Read Hmong Njua Mathais 12 Bible Online

Mathais 12 - Hmong Njua bible

Mathais 12

¹Tsi ntev tom qaab ntawd, nub Xanpataus Yexus taug kev moog txug huv ib dlaim teb npleg. Yexus cov thwjtim tshaib plaab, puab txawm dle naab nplej lug tev noj.

²Thaus cov Falixais pum cov thwjtim ua le ntawd, puab has rua Yexus has tas, “Koj saib, nub Xanpataus koj cov thwjtim ua le ntawd, puab ua txhum peb txuj Kevcai lawm!”

³Yexus teb has tas, “Mej tsi tau nyeem zaaj kws Daviv ua thaus kws Daviv hab nwg cov tuabneeg tshaib plaab los?

⁴Daviv moog rua huv Vaajtswv lub Tuamtsev, Daviv hab nwg cov tuabneeg muab tej ncuav kws tub muab fij rua Vaajtswv lawm lug noj, txawm yog Vaajtswv txuj kevcai txwv tsi pub lwm tug noj tej ncuav ntawd, tsuas yog cov povthawj txhaj noj tau xwb los puab tseem muab noj hab.

⁵Lossis mej tsi tau nyeem txuj Kevcai kws has tas, txhua nub Xanpataus cov povthawj kws nyob huv lub Tuamtsev ua txhum kevcai nub Xanpataus, tabsis tsi muaj tuabneeg has tas, puab ua txhum nua los?

⁶Kuv qha tseeb rua mej has tas, nyob ntawm nuav muaj ib yaam kws tseemceeb dlua lub Tuamtsev.

⁷Vaajtswv Txujlug has tas, ‘Qhov kws kuv xaav tau, yog kuas mej muaj lub sab hlub, tsi yog tug tsaj kws muab tua theej txhoj.’ Yog mej totaub zaaj nuav lawm, mej yuav tsi rau txim rua cov kws tsi tau ua txhum;

⁸rua qhov Tuabneeg leej Tub yog tug Tswv nub Xanpataus.”

⁹Yexus tawm qhov ntawd hab moog rua huv ib lub tsev saablaaj,

¹⁰Muaj ib tug txivneej qhuav teg nyob qhov ntawd. Cov tuabneeg kws tuaj nyob ntawd muaj qee leej xaav nrhav txim rua Yexus, puab txawm nug Yexus has tas, “Khu mob nub Xanpataus puas txhum Kevcai?”

¹¹Yexus teb puab has tas, “Yog mej cov leejtwg muaj ib tug yaaj poob qhov tshij Nub Xanpataus, mej tsi moog muab rhu tawm los?

¹²Tuabneeg muaj nqes heev dlua tug yaaj! Yog le ntawd, txuj Kevcai yeej pub peb paab tuabneeg nub Xanpataus.”

¹³Ces Yexus has rua tug txivneej qhuav teg ntawd tas, “Koj ca le xyaab koj txhais teg.” Nwg txawm xyaab hlo nwg txhais teg, ua cav nwg txhais teg txawm zoo hlo ib yaam le saab kws tsi qhuav lawm.

¹⁴Cov Falixais txawm tawm moog saablaaj saib yuav ua le caag puab txhaj tua tau Yexus.

¹⁵Thaus Yexus paub le ntawd, nwg txawm tawm qhov chaw ntawd moog; hab muaj tuabneeg coob coob nrug nwg moog. Yexus khu tej tuabneeg kws muaj mob txhua tug zoo huv tuabsi,

¹⁶hab nwg txwv tsi pub puab moog qha nwg rua leejtwg le.

¹⁷Nwg ua le nuav kuas muaj tav lawv le Yaxayas kws yog tug cev Vaajtswv lug tau qha tseg lawm has tas:

¹⁸“Tug nuav yog kuv tug tubkhai kws kuv xaiv tseg lawm, kuv hlub nwg hab kuv txaus sab rua nwg, kuv yuav tso kuv tug Ntsujplig lug rua sau nwg. Hab nwg yuav qha kuv txujkev ncaaj nceeg rua txhua tsaav tuabneeg paub.

¹⁹Nwg yuav tsi nrug leejtwg sis caav sis tshe, lossis qw nrov nrov, lossis nwg yuav tsi has lug nrov nrov ntawm tej kev.

²⁰Tug lojkov kws po lawm, nwg yuav tsi muab luv, lossis lub teeb kws tub yuav tuag, nwg yuav tsi tshuab kuas tuag. Nwg yuav ua sab ntev moog txug thaus txujkev ncaaj nceeg kovyeej lawm.

²¹Hab txhua tsaav tuabneeg yuav ca sab rua nwg.”

²²Thaus ntawd muaj tuabneeg coj ib tug txivneej dligmuag hab has tsi tau lug tuaj cuag Yexus, rua qhov nwg raug dlaab. Yexus khu tug txivneej ntawd zoo, nwg txawm has tau lug hab pum kev lawm.

²³Cov tuabneeg kws pum Yexus ua le ntawd, puab xaav tsi thoob le, puab sis nug has tas, “Nwg puas yog Daviv tug Tub?”

²⁴Thaus cov Falixais nov suavdlawg has le ntawd, puab teb has tas, “Nwg ntab tau dlaab tawm tub yog Npexenpus kws yog dlaab tug thawj pub fwjchim rua nwg ntab.”

²⁵Yexus tub paub tej kws puab xaav hab nwg has rua puab tas, “Yog ib lub tebchaws twg tawg ua ob peb paab lawm, hab cov tuabneeg ntawd sis ntaus sis tua, ces lub tebchaws ntawd yuav puamtsuaj moog. Hab ib lub nroog twg lossis ib tsev tuabneeg twg tawg ua ob peb paab lawm, hab cov tuabneeg ntawd sis ntaus sis tua, ces puab yeej yuav tawg taag moog.

²⁶Yog cov tuabneeg kws dlaab Ntxwgnyoog kaav sis ntaus sis tua, ces kuj pev ib yaam le puab tub tawg ua ob peb paab lawm, tsi ntev puab yuav tawg moog taag!

²⁷Mej has tas yog Npexenpus pub fwjchim rua kuv ntab tau dlaab. Yog le ntawd, yog leejtwg pub fwjchim rua mej cov tuabneeg kws ntab tau dlaab ntab dlaab? Mej cov tuabneeg kws ntab dlaab yog cov kws yuav txav txim rua mej!

²⁸Tsi yog le mej has! Tabsis yog Vaajtswv tug Ntsujplig pub fwjchim rua kuv, kuv txhaj ntab tau dlaab. Qhov ntawd qha rua mej paub has tas Vaajtswv lub Tebchaws tub lug txug mej lawm.

²⁹“Tsi muaj leejtwg yuav tsoo moog tau rua huv tug txivneej kws muaj zug lub tsev hab fuab nwg tej qhov txhua chaw, tsuas yog nwg xub muab tug kws muaj zug ntawd khi tsaiv, nwg txhaj fuab tau tej qhov txhua chaw huv tug ntawd tsev.

³⁰“Tug kws tsi tuaj kuv tog, tug ntawd yeej tawmtsaam kuv. Tug kws tsi koom nrug kuv, tug ntawd ua kuas tawg paab tawg pawg.

³¹Yog le ntawd, kuv txhaj has rua mej has tas, txhua yaam kev txhum kws tuabneeg ua lossis txhua lu lug phem kws tuabneeg has, Vaajtswv zaam txim tau, tabsis yog leejtwg thuam Vaaj Ntsujplig tug Dlawbhuv, Vaajtswv yuav zaam txim tsi tau rua tug ntawd.

³²Yog leejtwg thuam Tuabneeg leej Tub, Vaajtswv zaam txim tau rua tug ntawd, tabsis yog leejtwg thuam Vaaj Ntsujplig tug Dlawbhuv, Vaajtswv yuav zaam txim tsi tau rua tug ntawd, tsi has tam nuav lossis tam tom ntej.

³³“Tsob ntoo zoo yeej txi cov txiv zoo; tsob ntoo phem yeej txi cov txiv phem. Yog yug pum cov txiv yug yeej paub has tas tsob ntoo ntawd yog tsob phem lossis tsob zoo.

³⁴Cov nam naab! Mej yog tuabneeg sab phem, mej yuav ua le caag has tau lug zoo! Rua qhov lub sab xaav le caag, lub ncauj yeej has le ntawd.

³⁵Tug tuabneeg sab zoo yeej has tej lug zoo; hab tug tuabneeg sab phem yeej has tej lug phem.”

³⁶Kuv qha rua mej has tas, “Nub kws Vaajtswv txav txim, txhua tug nyag yuavtsum tau leeg txhua lu lug tsi muaj qaabhau kws nyag tau has lawm rua Vaajtswv.

³⁷Mej yuav raug txim lossis tsi raug, yog nyob ntawm tej lug kws mej has.”

³⁸Cov xwbfwb kws qha Vaajtswv Kevcai hab cov Falixais qee leej tuaj has rua Yexus has tas, “Xwbfwb, peb xaav kuas koj ua ib yaam txujci tseemceeb rua peb saib.”

³⁹Yexus teb has tas, “Cov tuabneeg tam nuav ua phem ua qas hab tsi ntseeg Vaajtswv le. Mej xaav kuas kuv ua ib yaam txujci tseemceeb rua mej saib nua los? Kuv yuav tsi ua! zaaj txujci kws mej yuav pum, tsuas yog Yaunas zaaj xwb.

⁴⁰Yaunas nyob huv tug ntseg kws luj luj lub plaab tau peb nub peb mos le caag, Tuabneeg leej Tub yuav nyob huv nruab aa peb nub peb mos ib yaam le ntawd.

⁴¹Nub kws Vaajtswv txav txim, cov tuabneeg kws nyob huv lub nroog Nineves yuav sawv qha mej tej kev txhum rua mej, rua qhov thaus puab nov Yaunas qha, puab txawm tso puab tej kev txhum tseg. Kuv qha rua mej has tas muaj ib tug nyob ntawm nuav, nwg tseem muaj fwjchim luj dlua Yaunas hab!

⁴²Nub kws Vaajtswv txav txim, tug puj vaajntxwv kws kaav tebchaws Senpas yuav sawv qha mej tej kev txhum rua mej, rua qhov nwg tuaj nraag nwg lub tebchaws tuaj noog Vaajntxwv Xalumoos pav nwg tej kev txawj ntse; kuv qha rua mej has tas muaj ib tug nyob ntawm nuav, nwg tseem muaj fwjchim luj dlua Vaajntxwv Xalumoos hab!

⁴³“Thaus dlaab tawm huv ib tug tuabneeg lub cev moog lawm, tug dlaab ntawd txawm moog rua tom roob mojsaab qhua hab nrhav chaw su. Yog nwg nrhav tsi tau,

⁴⁴nwg yuav has tas, ‘Kuv yuav rov qaab moog rua tom kuv lub qub tsev kws kuv tawm tuaj.’ Thaus nwg rov lug txug nwg lub qub tsev, ua cav tsi muaj leejtwg nyob, hab tub tu dlu lug ca lawm.

⁴⁵Nwg txawm moog coj xyaa tug dlaab kws nyaum dlua nwg lug nrug nwg nyob huv lub tsev ntawd. Thaus kawg tug tuabneeg ntawd hajyam txomnyem heev dlua thaus chivthawj. Cov tuabneeg sab phem tam nuav yuav raug kev txomnyem ib yaam le ntawd ntaag.”

⁴⁶Thaus Yexus tseem taabtom qha cov tuabneeg kws nyob ntawd, ces Yexus nam hab Yexus cov kwv txawm tuaj txug. Puab sawv saab nrau hab puab has tas, puab xaav nrug Yexus thaam.

⁴⁷Muaj ib tug has rua Yexus has tas, “Koj nam hab koj cov kwv tuaj sawv saab nrau, puab xaav nrug koj thaam.”

⁴⁸Yexus teb has tas, “Leejtwg yog kuv nam? Leejtwg yog kuv cov kwv?”

⁴⁹Yexus taw teg rua cov thwjtim hab has tas, “Cov nuav yog kuv nam hab kuv cov kwv.

⁵⁰Tug kws ua lawv le kuv Txiv tug kws nyob sau ntuj ceebtsheej lub sab nyam, tug ntawd yog kuv tug kwv, kuv tug muam, hab kuv nam.”