Read Hmong Njua 2 Kevcai 30 Bible Online

2 Kevcai 30 - Hmong Njua bible

2 Kevcai 30

¹Mauxes has tas, “Kuv ca mej xaiv saib, mej yuav tej lug foom koob moov lossis tej lug foom phem. Thaus muaj tej xwm nuav lug raug mej hab thaus tug TSWV kws yog mej tug Vaajtswv ntab mej moog nrug lwm tsaav tuabneeg nyob, mej yuav ncu txug tej kws kuv kuas mej xaiv nuav.

²Yog mej hab mej tej tubki rov lug cuag tug TSWV, hab ua lawv le nwg tej kevcai kws nub nua kuv qha rua mej kawg sab kawg ntsws,

³tug TSWV kws yog mej tug Vaajtswv yuav taabncuab mej. Nwg yuav coj mej tawm huv txhua lub tebchaws kws nwg ntab mej moog nyob rov lug, hab nwg yuav pub kuas mej lub neej rov vaammeej dlua.

⁴Txawm yog mej tsiv moog nyob rua txhua ceg kaum ntuj lawm los tug TSWV kws yog mej tug Vaajtswv yuav coj mej rov lug,

⁵mej yuav tau kaav lub tebchaws kws thaus u mej cov yawmkoob nyob lug lawm. Tug TSWV yuav pub kuas mej fuamvaam hab vaammeej tshaaj mej cov yawmkoob.

⁶Tug TSWV kws yog mej tug Vaajtswv yuav pub lub sab kws paub noog lug rua mej hab mej tej xeebntxwv, mej txhaj muab sab npuab tug TSWV hab hlub nwg kawg sab kawg ntsws, hab mej yuav nyob huv lub tebchaws ntawd moog le.

⁷Nwg yuav muab tej lug foom phem nuav rua mej tej yeebncuab kws ntxub hab tsimtxom mej,

⁸mej txhaj yuav noog nwg lug hab ua lawv le nwg tej kevcai txhua nqai kws nub nua kuv qha rua mej.

⁹Tug TSWV yuav pub kuas tej kws mej ua vaammeej; mej yuav muaj tubki hab muaj tsaj txhu coob ua npoj ntwg, hab mej tej teb yuav ntsu qoob. Tug TSWV yuav txaus sab ua kuas mej vaammeej ib yaam le nwg ua rua mej cov yawmkoob vaammeej,

¹⁰tabsis mej yuavtsum noog nwg lug hab coj lawv le nwg tej kevcai kws sau rua huv phoo ntawv nuav txhua nqai huv tuabsi. Mej yuavtsum tig rov lug muab sab npuab tug TSWV kuas kawg sab kawg ntsws.

¹¹“Tej kevcai kws nub nua kuv qha rua mej, mej tsi xob xaav has tas, nyuaj hab coj tsi tau.

¹²Tej kevcai nuav tsi yog nyob sau ntuj. Tsi taag mej yuav nug has tas, ‘Leejtwg yuav nce moog muab lug rua peb, kuas peb txhaj nov hab coj lawv le ntawd?’

¹³Tej kevcai ntawd tsi yog nyob saab ntug havtxwv tim u. Tsi taag mej yuav nug has tas, ‘Leejtwg yuav hlaa havtxwv moog muab lug rua peb, kuas peb txhaj nov hab coj lawv le ntawd.’

¹⁴Tej kevcai ntawd nyob ntawm mej nuav ntaag. Mej yeej paub hab nyob huv mej lub sab, mej ca le ua lawv le ntawd.

¹⁵“Nub nua kuv ca mej xaiv, saib mej yuav qhov phem lossis qhov zoo, mej yuav txujsa lossis kev tuag.

¹⁶Yog has tas mej noog hab ua lawv le tug TSWV kws yog mej tug Vaajtswv tej lug kws nub nua kuv qha rua mej, yog mej hlub nwg, noog nwg lug hab coj lawv le nwg tej kevcai, mej yuav vaammeej hab ua ib tsaav tuabneeg coob heev. Tug TSWV kws yog mej tug Vaajtswv yuav foom koob moov rua lub tebchaws kws mej yuav moog nyob.

¹⁷Tabsis yog mej tsi noog nwg lug, tsi ua lawv le nwg tej lug qha, hab ca luas coj mej moog pe luas tej vaajtswv,

¹⁸nub nua kuv has rua mej tas, mej yuav raug kev puamtsuaj. Mej yuav tsi tau nyob ntev huv lub tebchaws kws mej yuav hlaa tug Dlej Yauladees moog tua hab nyob.

¹⁹Nwgnuav kuv ca mej xaiv, saib mej yuav txujsa lossis yuav kev tuag, mej yuav tej lug foom koob moov lossis tej lug foom phem; kuv thov lub ntuj lub teb nrug ua timkhawv rua tej kws nub nua mej xaiv. Mej ca le xaiv txujsa.

²⁰Hlub tug TSWV kws yog mej tug Vaajtswv, ua lawv le nwg tej lug qha hab muab sab npuab nwg. Mej hab mej tej xeebntxwv txhaj muaj sa nyob ntev huv lub tebchaws kws tug TSWV tau coglug tseg rua mej yawmkoob Anplahaas, Ixaj hab Yakhauj lawm.”