Read Hmong Njua 2 Kevcai 13 Bible Online

2 Kevcai 13 - Hmong Njua bible

2 Kevcai 13

¹“Yog muaj ib tug cevlug lossis ib tug txawj txhais npau suav has tas, yuav muaj tej txujci tseemceeb lossis tej xwmtxheej kws ua rua suavdlawg xaav tsi thoob,

²coj mej moog pe puab tej vaajtswv kws mej tsi tau pe dlua. Txawm yog tej kws nwg has ntawd muaj tseeb

³los mej tsi xob ntseeg tej lug kws nwg has ntawd le. Rua qhov tug TSWV kws yog mej tug Vaajtswv siv nwg sim mej sab, saib mej puas hlub tug TSWV kawg sab kawg ntsws tag.

⁴Mej yuavtsum ua lawv le tug TSWV tej lug hab fwm nwg; ua lawv le nwg tej kevcai hab noog nwg lug; muab sab npuab hab pehawm nwg.

⁵Mej ca le muab tug kws txawj txhais npau suav lossis tug cevlug kws qha kuas mej ntxeev sab rua tug TSWV kws tso mej dlim kev ua qhev nraag tebchaws Iziv lug tua povtseg. Tug ntawd yog tuabneeg phem, nwg ntxag kuas mej muab txujkev kws tug TSWV qha rua mej coj tso povtseg. Mej yuavtsum muab tug ntawd tua, mej txhaj dlim txujkev phem nuav.

⁶“Txawm yog koj tug kwvtij kws koom nam koom txiv, lossis koj tej tub tej ntxhais, koj tug quaspuj kws koj hlub, lossis koj tug phoojywg zoo, yum koj tuabywv has tas, peb ca le moog pe lwm tug vaajtswv kws koj hab koj cov yawmkoob tsi tau pe dlua le.

⁷Puab cov nuav ib tug yuav ntxag hab yum kuas koj ca le moog nrug cov tuabneeg kws nyob dleb lossis nyob ze koj pe puab tej vaajtswv,

⁸los koj tsi xob ca nwg ntxag tau koj; tsi xob noog nwg has. Tsi xob mov lossis taabncuab nwg, hab tsi xob npog nwg.

⁹Ca le muab nwg tua! Koj yog thawj tug kws muab pobzeb ntaus nwg, ces suavdlawg maam le ntaus tom qaab.

¹⁰Ca le muab pobzeb ntaus kuas nwg tuag! Rua qhov nwg txhobtxwm coj mej tawm ntawm tug TSWV kws yog mej tug Vaajtswv kws coj mej tawm nraag tebchaws Iziv kws mej ua luas qhev lug.

¹¹Thaus cov Yixalayees nov txug zaaj nuav; puab txhaj ntshai hab tsi muaj leejtwg moog ua txujkev phem nuav lawm.

¹²“Thaus mej nyob huv tej nroog kws tug TSWV kws yog mej tug Vaajtswv muab rua mej, mej yuav nov

¹³cov tuabneeg phem qee leej huv mej tsaav tuabneeg tau coj mej cov tuabneeg kws nyob huv puab tej nroog moog pe tej vaajtswv kws mej tsi tau pe dlua le.

¹⁴Yog mej nov tej zaaj tsi zoo le ntawd, mej yuavtsum maaj nrooj moog tshuaj saib puas muaj tseeb; yog muaj tug tau moog ua phem ua qas le ntawd tag,

¹⁵ces ca le muab cov tuabneeg huv lub nroog hab puab tej tsaj txhu tua kuas tuag taag hab rhuav puab lub nroog kuas puamtsuaj taag huv tuabsi.

¹⁶Ca le moog sau cov tuabneeg ntawd tej khoom lug tso ua ib pawg rua ntawm tshaav puam huv lub nroog, ces muab lub nroog hab txhua yaam hlawv ua khoom fij rua tug TSWV kws yog mej tug Vaajtswv. Ca lub nroog ntawd pemsij moog ibtxhis tsi xob tsim dlua ntxiv lawm.

¹⁷Mej tsi xob yuav tej khoom kws yuav muab hlawv fij rua tug TSWV ib yaam le. Tug TSWV txhaj yuav taabncuab mej hab tsi chim rua mej. Nwg yuav taabncuab mej hab pub kuas mej fuamvaam coob lawv le nwg tau coglug tseg rua mej cov yawmkoob lawm,

¹⁸rua qhov mej ua lawv le tug TSWV kws yog mej tug Vaajtswv tej lug kws nub nua kuv qha rua mej.