Read Hmong Njua Mathais 27 Bible Online

Mathais 27 - Hmong Njua bible

Mathais 27

¹Thaus sawv ntxuv, cov thawj ntawm cov povthawj hab cov txwjlaug txawm saablaaj pum zoo has tas puab yuav coj Yexus moog tua povtseg.

²Puab muab saw hlau khi Yexus, hab coj moog rua Philaj kws yog cov tuabneeg Loos tug tswv xeev.

³Thaus Yudas tug kws ntxeev sab rua Yexus nov has tas, luas txav txim rua Yexus lawm, nwg tu sab heev, rua qhov nwg ua txhum lawm, ces nwg txawm nqaa peb caug lub nyaj rov qaab moog rua cov thawj ntawm cov povthawj hab cov txwjlaug.

⁴Nwg has tas, “Qhov kws kuv muab ib tug tuabneeg tsi tau ua txhum rua luas tua, yog kuv ua txhum lawm!” Puab teb has tas, “Peb tsi nrug koj paub, ntawd yog koj num xwb!”

⁵Yudas txawm muab cov nyaj ntawd pov rua huv lub Tuamtsev; ces nwg txawm moog dlai cejdlaab tuag lawm.

⁶Cov thawj ntawm cov povthawj txhaj khaws cov nyaj ntawd hab has tas, “Yog yuav muab cov nyaj nuav tso rua huv lub txhaab nyaj huv lub Tuamtsev, yuav txhum kevcai, rua qhov cov nyaj nuav yog nqe ntshaav.”

⁷Thaus puab saablaaj pum zoo lawm, puab txawm muab cov nyaj ntawd moog yuav tug kws Puab Laujkaub Aav Thaaj Teb, ca ua toj ntxaas log lwm Tsaav Tuabneeg.

⁸Tub yog vim le ntawd suavdlawg txhaj hu thaaj teb ntawd has tas, “Teb Ntshaav” lug txug naj nub nua.

⁹Tej nuav muaj kuas tav lawv le Yelemis kws yog tug cev Vaajtswv lug tau qha tseg lawm has tas: “Cov Yixalayees tub has hum lawm has tas, ib tug tuabneeg nqe taubhau tsuas yog peb caug lub nyaj xwb.

¹⁰Puab txhaj muab cov nyaj ntawd moog yuav tug kws puab laujkaub aav thaaj teb, lawv le tug Tswv tau has rua kuv lawm.”

¹¹Thaus Yexus sawv ntawm cov tuabneeg Loos tug tswv xeev xubndlag, nwg nug Yexus has tas, “Koj puas yog cov Yudais tug vaajntxwv?” Yexus teb has tas, “Koj yog tug kws has le ntawd.”

¹²Tabsis thaus cov thawj ntawm cov povthawj hab cov txwjlaug nkaug Yexus, Yexus tsi teb puab ib lus le.

¹³Philaj txhaj has rua Yexus has tas, “Koj tsi nov tej lug kws puab nkaug koj le los?”

¹⁴Tabsis Yexus tsi teb ib lus le, tug tswv xeev xaav tsi thoob, sov yog ua le caag Yexus txhaj tsi teb.

¹⁵Lawv le ibtxwm, txhua xyoo thaus txug lub caij ua Kevcai Hlaa Dlhau, cov tuabneeg Loos tug tswv xeev yuavtsum tso ib tug tuabneeg raug txim lawv le cov pejxeem thov. Puab thov tug twg nwg tso tug ntawd.

¹⁶Thaus ntawd muaj ib tug txivneej raug txim hu ua Yexus Npalanpas kws suavdlawg yeej paub nwg zoo.

¹⁷Thaus cov pejxeem tuaj ua ke coob coob, Philaj txawm nug puab has tas, “Mej xaav kuas kuv tso tug twg rua mej? Tso tug Yexus Npalanpas lossis tso Yexus tug kws hu ua Mexiyas?”

¹⁸Philaj paub has tas, puab khib, puab txhaj nteg Yexus coj tuaj rua nwg.

¹⁹Thaus Philaj nyob ntawm lub rooj has plaub, Philaj tug quaspuj khaiv tuabneeg tuaj has rua Philaj has tas: “Koj tsi xob ua le caag rua tug txivneej kws tsi muaj txim nuav, rua qhov naag mo kuv ua npau suav txug tug txivneej nuav, ua rua kuv nyuaj sab kawg le.”

²⁰Cov thawj ntawm cov povthawj hab cov txwjlaug ntxag cov pejxeem kuas thov Philaj tso Npalanpas, hab muab Yexus coj moog tua povtseg.

²¹Tabsis Philaj nug has tas, “Mej xaav kuas kuv tso ob tug nuav, tug twg rua mej?” Puab teb has tas, “Npalanpas!”

²²Philaj nug puab has tas, “Yog le ntawd, mej yuav kuas kuv ua le caag rua Yexus tug kws hu ua Mexiyas?” Puab teb has tas, “Muab nwg ntsa rua sau ntoo khaublig!”

²³Tabsis Philaj nug puab has tas, “Nwg ua txhum dlaabtsi?” Puab suavdlawg hajyam qw nrov nrov has tas, “Muab nwg ntsa rua sau ntoo khaublig!”

²⁴Thaus Philaj pum has tas, cov pejxeem yeej yuav ua kuas muaj kev kub ntxhuv xwb, nwg paab tsi tau Yexus lawm. Nwg txawm muab dlej lug ntxuav teg taabmeeg suavdlawg hab has tas, “Lub txim kws mej tua tug txivneej nuav, kuv tsi kaam ris, ca mej ris mej!”

²⁵Ces cov pejxeem suavdlawg teb has tas, “Lub txim kws peb tua tug txivneej nuav, ca peb hab peb cov mivnyuas ris!”

²⁶Philaj txawm tso Npalanpas rua puab, nwg kuas cov tubrog muab Yexus nplawm, hab coj moog ntsa rua sau ntoo khaublig.

²⁷Thaus ntawd, Philaj cov tubrog txawm coj Yexus moog rua huv tug tswv xeev lub tsev, hab cov tubrog txawm lug sawv vij Yexus.

²⁸Puab muab Yexus lub tsho hle, hab muab ib lub tsho ntev tsaamxem lab lug khu rua Yexus naav.

²⁹Puab muab maab xuavpaug lug ua kauj looj Yexus taubhau, hab muab ib tug lojkov rua Yexus saab teg xis tuav; puab txawm txhus caug ntawm Yexus xubndlag luag hab has lug saib tsi taug Yexus has tas, “Thov kuas cov Yudais tug Vaajntxwv muaj sa nyob ntev!”

³⁰Puab ntu quavncaug rua Yexus, hab muab tug lojkov lug ntaus Yexus taubhau.

³¹Thaus puab ua saib tsi taug Yexus taag lawm, puab muab lub tsho ntev tsaamxem lab ntawd hle, hab muab lub qub khu rov rua Yexus naav. Ces puab txawm coj Yexus tawm moog ntsa rua sau tug ntoo khaublig lawm.

³²Thaus puab taabtom moog puab ntsib ib tug txivneej hu ua Ximoos kws nyob huv lub nroog Khulenes tuaj.

³³Puab yuam nwg kwv Yexus tug ntoo khaublig moog txug ib qhov chaw hu ua Khaulakhauthas kws txhais has tas, “Pobtxhaa Taubhau,”

³⁴Puab muab kua ab xyaw cawv txiv maab rua Yexus haus; tabsis thaus Yexus saaj mivntsiv lawm, nwg tsi kaam haus.

³⁵Thaus puab muab Yexus ntsa rua sau ntoo khaublig lawm, puab muab nwg cev rig tsho lug twv saib leejtwg yuav tau yaam twg.

³⁶Puab ua le ntawd taag, ces puab txawm nyob quastsawg zuv nwg.

³⁷Puab muab ib dlaim txag sau nqai lug kws nkaug Yexus, ntsa rua sau tug ntoo khaublig, ncaaj ntawm Yexus taubhau rua sau has tas, “Tug nuav yog Yexus tug kws yog cov Yudais tug Vaajntxwv.”

³⁸Thaus ntawd puab muab ob tug tubsaab ntsa rua sau ob tug ntoo khaublig, muab ib tug txhus rua ntawm Yexus saab xis, hab muab ib tug txhus rua ntawm Yexus saab txhumphem.

³⁹Cov tuabneeg kws dlua kev, puab cu taubhau hab thuam Yexus has tas:

⁴⁰“Koj has tas koj yuav rhuav lub Tuamtsev, hab peb nub, koj yuav rov ua tau ib lub tshab! Yog koj yog Vaajtswv tug tub tag, koj ca le paab kuas koj dlim hab nqeg kag sau tug ntoo khaublig ko lug!”

⁴¹Cov thawj ntawm cov povthawj hab cov xwbfwb kws qha Vaajtswv txuj Kevcai puavleej thuam Yexus hab has tas,

⁴²“Nwg cawm tau lwm tug, tabsis nwg tsua paab tsi tau nwg! Nwg tsi yog cov Yixalayees tug Vaajntxwv los? Yog nwg nqeg sau tug ntoo khaublig lug taamsim nuav, peb txhaj yuav ntseeg nwg!

⁴³Nwg ca sab rua Vaajtswv hab has tas nwg yog Vaajtswv tug Tub. Yog le ntawd, peb sim saib, Vaajtswv puas yuav cawm kuas nwg dlim taamsim nuav!”

⁴⁴Txawm yog ob tug tubsaab kws raug ntsa rua sau ntoo khaublig ib yaam le Yexus los obtug kuj thuam Yexus hab.

⁴⁵Thaus nub ntseg, txawm tsaus ntuj nti thoob plawg lub tebchaws ntawd moog txug thaus peb teev.

⁴⁶Thaus peb teev ntawd, Yexus hu nrov nrov has tas, “Elis, Elis, lemas xanpathanis?” Lu lug ntawd txhais has tas, “Kuv tug Vaajtswv! Kuv tug Vaajtswv! Ua le caag koj tso kuv tseg lawm?”

⁴⁷Cov tuabneeg kws sawv ntawd muaj qee leej kws nov Yexus has le ntawd. puab has tas, “Nwg hu Eliyas!”

⁴⁸Taamsim ntawd, muaj ib tug txawm dlha moog muab ib lub taub ntxuav yag raus cawv txiv maab qaub chob rua ib tug lojkov cev moog rua Yexus haus.

⁴⁹Tabsis muaj dlua ib cov has tas, “Tog mivntsiv tsaiv, peb saib Eliyas puas yuav lug cawm kuas nwg dlim!”

⁵⁰Yexus rov quaj hu dlua ib zag nrov nrov, ces nwg txawm tu sav nrho lawm.

⁵¹Taamsim ntawd dlaim ntaub kws thaiv huv lub Tuamtsev ndluag rhe sau ti nkaus huv taw ua ob dlaig. Lub nplajteb ua zug koog, tej pobzeb pobtsuas tawg zum zawg.

⁵²tej qhov ntxaa txawm qheb, hab cov tuabneeg ntseeg Vaajtswv kws tuag lawm, muaj ntau leej muaj sa sawv rov lug.

⁵³Puab tawm huv qhov ntxaa lug, hab thaus Yexus sawv huv qhov tuag rov qaab lug lawm, ces puab txawm moog rua huv lub Nroog Yeluxalees, hab cov tuabneeg kws nyob huv muaj tau leej pum puab.

⁵⁴Thaus tug thawj tubrog hab cov tubrog kws zuv Yexus pum lub nplajteb ua zug koog hab pum txhua yaam kws muaj lug ntawd, puab ntshai kawg le. Hab puab sis thaam has tas, “Tug nuav yeej yog Vaajtswv tug Tub tag!”

⁵⁵Muaj ntau leej quaspuj tuaj sawv dleb dleb saib. Puab yog cov kws ibtxwm paab Yexus hab nrug Yexus tuaj peg Kalilais tuaj.

⁵⁶Cov quaspuj ntawd yog Malis Madalas, Malis tug kws yog Yakaunpaus hab Yauxej nam, hab muaj ib tug yog Xenpedais tug quaspuj.

⁵⁷Thaus yuav tsaus ntuj, muaj ib tug txivneej npluanuj, hu ua Yauxej kws nyob peg lub nroog Alimathas txawm tuaj txug. Nwg yog Yexus ib tug thwjtim hab,

⁵⁸nwg moog cuag Philaj hab thov Philaj muab Yexus lub cev rua nwg. Ces Philaj txhaj kuas puab moog muab Yexus lub cev rua Yauxej,

⁵⁹Yauxej muab ib chaws ntaub maag tshab lug qhwv Yexus lub cev,

⁶⁰hab kwv moog tso rua huv lub qhov ntxaa tshab kws nwg txaug tau rua huv ib phaab zeb. Nwg dlov ib dlaim txag zeb luj luj lug npug lub rooj ntxaas ca, hab nwg txawm moog tsev lawm.

⁶¹Malis Madalas hab muaj dlua ib tug Malis nyob ntawm rooj ntxaas saib.

⁶²Nub tom qaab kws yog nub Xanpataus, cov thawj ntawm cov povthawj hab cov Falixais moog cuag Philaj

⁶³hab has tas, “Peb ncu tau has tas, thaus tug tuabneeg dlaag ntawd tseem muaj sa nyob, nwg has tas, ‘Peb nub kuv yuav sawv rov qaab lug.’

⁶⁴Yog le ntawd, thov koj tso tuabneeg moog zuv lub qhov ntxaa zoo zoo kuas puv peb nub, nyob tsaam nwg cov thwjtim yuav tuaj nyag nwg lub cev hab moog qha rua suavdlawg has tas, nwg tub sawv huv qhov tuag rov qaab lug lawm. Ces zaaj kws puab dlaag ntawd, hajyam yuav phem heev dlua thawj zag.”

⁶⁵Philaj txawm has rua puab tas, “Mej ca le coj ib paab tubrog moog zuv lub qhov ntxaa zoo zoo lawv le mej zuv tau.”

⁶⁶Puab txawm moog nas homthawj rua dlaim txag zeb, hab tso tubrog zuv.