Read Hmong Njua 2 Kevcai 32 Bible Online

2 Kevcai 32 - Hmong Njua bible

2 Kevcai 32

¹“Lub ntuj noog kuv tej lug, lub nplajteb nov kuv has.

²Kuv tej lug qha yuav poob lug ib yaam le naag, hab teev ib yaam le lub lwg dlej rua huv nplajteb. Kuv tej lug yuav poob ib yaam le lug naag tshauv rua tej qoobloo, hab ib yaam le kob naag lug rua sau tej nroj tsuag.

³Kuv yuav qhuas tug TSWV lub npe, hab nwg tsaav tuabneeg yuav qhuas nwg lub fwjchim kws luj kawg nkaus.

⁴“Tug TSWV yog lub pobzeb kws tiv thaiv mej, nwg yog tug kws zoo kawg nkaus, tej kws nwg ua yeej ncaaj nceeg; mej tug Vaajtswv yog tug ncaaj hab tseeb; nwg ua qhov yog hab qhov tseeb xwb.

⁵Tabsis mej ua tsi ncaaj, tsi tsimnyog mej ua nwg tsaav tuabneeg, mej yog tsaav tuabneeg txhum hab dlaag.

⁶Cov tuabneeg ruag hab tsi txawj xaav, puas tsimnyog mej ua le nuav rua tug TSWV? Nwg tsi yog mej Txiv, nwg tsi yog tug tsim mej, hab nwg tsi yog tug kws ua rua mej caj ua ib tsaav tuabneeg los?

⁷“Ncu ntsoov tej xwmtxheej yaav taag lug, hab xaav txug tej tuabneeg ntau tam thaus u; ca le nug mej txiv kuas qha mej, saib muaj dlaabtsi tshwmsim, ca le nug tej laug, puab yuav pav yaav taag lug rua mej noog.

⁸Tug TSWV kws muaj fwjchim luj kawg nkaus faib tebchaws rua txhua tsaav tuabneeg; nwg kuas nyag nyob muaj nyag nrim lawv le tej tsaav tuabneeg kws muaj coob lossis muaj tsawg.

⁹Tabsis nwg xaiv Yakhauj cov xeebntxwv ua nwg tsaav tuabneeg.

¹⁰“Nwg pum puab moog moog lug lug tom taj suabpuam kws qhuav qhawv hab cua ntsawj nrov vwg; tug TSWV hlub hab tsomkwm puab ib yaam le nwg txuag nwg lub qhovmuag.

¹¹Tug TSWV tsomkwm tsi pub cov Yixalayees poob, ib yaam le tug dlaav qha nwg tej mivnyuas yaa, Nwg muab nwg ob phaab tis txais tsi pub tej mivnyuas poob.

¹²Tug TSWV tuab leeg coj nwg tsaav tuabneeg, nwg tsi yuav lwm tsaav tuabneeg tug vaajtswv paab.

¹³“Nwg ca puab kaav tej qhov chaw sab, puab yuav tau noj tej qoobloo huv puab tej laj teb. Puab yuav tau haus tej zib ntaab ntawm tej pobtsuas, hab puab tej txiv ntoo roj yuav txi ncw ntawm thaaj aav kws muaj pobzeb.

¹⁴Puab tej nyuj tej tshis yuav muaj kua mig ntau; puab muaj tej yaaj tej tshis hab tej nyuj, tej qeb hab tej cawv txiv maab kws zoo kawg nkaus.

¹⁵“Tug TSWV tsaav tuabneeg npluanuj, tabsis puab yog tuabneeg ntxeev sab; puab rog vim puab tau noj tau haus tsau npo. Puab tsi leeg paub Vaajtswv tug kws tsim puab, hab puab tso puab tug Cawmseej kws muaj fwjchim tseg.

¹⁶Puab pe mlom, ua rua tug TSWV khib puab heev, puab ua kev phem kev qas ua rua tug TSWV npautawg rua puab.

¹⁷Puab tua tsaj fij rua tej vaajtswv kws tsi yog vaajtswv, yog tej vaajtswv kws puab cov yawmkoob tsi tau pe dlua, tej dlaab ntawd cov Yixalayees tsi coj hab tsi tau pehawm dlua le.

¹⁸Puab tsi ncu qaab puab tug Vaajtswv, tug Cawmseej kws muaj fwjchim, hab tug kws pub txujsa rua puab lawm.

¹⁹“Thaus tug TSWV pum tej nuav, nwg npautawg kawg le, nwg txhaj tso nwg tej tub tej ntxhais tseg.

²⁰Tug TSWV has tas, ‘Kuv yuav tsi paab puab lawm, kuv yuav saib puas muaj xwm dlaabtsi lug raug puab, puab yog tuabneeg tawv ncauj, hab tsi ntseeg kuv.

²¹Kuv chim rua puab vim puab tej mlom. Puab pe tej vaajtswv kws tsi yog Vaajtswv, ua rua kuv khib. Kuv yuav tso ib paab tuabneeg kws tsi muaj tebchaws tuaj zig kuas puab chim; hab tso ib tsaav tuabneeg ruag tuaj ua kuas puab khib.

²²Kuv txujkev chim yuav cig ib yaam le nplaim tawg hab yuav kub txhua yaam kws nyob huv nplajteb nuav. Cov nplaim tawg yuav kub moog kuas txug huv tubtuag teb hab yuav kub moog kuas ti rua huv qaab tivtxwv roob.

²³“ ‘Kuv yuav tso kev siv kev npug lug rua puab ib yaam taag ib yaam tuaj, hab tua kuv tej xub vug tawmtsaam puab.

²⁴Puab yuav tuag tshaib hab tuag mob tuag ntsaaj; puab yuav tuag taag rua tej kaab mob phem, kuv yuav tso tej tsaj qus lug tawmtsaam puab, hab tso tej naab muaj taug lug tum puab.

²⁵Yuav muaj tuabneeg raug nav ntaaj tuag pawg lug ntawm tej kev; tej tuabneeg kws nyob huv tsev yuav ntshai ua plhu thumxem taag, hab tej tub hluas ntxhais hluas yuav tuag taag; tej mivnyuas mog lossis tej laug kws dlawb hau paug los yuav tuag taag.

²⁶Kuv yuav ua kuas puab puamtsuaj huv tuabsi, yuav tsi muaj leejtwg ncu txug puab lawm.

²⁷Kuv yuav tsi pub puab cov yeebncuab khaav has tas, puab tua yeej kuv tsaav tuabneeg, tabsis yog kuv ua rua kuv tsaav tuabneeg puamtsuaj xwb.’

²⁸“Cov Yixalayees yog ib tsaav tuabneeg kws tsi txawj xaav, puab tsi muaj tswvyim le.

²⁹Puab tsi paub has tas yog le caag puab txhaj swb; Puab tsi totaub has tas vim le caag puab raug tej ntawd.

³⁰Vim le caag luas ib leeg tua yeej mej ib txheeb leej, hab vim le caag luas ob leeg tua yeej mej kaum txheeb leej? Tub yog tug TSWV kws yog puab tug Vaajtswv tso puab tseg lawm; puab tug Vaajtswv kws muaj fwjchim luj muab puab cob rua puab cov yeebncuab.

³¹Puab cov yeebncuab yeej paub has tas, puab tej vaajtswv tsi muaj fwjchim npaum le cov Yixalayees tug Vaajtswv.

³²Puab cov yeebncuab ua kev phem kev qas ib yaam le cov tuabneeg huv lub nroog Xaudoos hab lub nroog Kaumaulas, ib yaam le tsob txiv maab kws txi txiv ab lom tuabneeg tuag,

³³ib yaam le cov cawv kws muab taug naab ua.

³⁴“Tug TSWV ncu ntsoov tej kws puab cov yeebncuab tau ua taag lug; Nwg tog txug sijhawm, ces nwg yuav rau txim rua puab.

³⁵Tug TSWV yuav pauj hab rau txim rua puab; nub kws puab raug kev puamtsuaj tub lug yuav txug, lub sijhawm ntawd tub lug ze lawm.

³⁶Tug TSWV yuav paab nwg tsaav tuabneeg, thaus nwg pum puab qaug zug. Nwg yuav taabncuab cov kws ua nwg teg num, thaus nwg pum puab coogtxuj lawm.

³⁷Thaus ntawd tug TSWV yuav nug nwg tsaav tuabneeg has tas, ‘Tej vaajtswv kws mej ca sab rua nyob qhov twg lawm?

³⁸Mej muab tej tsaj kws mej tua fij tej roj coj moog pub rua tej vaajtswv ntawd noj, hab muab cawv txiv maab fij rua tej vaajtswv ntawd. Ca le has kuas tej vaajtswv ntawd paab mej, hab kuas puab ca le lug cawm mej.

³⁹“ ‘Kuv tuab leeg xwb txhaj yog Vaajtswv; Tsi muaj dlua lwm tug vaajtswv lawm. Kuv ua kuas tuabneeg tuag hab kuv pub tau txujsa, kuv ua kuas nqaj to hab khu tau kuas zoo. Tsi muaj leejtwg txwv tau tej kws kuv ua ntawd le.

⁴⁰Kuv yog Vaajtswv tug kws muaj sa nyob, kuv tsaa teg coglug tseg has tas

⁴¹kuv yuav huv kuv raab ntaaj kuas ci nplaag hab txav txim kuas ncaaj nceeg. Kuv yuav ua pauj rua kuv cov yeebncuab hab rau txim rua cov kws ntxub kuv.

⁴²Kuv cov xub vug yuav lu puab tej ntshaav, hab kuv yuav muab ntaaj tua txhua tug kws tawmtsaam kuv. Kuv yuav tsi tseg cov kws tuaj tawmtsaam kuv ib tug le; txawm yog cov kws raug mob hab cov kws nyob huv tsev lojcuj los yuav tuag taag.’

⁴³“Txhua tsaav tuabneeg thoob qaab ntuj, mej ca le qhuas tug TSWV tsaav tuabneeg, tug TSWV yuav rau txim rua txhua tsaav tuabneeg kws tuaj tua nwg tsaav tuabneeg. Nwg yuav ua pauj rua nwg cov yeebncuab hab zaam txim rua nwg tsaav tuabneeg.”

⁴⁴Mauxes hab Noos tug tub Yausuas nyeem zaaj nkauj nuav, cov Yixalayees txhua tug txhaj nov.

⁴⁵Thaus Mauxes qha Vaajtswv tej lug rua suavdlawg noog taag lawm,

⁴⁶Mauxes has tas, “Mej yuavtsum ua lawv le tej lug kws nub nua kuv qha rua mej lawm. Mej yuavtsum qha tej lug nuav rua mej tej mivnyuas, puab txhaj muab sab npuab hab ua lawv le Vaajtswv tej lug qha nuav txhua lu huv tuabsi.

⁴⁷Tej lug ntawd tsi yog tej kws tsi muaj hauvpaug hauvntsis; tabsis yog tej kws cawm tau mej txujsa. Mej yuavtsum coj lawv le ntawd, mej txhaj muaj sa nyob ntev huv lub tebchaws kws mej taabtom yuav hlaa tug Dlej Yauladees moog tua hab nyob ntawd.”

⁴⁸Nub ntawd tug TSWV has rua Mauxes tas,

⁴⁹“Koj ca le nce moog rua sau tej Roob Anpalees huv tebchaws Mau-am kws saib ntsoov rua tim lub nroog Yelikaus; hab nce moog rua sau lub ncov roob Nenpaus, saib moog rua tim tebchaws Kana-aas kws kuv yuav muab rua cov Yixalayees nyob.

⁵⁰Koj yuav tuag rua sau lub roob ntawd ib yaam le koj tug tijlaug Aloos tuag rua sau lub Roob Haules,

⁵¹rua qhov meb tsi noog kuv lug taabmeeg cov Yixalayees; hab thaus mej nyob ntawm cov qhovdlej Melinpas kws ze lub nroog Kades huv lub taj suabpuam Xees, meb ua saib tsi taug kuv taabmeeg cov Yixalayees.

⁵²Koj yuav tuaj dleb pum lub tebchaws Kana-aas xwb, tabsis koj yuav tsi tau moog nyob lub tebchaws kws kuv yuav muab rua cov Yixalayees.”