Read Hmong Njua 2 Kevcai 21 Bible Online

2 Kevcai 21 - Hmong Njua bible

2 Kevcai 21

¹“Yog mej pum ib tug tuabneeg tuag rua tom tej taj nraag huv mej lub tebchaws kws tug TSWV kws yog mej tug Vaajtswv muab rua mej, tabsis tsi paub tas leejtwg tua.

²Mej cov thawjcoj hab cov txav txim yuav tau moog ntsuag saib thaaj chaw kws tug tuag nyob ze lub nroog twg tshaaj,

³ces cov thawjcoj kws nyob huv lub nroog kws ze tug tuag tshaaj, yuavtsum xaiv ib tug xyuas nyuj kws tsi tau siv laij teb dlua le;

⁴kuas puab caab tug nyuj ntawd moog rua ntawm ib lub haav kws muaj dlej tsi nqhuab le, hab yog ib thaaj chaw kws tsi tau muaj leejtwg khawb cog ib yaam qoob dlaabtsi le, ces puab muab tug nyuj luv cejdlaab rua qhov ntawd.

⁵Cov povthawj yuavtsum moog rua ntawm thaaj chaw ntawd, rua qhov tug TSWV kws yog mej tug Vaajtswv xaiv puab lug ua nwg teg num ntawd, hab tuav tug TSWV lub npe foom koob moov. Puab yog cov kws txav txim sab rua tej plaub ntug kws tuag le ntawd kuas taag.

⁶Ces cov thawjcoj kws nyob huv lub nroog kws ze rua tug tuag ntawd, puab yuav ntxuav teg rua sau tug nyuj,

⁷hab has tas, ‘Peb tsi tau tua tug tuabneeg nuav, hab peb tsi paub has tas yog leejtwg tua.

⁸Tug TSWV, thov koj zaam txim rua koj tsaav tuabneeg Yixalayees kws koj tau cawm puab dlim nraag tebchaws Iziv lug; hab thov tsi xob pub tug tuabneeg kws tsi muaj txim nuav cov ntshaav lug raug koj tsaav tuabneeg Yixalayees.’

⁹Yog mej ua lawv le tej lug kws tug TSWV kuas mej ua, mej txhaj yuav tsi tau ris tug kws tua tug tuabneeg ntawd lub txim.

¹⁰“Thaus tug TSWV kws yog mej tug Vaajtswv pub mej tua yeej mej cov yeebncuab lawm, yog mej nteg tau tej tuabneeg lug,

¹¹cov tuabneeg kws mej nteg tau lug ntawd, yog muaj ib tug hluas nkauj zoo nkauj kws mej nyam hab xaav yuav ua quaspuj,

¹²mej ca le coj tug hluas nkauj ntawd moog huv mej tsev, kuas nwg chais nwg cov plaubhau, txav nwg cov rau teg,

¹³hab hloov khaub dluag. Ca nwg nyob huv tsev quaj ntsuag nwg nam hab nwg txiv ib lub hlis; mej maam le yuav nwg ua quaspuj.

¹⁴Tom qaab ntawd, yog koj tsi xaav yuav nwg lawm, koj yuavtsum tso nwg moog dlawb moog dlo, tsi xob muab nwg muag lossis saib nwg zoo le tug ntxhais qhev, rua qhov koj tsi yuav nwg lawm.

¹⁵“Yog has tas, ib tug txivneej muaj ob tug quaspuj, hab ob tug quaspuj ntawd puavleej yug tau tub rua nwg, tabsis tug tub hlub tsi yog tug quaspuj kws nwg nyam dlua yug.

¹⁶Thaus leej txiv faib nwg tej qubtxeeg qubteg rua nwg cov tub, nwg tsi xob muab tug tub hlub ntawd feem rua tug tub kws yog tug quaspuj kws nwg nyam dlua yug yuav.

¹⁷Tabsis leej txiv yuavtsum muab nwg tej qubtxeeg qubteg faib ob npaug rua tug tub hlub, txawm yog tug tub ntawd tsi yog tug quaspuj kws nwg nyam dlua yug los xij. Leej txiv yuavtsum tau leeg paub nwg tug tub hlub, hab faib nwg tug rua nwg lawv le txuj cai kws nwg yog tug tub hlub.

¹⁸“Yog leejtwg muaj ib tug tub kws tawv ncauj, ntxeev sab hab tsi fwm nam txiv, txawm yog nwg nam hab nwg txiv qhuab ntuag nwg los nwg tsi noog le.

¹⁹Nwg nam hab nwg txiv ca le coj nwg moog cuag cov thawjcoj huv puab lub nroog hab kuas nwg moog sawv ntawm qhov chaw txav txim;

²⁰Ces obtug has rua cov thawjcoj tas, ‘Wb tug tub nuav tawv ncauj, ntxeev sab hab tsi noog wb tej lug qhuab ntuag le; nwg muab tej nyaj coj moog siv ua phuam laam taag, hab ua tuabneeg quav cawv.’

²¹Ces cov txivneej huv lub nroog ntawd ca le muab pobzeb ntaus tug tub ntawd kuas tuag, mej txhaj tshem tau txujkev phem kev qas ntawd moog. Cov Yixalayees txhua tug kws nov zaaj nuav yuav ntshai heev.

²²“Yog muaj ib tug txivneej twg ua txhum luj, nwg raug muab dlai cejdlaab tuag,

²³tsi xob ca dlai ib mos rua ntawd. Mej yuavtsum muab nwg lub cev txu moog log nub ntawd, rua qhov lub cev tuag kws dlai le ntawd, yuav ua rua Vaajtswv foom phem rua mej lub tebchaws. Mej ca le muab tug tuag lub cev log, txhaj tsi ua rua lub tebchaws kws tug TSWV kws yog mej tug Vaajtswv muab rua mej tsi huv.