puab yuav tsi naav cov cevlug tej tsho ntev moog dlaag ntxag tuabneeg ntxiv lawm.

⁵Tabsis, nwg yuav has tas, ‘Kuv tsi yog ib tug cevlug. Kuv yog ib tug tuabneeg ua teb xwb, kuv lub neej yeej ibtxwm yog tuabneeg ua teb lug txug naj nub nua.’

⁶Yog leejtwg nug nwg has tas, ‘Ua le caag koj muaj qhov txhaab nyob ntawm koj hauvsab?’ Nwg yuav teb has tas, ‘Kuv raug tej qhov txhaab nuav huv kuv tug phoojywg tsev lug.’ ”

⁷Tug TSWV kws muaj Fwjchim Luj kawg nkaus has tas, “Raab ntaaj, koj ca le sawv, hab moog tua tug tub yug yaaj kws ua num rua kuv! Ca le muab nwg tua kuas tuag, ces cov yaaj yuav tawg tsiv ri sua rua nuav rua u. Kuv yuav tawmtsaam kuv tsaav tuabneeg,

⁸hab nyob thoob plawg huv lub tebchaws yuav muaj tuabneeg tuag txug ob feem peb.

⁹Kuv yuav sim ib feem peb kws seem ntawd, hab yuav muab puab ntxuav kuas dlawbhuv ib yaam le tej nyaj kws coj moog hlawv huv qhovcub kuas tau tej tseem nyaj. Kuv yuav sim puab ib yaam le sim kub. Ces puab yuav thov kuv, hab kuv yuav teb puab tej lug thov. Kuv yuav qha rua puab has tas puab yog kuv tsaav tuabneeg, hab puab yuav leeg has tas kuv yog puab tug Vaajtswv.”