Read Hmong Njua Malakis 1 Bible Online

Malakis 1 - Hmong Njua bible

Malakis 1

¹Ntawm nuav yog cov lug kws tug TSWV has rua Malakis kuas nwg coj moog qha rua cov Yixalayees.

²Tug TSWV has rua nwg tsaav tuabneeg tas, “Kuv yeej ibtxwm hlub mej.” Tabsis puab nug tug TSWV has tas, “Koj hlub peb le caag?” Tug TSWV teb has tas, “Exaus hab Yakhauj yog ob kwvtij, tabsis kuv hlub Yakhauj hab nwg cov xeebntxwv,

³kuv ntxub Exaus hab nwg cov xeebntxwv. Kuv muab Exaus lub ncov roob rhuav kuas puamtsuaj hab muab nwg lub tebchaws tso tseg rua tej tsaj qus nyob.”

⁴Exaus cov xeebntxwv kws yog cov Edoos has tas, “Txawm yog peb tej nroog puamtsuaj taag lawm los peb yuav rov txhim khu dlua tshab.” Ces tug TSWV yuav teb has tas, “Ca puab yijmeem txhim khu dlua tshab ntaag. Kuv yuav rov muab tej nroog ntawd rhuav povtseg dlua. Tej tuabneeg yuav hu puab has tas, ‘Lub tebchaws ua phem’ hab ‘Tsaav tuabneeg kws tug TSWV chim rua puab moog ibtxhis le.’ ”

⁵Cov Yixalayees lub qhovmuag yuav tau pum tej xwmtxheej ntawd, hab puab yuav has tas, “Txawm yog dlhau ntawm cov Yixalayees tug nrim tebchaws lawm los tug TSWV tseem muaj Fwjchim Luj kawg nkaus.”

⁶Tug TSWV kws muaj Fwjchim Luj kawg nkaus has rua cov povthawj tas, “Tug tub yeej fwm leej txiv, hab tug qhev yeej fwm nwg tug tswv. Kuv yog mej Txiv, ua le caag mej tsi fwm kuv? Kuv yog mej tug TSWV, ua le caag mej tsi fwm kuv? Mej saib tsi taug kuv hab mej tseem nug has tas, ‘Peb saib tsi taug koj le caag?’

⁷Tub yog vim mej muab tej zaub mov kws tsi muaj nqes coj moog fij rua sau kuv lub thaaj. Mej tseem muaj plhus nug has tas, ‘Peb tsi fwm koj le caag?’ Kuv yuav qha qhov kws mej ua saib tsi taug kuv lub thaaj rua mej.

⁸Thaus mej coj tug tsaj dligmuag, muaj mob lossis cegtawv tuaj tua fij rua kuv, mej xaav has tas ua le ntawd yeej tsi txhum le los? Mej sim coj cov tsaj zoo le ntawd moog pub rua tug tswv xeev saib! Nwg puas yuav zoo sab lossis txaus sab rua mej?”

⁹Nwgnuav mej cov kws yog povthawj, mej sim thov kuas Vaajtswv taabncuab peb saib. Nwg yuav tsi teb mej tej lug thov, rua qhov yog tim mej ua txhum lawm.

¹⁰Tug TSWV kws muaj Fwjchim Luj kawg nkaus has tas, “Kuv xaav kuas mej ib tug moog muab lub Tuamtsev tej qhovrooj kaw, tsi pub mej laam moog rauv tawg rua sau kuv lub thaaj. Kuv tsi txaus sab rua mej; kuv yuav tsi leeg tej khoom kws mej coj tuaj fij rua kuv ntawd.

¹¹Tej tuabneeg nyob thoob nplajteb puavleej fwm kuv. Puab hlawv tshuaj tsw qaab txhua qhov fij rua kuv hab muab tej khoom kws txaus kuv sab fij rua kuv xwb. Puab suavdlawg puavleej ua rua kuv tau ntsejmuag!

¹²Tabsis thaus mej has tas kuv lub thaaj tsi muaj nqes hab thaus mej saib tsi taug tej zaub mov kws mej coj tuaj fij rua sau kuv lub thaaj, tub yog mej tsi fwm kuv ntaag.

¹³Mej has tas, ‘Peb dlhuav tej nuav kawg nkaus le!’ Mej ua saib tsi taug kuv, vim le ntawd mej txhaj coj tug tsaj kws mej moog nyag lug lossis tug tsaj luv ceg lossis tug tsaj muaj mob tuaj fij rua kuv. Mej xaav has tas kuv yuav leeg yuav tej ntawd nua los?.

¹⁴Kuv yuav foom phem rua tug tuabneeg dlaag kws tau coglug has tas, nwg yuav muab nwg paab tsaj tug kws zoo tshaaj plawg fij rua kuv, tabsis nwg muab tug kws phem tshaaj plawg tuaj fij rua kuv xwb. Kuv yog tug Vaajntxwv kws muaj Fwjchim Luj kawg nkaus hab txhua tsaav tuabneeg puavleej fwm kuv lub npe.”