Read Hmong Njua 2 Kevcai 22 Bible Online

2 Kevcai 22 - Hmong Njua bible

2 Kevcai 22

¹“Yog mej pum mej ib tug kwvtij Yixalayees twg tug nyuj lossis tug yaaj yuam kev tuaj rua ntawm mej, mej tsi xob ua tug tsi pum, mej ca le coj tug tsaj ntawd moog rua tug tswv.

²Yog has tas tug tswv nyob dleb lossis mej tsi paub has tas tug tswv yog leejtwg, mej ca le coj tug tsaj ntawd lug rua ntawm mej tsev, hab paab ceev tseg moog txug thaus tug tswv tsaj tuaj nrhav, mej maam le muab rua tug tswv coj rov moog tsev.

³Yog mej pum mej cov kwvtij Yixalayees ib tug twg tug neeg luav, nwg tej tsoog tsho lossis ib yaam dlaabtsi kws pluj lawm los mej ua ib yaam le ntawd.

⁴“Yog mej moog pum mej ib tug kwvtij Yixalayees twg ib tug neeg luav lossis ib tug nyuj qaug rua ntawm kev, mej tsi xob ua tug tsi pum; mej ca le paab muab tug tsaj ntawd tsaa sawv.

⁵“Tej quaspuj tsi xob naav txivneej tej tsoog tsho hab tej txivneej los tsi xob naav quaspuj tej tsoog tsho; tug TSWV kws yog mej tug Vaajtswv ntxub cov tuabneeg kws naav le ntawd.

⁶“Yog mej pum zeg noog nyob sau ntoo lossis huv aav kws tug puj noog tseem puag qai lossis puag mivnyuas, mej tsi xob tua tug puj.

⁷Mej muab tau cov mivnyuas, tabsis mej yuavtsum tso tug puj moog, yog mej ua le ntawd, mej txhaj noj qaab nyob zoo hab muaj sa nyob ntev.

⁸“Thaus mej ua tsev tshab, mej yuavtsum xov puagncig lub ruv tsev tug npoo, tuabneeg txhaj tsi poob hab tuag, mej txhaj tsi tau ris lub txim ntawd.

⁹“Tsi xob cog lwm yaam qoob rua huv mej dlaim teb txiv maab, yog mej cog ob yaam sis xyaw, tug TSWV yuav txwv tsi pub mej dle tej txiv maab lossis sau tej qoob kws mej cog xyaw ntawd.

¹⁰“Mej tsi xob muab nyuj hab neeg luav lug ua ib nkawg hai tuab raab khais laij teb.

¹¹“Mej tsi xob naav tej tsoog tsho kws muab xuv plaub yaaj hab xuv maaj lug ntus ua ke.

¹²“Mej yuavtsum ntxhoo ntxhuav rua ntawm dlaim ntaub kws mej npua plaub ceg kaum.

¹³“Yog leejtwg yuav tau quaspuj hab tom qaab kws nwg nrug tug quaspuj ntawd pw taag, nwg tsi nyam tug quaspuj ntawd;

¹⁴hab nwg lam has tas tug quaspuj tsi yog nkaujxwb, nwg tub ntxag hluas nraug ua ntej obtug sis yuav lawm.

¹⁵“Yog muaj le ntawd, tug ntxhais nam hab txiv yuavtsum nqaa dlaim ntaub pua chaw kws lu ntshaav moog ua povthawj rua cov txwjlaug huv tsev tu plaub huv lub nroog has tas, obtug tug ntxhais tseem yog nkaujxwb.

¹⁶Tug ntxhais leej txiv has rua cov txwjlaug tas, ‘Kuv muab kuv tug ntxhais qua rua tug txivneej nuav, tabsis nwg tsi nyam kuv tug ntxhais.

¹⁷Nwg lam has tas thaus nwg yuav kuv tug ntxhais, kuv tug ntxhais tub xub ntxag hluas nraug lawm, tabsis mej saib dlaim ntaub pua chaw kws lu ntshaav nuav; yog dlaim kws qha has tas kuv tug ntxhais tsi tau ntxag dlua hluas nraug.’

¹⁸Ces cov txwjlaug huv lub nroog ca le muab tug txivneej ntawd nplawm;

¹⁹hab puab muab nwg nplua ib puas dlaim nyaj lug khu tug ntxhais nam hab txiv rua qhov tug txivneej ntawd ua rua cov Yixalayees tej ntxhais poob ntsejmuag heev. Tug txivneej ntawd yuavtsum yuav tug quaspuj, hab tsi pub nwg nrauj moog taag simneej.

²⁰“Tabsis yog has tas, qhov kws tug txivneej has ntawd yeej muaj tseeb tag, hab yog tsi muaj povthawj has tas, tug ntxhais tseem yog nkaujxwb,

²¹ces puab ca le coj tug ntxhais tawm huv nam txiv tsev moog rua saab nrau qhovrooj, ca cov txivneej kws nyob huv lub nroog muab pobzeb ntaus tug ntxhais ntawd kuas tuag, rua qhov thaus nwg tseem nrug nwg nam nwg txiv nyob, nwg tau ntxag hluas nraug ua ntej yuav quasyawg, ua rua tsaav tuabneeg Yixalayees poob ntsejmuag. Mej ua le ntawd txhaj tshem tau tej kev phem kev qas tawm huv mej moog.

²²“Yog nteg tau ib tug txivneej, thaus nwg nrug lwm tug txivneej tug quaspuj pw, yuavtsum muab tug hluas nraug hab tug quaspuj ntawd tua povtseg huv tuabsi. Mej ua le ntawd txhaj tshem tau tej kev phem kev qas tawm huv mej moog.

²³Yog nteg tau ib tug txivneej huv nroog, vim nwg moog nrug tug hluas nkauj kws luas tub qhab lawm pw.

²⁴Mej ca le coj obtug tawm moog rua saab nrau ntug nroog hab muab pobzeb ntaus kuas obtug tuag huv tuabsi. Tug ntxhais tuag, vim nwg nyob huv nroog hab nwg tsi qw thov luas paab. Tug hluas nraug tuag, vim nwg moog ntxag tug ntxhais kws luas tub qhab lawm. Mej ua le ntawd txhaj tshem tau tej kev phem kev qas huv mej moog.

²⁵“Yog has tas, muaj ib tug txivneej moog ntsib ib tug ntxhais kws luas tub qhab lawm, nwg ca le muab mos tom xubtsuag, ces tsuas muab tug txivneej tua povtseg xwb;

²⁶tsi xob ua le caag rua tug ntxhais, rua qhov nwg tsi tau ua txhum kws tsimnyog muab nwg tua. Rooj plaub nuav txav txim ib yaam le ob tug txivneej sis ntaus kws ib tug muab ib tug ntaus tuag lawm.

²⁷Rua qhov tug txivneej ntawd moog mos tug ntxhais kws luas tub qhab lawm nyob dleb nroog, txawm yog tug ntxhais ntawd qw thov tuabneeg paab los tsi muaj leejtwg nov hab paab nwg.

²⁸“Yog muaj ib tug txivneej moog mos tug ntxhais kws luas tsi tau qhab,

²⁹tug txivneej ntawd yuavtsum them tsib caug dlaim nyaj rua tug ntxhais ntawd nam hab txiv, hab nwg yuav tug ntxhais ntawd ua quaspuj, rua qhov nwg txhobtxwm yuam tug ntxhais ntawd. Tsi pub nwg nrauj tug quaspuj ntawd moog taag simneej le.

³⁰“Tsi pub leejtwg nrug nwg txiv tug quaspuj pw, rua qhov ua le ntawd rhuav leej txiv ntsejmuag heev.