Read Hmong Njua 2 Kevcai 5 Bible Online

2 Kevcai 5 - Hmong Njua bible

2 Kevcai 5

¹Mauxes hu taagnrho cov Yixalayees tuaj ua ke hab has rua puab tas, “Cov Yixalayees, mej ca le noog tej kevcai kws nub nua kuv qha rua mej, kuas mej paub coj hab ua lawv le tej kevcai ntawd.

²Thaus peb tseem nyob ntawm Roob Xinais, tug TSWV kws yog peb tug Vaajtswv tau coglug tseg rua peb.

³Tsi yog rua peb cov yawmkoob xwb, tabsis yog rua peb cov kws tseem muaj sa nyob naj nub nua ntaag.

⁴Thaus nyob sau Roob Xinais, tug TSWV has rua mej tim ntsej tim muag huv cov nplaim tawg tuaj.

⁵Thaus ntawd, kuv sawv nruab nraab ntawm mej hab tug TSWV, hab qha tej lug kws nwg kuas kuv qha rua mej, vim mej ntshai tej nplaim tawg ntawd heev, mej txhaj tsi kaam nce moog rua sau roob. “Tug TSWV has tas,

⁶‘Kuv yog tug TSWV kws yog mej tug Vaajtswv, tug kws coj mej tawm nraag tebchaws Iziv kws mej ua luas qhev lug.

⁷“ ‘Tsi xob pe lwm tug vaajtswv, tabsis pehawm kuv tuab leeg xwb.

⁸“ ‘Tsi xob puab tej mlom kws zoo le tej kws nyob sau nruab ntug lossis tej kws nyob huv nplajteb nuav lossis huv tivtxwv rua mej pe.

⁹Tsi xob pe ib tug mlom twg le, rua qhov kuv yog tug TSWV kws yog mej tug Vaajtswv, kuv khib mej heev. Kuv yog tug TSWV kws rau txim rua cov kws ntxub kuv, hab puab cov xeebntxwv moog txug peb hab plaub tam tuabneeg.

¹⁰Tabsis kuv hlub cov kws muab sab npuab kuv hab coj lawv le kuv tej kevcai, ib tam dlhau ib tam moog txug ntau txheeb tam tuabneeg.

¹¹“ ‘Tsi xob muab kuv lub npe moog has ua dlog ua dlig, rua qhov kuv yog tug TSWV kws yog mej tug Vaajtswv, kuv yuav rau txim rua cov tuabneeg kws muab kuv lub npe moog has ua dlog ua dlig.

¹²“ ‘Ncu ntsoov nub Xanpataus ua nub tseemceeb, lawv le tug TSWV kws yog mej tug Vaajtswv has rua mej lawm.

¹³Ua mej tej num rau nub,

¹⁴tabsis nub xyaa yog nub su hab pehawm Vaajtswv. Nub ntawd tsi pub leejtwg ua num le, tsi has mej, mej tej tub tej ntxhais, tej tubqhe, tej tsaj txhu, lossis lwm tsaav tuabneeg kws nrug mej nyob huv mej lub tebchaws, suavdlawg yuavtsum su huv tuabsi, kuas mej cov tubqhe tau su ib yaam le mej.

¹⁵Ncu ntsoov thaus mej ua luas qhev nyob nraag tebchaws Iziv, tug TSWV kws yog mej tug Vaajtswv lub fwjchim paab mej dlim. Tub yog le ntawd, kuv txhaj kuas mej fwm Nub Xanpataus.

¹⁶“ ‘Yuavtsum fwm mej nam mej txiv, lawv le tug TSWV kws yog mej tug Vaajtswv has rua mej lawm, mej txhaj yuav noj qaab nyob zoo hab muaj sa ua neej nyob ntev huv lub tebchaws kws kuv muab rua mej.

¹⁷“ ‘Tsi xob tua tuabneeg.

¹⁸“ ‘Tsi xob ntxag luas quaspuj luas quasyawg.

¹⁹“ ‘Tsi xob ua tubsaab.

²⁰“ ‘Mej tsi xob ua timkhawv tsi tseeb ntxo kwvtij zej zog.

²¹“ ‘Tsi xob ntshaw luas quaspuj, tsi xob ntshaw luas tej vaaj tse, luas tej laj teb, luas tej tubqhe, luas tej nyuj, luas tej neeg luav lossis tej kws yog luas tug.’

²²“Tej nuav yog tug TSWV tej kevcai kws nwg muab rua mej thaus mej tuaj txoos ua ke rua ntawm Roob Xinais, thaus kws tug TSWV has lug ua suab nrov ntxhe ntxhas huv cov nplaim tawg hab huv tauv fuab kws tsaus nti tuaj, nwg tsi muab lwm yaam rua mej, tsuas yog tej kevcai nuav xwb. Nwg sau rua ntawm ob dlaim txag zeb hab muab rua kuv.

²³“Thaus cov nplaim tawg cig thoob plawg sau lub roob ntawd, mej nov ib lub suab has huv qhov kws tsaus nti tuaj, ces mej cov thawjcoj hab cov thawj ntawm tej xeem lug cuag kuv

²⁴hab has rua kuv tas, ‘Tug TSWV kws yog peb tug Vaajtswv qha nwg lub fwjchim hab nwg tug fwvxyeej rua peb, thaus peb nov nwg lub suab has huv cov nplaim tawg tuaj. Nub nua peb pum Vaajtswv has lug rua ib tug tuabneeg, txawm le ntawd los nwg tseem muaj sa nyob.

²⁵Yog peb tseem nov tug TSWV kws yog peb tug Vaajtswv lub suab has lug ntxiv, mas peb yeej yuav tuag; hab cov nplaim tawg yeej yuav kub peb xwb. Peb tsi tau xaav tuag le.

²⁶Puas muaj leejtwg nov Vaajtswv tug kws muaj sa nyob lub suab has lug huv cov nplaim tawg tuaj hab tug ntawd tseem muaj sa nyob?

²⁷Mauxes, thov koj rov qaab moog sau roob, hab noog tug TSWV kws yog peb tug Vaajtswv tej lug saib nwg has le caag rua koj. Koj maam rov lug qha tej lug ntawd rua peb. Peb yuav noog hab ua lawv le tej lug ntawd.’

²⁸“Thaus tug TSWV nov mej tej lug, nwg has rua kuv tas, ‘Kuv tub nov tej lug kws cov tuabneeg ntawd has, puab has yog lawm.

²⁹Yog puab txawj xaav le ntawd, hab noog kuv tej lug moog le, mas puab hab puab tej xeebntxwv yuav tau lub neej zoo moog taag simneej.

³⁰Koj ca le rov qaab moog has kuas puab rov moog rua huv puab tej tsevntaub.

³¹Tabsis Mauxes, koj rov tuaj cuag kuv ntawm nuav. Kuv yuav qha kuv tej kevcai huv tuabsi rua koj. Koj coj moog qha rua puab, kuas puab coj lawv le ntawd, thaus puab moog nyob huv lub tebchaws kws kuv muab rua puab.’

³²“Cov Yixalayees, mej yuavtsum ua lawv le tug TSWV kws yog mej tug Vaajtswv tej kevcai kws nwg qha rua mej lawm. Mej yuavtsum coj lawv le Vaajtswv tej kevcai txhua nqai.

³³Noog hab ua lawv le tug TSWV kws yog mej tug Vaajtswv tej kevcai txhua nqai, mej txhaj yuav noj qaab nyob zoo hab ua neej nyob ntev rua huv lub tebchaws kws mej yuav moog tua ntawd.