Read Hmong Njua Lukas 3 Bible Online

Lukas 3 - Hmong Njua bible

Lukas 3

¹Thaus Tinpeli-us ua vaajntxwv kaav tebchaws tau kaum tsib xyoos lawm, lub sijhawm ntawd Pauti-us Philaj ua tswv xeev kaav lub xeev Yudas. Helauj ua nom kaav lub xeev Kalilais hab Helauj tug kwv Filis ua nom kaav lub xeev Itule-as hab lub xeev Takaunitis; Lixaniyas ua nom kaav lub xeev Anpilees,

²Aanas hab Kayafas ua ob tug Povthawj Hlub. Lub sijhawm ntawd, Vaajtswv qha Vaajtswv txujlug rua Xakhaliyas tug tub Yauhaas tom roob mojsaab qhua.

³Yog le ntawd, Yauhaas txhaj moog qhuab qha thoob plawg cheebtsaam kws nyob ntawm tug Dlej Yauladees has tas, “Mej yuavtsum tso mej tej kev txhum tseg hab ua kevcai raus dlej, Vaajtswv txhaj yuav zaam txim rua mej.”

⁴Qhov nuav muaj lawv le Yaxayas tug kws cev Vaajtswv lug tau sau tseg rua huv nwg phoo ntawv has tas: “Muaj ib tug has nrov nrov tom roob mojsaab qhua has tas, ‘Ca le khu kev tog tug Tswv; khu kev kuas ncaaj nwg yuav lug!

⁵Txhub txhua lub kwj haa kuas puv, khawb txhua lub roob hab txhua lub pov roob kuas taj. Khu tej kev nkhaus kuas ncaaj, muab qhov sab hab qhov qeg pheej kuas taj xwmyeem.

⁶Txhua tsaav tuabneeg yuav pum Vaajtswv txujkev cawm dlim!’ ”

⁷Muaj tuabneeg coob coob tuaj cuag Yauhaas kuas Yauhaas muab puab ua kevcai raus dlej. Yauhaas has rua puab tas, “Cov nam naab! Leejtwg qha rua mej has tas, mej yuav tsiv dlim Vaajtswv txujkev txav txim kws tub lug yuav txug?

⁸Mej yuavtsum ua mej lub neej rua suavdlawg pum has tas, mej tub tso mej tej kev txhum tseg lawm. Mej tsi xob khaav has tas, Anplahaas yog mej yawmkoob. Kuv qha rua mej has tas, txawm yog Vaajtswv muab tej pobzeb nuav lug ua Anplahaas cov xeebntxwv los nwg yeej ua tau!

⁹Nwgnuav tub muab raab taus tso rua ntawm lub hauvpaug ntoo lawm, tub yuav ntuv tug ntoo; txhua tsob ntoo kws tsi txi cov txiv zoo, luas yuav muab ntuv hab muab pov rua huv cub suavtawg.”

¹⁰Cov tuabneeg coob coob ntawd nug Yauhaas has tas, “Yog le ntawd, peb yuav ua le caag?”

¹¹Yauhaas teb puab has tas, “Yog leejtwg muaj ob lub tsho, yuavtsum muab ib lub pub rua tug kws tsi muaj, hab yog leejtwg muaj mov muaj zaub, nwg yuavtsum muab faib rua tug kws tsi muaj.”

¹²Cov tuabneeg kws sau se muaj qee leej tuaj ua kevcai raus dlej, hab puab nug Yauhaas has tas, “Xwbfwb peb yuav ua le caag?”

¹³Yauhaas teb has tas, “Mej yuavtsum sau lawv le kevcai xwb, tsi xob sau tshaaj.”

¹⁴Cov tubrog muaj qee leej nug Yauhaas ib yaam nkaus has tas, “Ua le peb ne, peb yuav ua le caag?” Yauhaas teb has tas, “Mej tsi xob yuam leejtwg lossis ntxag luas nyaj yuav. Mej tau nyaj hli npaum le caag, ca le txaus sab yuav le ntawd xwb.”

¹⁵Cov tuabneeg kws ca sab ntsoov tog tug cawmseej xaav has tas, Yauhaas yog tug Mexiyas ntaag.

¹⁶Yauhaas has rua puab tas, “Kuv muab mej ua kevcai raus dlej, tabsis tug kws yuav lawv kuv qaab lug, nwg muaj Fwjchim Luj dlua kuv, kuv tub tsi tsimnyog dlaws nwg txuj nyuas hlua khau. Nwg yuav muab mej ua kevcai raus lug ntawm Vaaj Ntsujplig tug Dlawbhuv hab ntawm suavtawg.

¹⁷Nwg tuav rawv raab ntxuam, nwg yuav ntxuaj nwg pawg nplej, kuas cov npluag yaa tawm huv tuabsi. Nwg yuav muab cov nplej zoo ntim rua huv nwg lub txhaab, tabsis nwg yuav muab cov npluag pov rua huv cub suavtawg kws cig tsi paub tuag.”

¹⁸Yauhaas qha Txujmoo Zoo ntau zaaj tsi sis thooj ntuag cov tuabneeg ntawd, kuas puab hloov puab lub sab.

¹⁹Tabsis Yauhaas tshev Helauj tug kws ua nom kaav lub xeev Kalilais, rua qhov Helauj yuav Helaudias kws yog Helauj tug kwv tug quaspuj, hab Helauj ua ntau yaam phem.

²⁰Helauj tseem ua ib qhov phem ntxiv kws yog nwg nteg Yauhaas coj moog kaw rua huv tsev lojcuj.

²¹Tom qaab kws suavdlawg ua kevcai raus dlej taag lawm, Yexus ua kevcai raus dlej hab. Thaus Yexus taabtom thov Vaajtswv, rooj ntug txawm qheb hlo,

²²hab Vaaj Ntsujplig tug Dlawbhuv kws muaj lub cev zoo le tug nquab lug rua sau Yexus. Hab muaj ib lub suab has sau ntuj tuaj rua Yexus has tas, “Koj yog kuv tug Tub kws kuv hlub, kuv txaus sab rua koj.”

²³Thaus Yexus pib ua num, nwg noobnyoog muaj kwvlaam le peb caug xyoo. Lawv le suavdlawg xaav, Yexus yog Yauxej tub, Yauxej yog Helis tub,

²⁴Helis yog Mathas tub, Mathas yog Levis tub, Levis yog Melekhis tub, Melekhis yog Yaanais tub, Yaanais yog Yauxej tub,

²⁵Yauxej yog Matatiyas tub, Matatiyas yog Amaus tub, Amaus yog Nahus tub, Nahus yog Exalis tub, Exalis yog Nakhais tub,

²⁶Nakhais yog Ma-as tub, Ma-as yog Matatiyas tub, Matatiyas yog Xemis tub, Xemis yog Yauxes tub, Yauxes yog Yaudas tub,

²⁷Yaudas yog Yau-anaas tub, Yau-anaas yog Lexas tub, Lexas yog Xelunpanpees tub, Xelunpanpees yog Se-atiyees tub, Se-atiyees yog Nelis tub,

²⁸Nelis yog Melekhis tub. Melekhis yog Adis tub, Adis yog Kauxas tub, Kauxas yog Emadas tub, Emadas yog Eles tub,

²⁹Eles yog Yausuas tub, Yausuas yog Eli-exes tub, Eli-exes yog Yaulimes tub, Yaulimes yog Mathas tub, Mathas yog Levis tub,

³⁰Levis yog Xime-oos tub, Xime-oos yog Yudas tub, Yudas yog Yauxej tub, Yauxej yog Yaunames tub, Yaunames yog Eliyakees tub,

³¹Eliyakees yog Mele-as tub, Mele-as yog Menas tub, Menas yog Matathas tub, Matathas yog Nathaas tub, Nathaas yog Daviv tub.

³²Daviv yog Yexais tub, Yexais yog Aunpes tub, Aunpes yog Npau-am tub, Npau-am yog Xamoos tub, Xalemoos yog Nasoos tub,

³³Nasoos yog Aminadas tub, Aminadas yog Amis tub, Amis yog Anis tub, Anis yog Heloos tub, Heloos yog Peles tub, Peles yog Yudas tub,

³⁴Yudas yog Yakhauj tub, Yakhauj yog Ixaj tub, Ixaj yog Anplahaas tub, Anplahaas yog Telas tub, Telas yog Nahaus tub,

³⁵Nahaus yog Xelus tub, Xelus yog Le-us tub, Le-us yog Pelej tub, Pelej yog Enpes tub, Enpes yog Selas tub,

³⁶Selas yog Kainas tub, Kainas yog Afaxas tub,. Afaxas yog Xees tub, Xees yog Nau-es tub, Nau-es yog Lamej tub,

³⁷Lamej yog Methuxelas tub, Methuxelas yog Enauj tub, Enauj yog Yales tub, Yales yog Mahalalees tub, Mahalalees yog Kenaas tub,

³⁸Kenaas yog Enauses tub, Enauses yog Xej tub, Xej yog Adaas tub, Adaas yog Vaajtswv tub.