Read Hmong Njua Mathais 17 Bible Online

Mathais 17 - Hmong Njua bible

Mathais 17

¹Tom qaab ntawd rau nub Yexus coj Petus, Yakaunpaus hab Yakaunpaus tug kwv Yauhaas nrug Yexus moog rua sau ib lub roob sab.

²Thaus puab taabtom saib Yexus, Yexus lub cev txawm hloov hlo: nwg lub ntsejmuag ci ib yaam le lub nub, hab nwg cev rig tsho ci ntsaa ab dlawb paug.

³Peb tug thwjtim ntawd pum Mauxes hab Eliyas nrug Yexus thaam.

⁴Petus has rua Yexus has tas, “Tug Tswv, peb tuaj nyob ntawm nuav zoo kawg le! Yog koj pum zoo, kuv yuav ua peb lub tsev pheebsuab rua ntawm nuav, ib lub rua koj, ib lub rua Mauxes, hab ib lub rua Eliyas.”

⁵Thaus Petus tseem taabtom has le ntawd, txawm muaj ib tauv fuab ci dlawb paug lug roog puab, hab muaj ib lub suab has huv tauv fuab ntawd tuaj has tas, “Tug nuav yog kuv tug Tub kws kuv hlub, kuv txaus sab rua nwg, mej yuavtsum noog nwg lug.”

⁶Thaus cov thwjtim nov lub suab ntawd, puab ntshai kawg le, puab txawm txhus caug ndlua nyo rua huv aav.

⁷Yexus lug tuav nkaus puab hab has tas, “Mej ca le sawv, tsi xob ntshai.”

⁸Puab tsaa qhovmuag saib, tsi pum leejtwg le, tsuas pum Yexus tuab leeg xwb.

⁹Thaus puab nqeg peg roob lug, Yexus txwv has tas, “mej tsi xob qha zaaj kws mej pum ntawd rua leejtwg paub moog txug thaus Tuabneeg Leej Tub sawv huv qhov tuag rov qaab lug tsaiv.”

¹⁰Cov thwjtim nug Yexus has tas, “Vim le caag cov xwbfwb kws qha Vaajtswv txuj Kevcai has tas Eliyas yuav xub lug?”

¹¹Yexus teb has tas, “Eliyas yeej yuav xub lug tag, hab nwg yuav npaaj txhua yaam kuas tav tog.

¹²Kuv qha rua mej has tas, Eliyas tub lug lawm, tabsis tuabneeg tsi paub nwg, puab txhaj ua rua nwg lawv le puab sab nyam. Puab yuav tsimtxom Tuabneeg Leej Tub ib yaam le ntawd hab.”

¹³Cov thwjtim totaub has tas, qhov kws Yexus has rua puab ntawd, yog nwg has txug Yauhaas tug kws muab tuabneeg ua kevcai raus dlej.

¹⁴Thaus Yexus hab nwg peb tug thwjtim rov lug txug ntawm cov tuabneeg coob coob, txawm muaj ib tug txivneej tuaj txhus caug ndlua ntawm Yexus kutaw,

¹⁵hab thov has tas, “Tug Tswv, thov koj taabncuab kuv tug tub, nwg qaug dlaabpeg hab txomnyem kawg le. Nwg pheej qaug rua huv qhovcub hab rua huv dlej.

¹⁶Kuv coj nwg tuaj rua koj cov thwjtim khu, tabsis puab khu tsi tau.”

¹⁷Yexus teb has tas, “Cov tuabneeg tsi ntseeg hab tsi ncaaj! Kuv tseem yuav nrug mej nyob ntev le caag? Hab kuv yuav ua sab ntev rua mej moog txug nub twg? Ca le coj tug mivtub lug rua kuv!”

¹⁸Yexus ntab dlaab, ces dlaab txawm tawm ntawm tug mivtub moog, hab taamsim ntawd tug mivtub txawm zoo hlo lawm.

¹⁹Tom qaab ntawd Yexus cov thwjtim lug cuag nwg tuabywv hab nug has tas, “Vim le caag peb ntab tsi tau dlaab tawm?”

²⁰Yexus teb has tas, “Tub yog vim mej tsi muaj kev ntseeg txaus. Kuv qha tseeb rua mej has tas, yog mej muaj kev ntseeg luaj lub noob zaub, mej has rua lub roob nuav tas, ‘Ca le txaav ntawm nuav moog rua tod!’ Ces lub roob ntawd yeej yuav txaav moog. Mej yuav ua tau txhua yaam huv tuabsi!

²¹[Tabsis mej yuavtsum thov Vaajtswv hab yoo mov, mej txhaj ntab tau yaam dlaab nuav.”]

²²Thaus Yexus hab nwg cov thwjtim tuaj ua ke rua huv lub xeev Kalilais, Yexus has rua puab tas, “Luas yuav nteg Tuabneeg Leej Tub coj moog tsimtxom.

²³Luas yuav muab nwg tua; tabsis peb nub nwg yuav sawv huv qhov tuag rov qaab lug.” Cov thwjtim nyuaj sab kawg le.

²⁴Thaus Yexus hab nwg cov thwjtim tuaj txug huv lub nroog Kapena-us, cov tuabneeg kws sau se rua lub Tuamtsev lug cuag Petus hab nug has tas, “Koj tug xwbfwb puas them se rua lub Tuamtsev?”

²⁵Petus teb has tas, “Them huas.” Thaus Petus moog rua huv tsev, Yexus txawm nug has tas, “Ximoos, koj xaav le caag? Leejtwg yog cov kws them se rua tej vaajntxwv huv nplajteb nuav? Puab cov tubki lossis lwm tug them?”

²⁶Petus teb has tas, “Lwm tug them xwb.” Yexus has tas, “Yog le ntawd tsi taag cov tubki yuav them le.

²⁷Tabsis peb tsi xob ua rua puab ntsawv sab? Koj ca le moog nuv ntseg nraag havtxwv. Thawj tug ntseg kws koj nuv tau, koj ca le muab lub qhovncauj rua, koj yuav pum ib lub nyaj nyob huv. Koj nqaa lub nyaj ntawd moog them kuv se hab koj se.”