Read Hmong Njua 2 Kevcai 9 Bible Online

2 Kevcai 9 - Hmong Njua bible

2 Kevcai 9

¹“Ib tsoom Yixalayees, mej ua tuab zoo noog! Nub nuav mej taabtom yuav hlaa tug Dlej Yauladees moog tua lub tebchaws kws muaj cov tuabneeg luj hab muaj zug dlua mej. Puab tej nroog luj hab muaj ntsaa yeej xov sab rua sau ntuj.

²Cov tuabneeg ntawd sab hab muaj zug heev. Puab luj tshaaj lwm tsaav tuabneeg huv tuabsi, hab mej tub nov moo lawm has tas, tsi muaj leejtwg tawmtsaam yeej puab le.

³Tabsis nwgnuav mej yuav pum has tas, tug TSWV kws yog mej tug Vaajtswv yuav moog ua mej ntej ib yaam le cov nplaim tawg cig laam lug. Thaus mej moog nas tsaam, tug TSWV yuav ua kuas puab swb. Mej yuav lawv tau puab tsiv hab ua kuas puab puamtsuaj taag sai, lawv le tug TSWV tau coglug tseg rua mej lawm.

⁴“Thaus tug TSWV kws yog mej tug Vaajtswv ntab puab tsiv taag lawm, mej tsi xob xaav has tas, qhov kws tug TSWV coj mej lug nyob huv lub tebchaws nuav, vim mej yeej tsimnyog lug nyob. Tsi yog le ntawd, tug TSWV ntab cov tuabneeg ntawd tsiv, tub yog vim puab ua kev phem kev qas.

⁵Tsi yog vim mej coj ncaaj hab ua zoo, tug TSWV txhaj coj mej lug nyob huv puab lub tebchaws. Tug TSWV ntab puab tsiv vim puab ua kev phem kev qas. Hab tug TSWV yeej ua lawv le nwg coglug tseg rua mej cov yawmkoob, Anplahaas, Ixaj hab Yakhauj lawm.

⁶Mej yuavtsum paub has tas, qhov kws tug TSWV muab lub tebchaws aav rog hab zoo qoob rua mej, tsi yog vim mej tsimnyog nyob, tsi yog le ntawd. Mej yeej yog cov tuabneeg kws tawv ncauj.

⁷“Mej yuavtsum ncu ntsoov has tas, thaus mej tseem nyob nraag taj suabpuam, mej tau ua rua tug TSWV kws yog mej tug Vaajtswv chim heev npaum le caag. Suav txij nub kws mej tawm nraag tebchaws Iziv lug txug ntawm nuav, mej tseem pheej ntxeev sab rua tug TSWV.

⁸Thaus mej tseem nyob ntawm Roob Xinais, mej ua rua tug TSWV chim heev, nwg tub yuav ua kuas mej puamtsuaj.

⁹Kuv nce moog nqaa ob dlaim txag zeb kws tug TSWV sau nwg tej lug cog tseg sau roob, yog tej lug kws nwg muab cob rua mej. Kuv moog nyob sau tau plaub caug nub plaub caug mo tsi noj tsi haus ib yaam dlaabtsi le.

¹⁰Tug TSWV muab ob dlaim txag zeb rua kuv, nwg muab nwg txhais teg sau tej lug kws nwg has huv cov nplaim tawg tuaj rua mej, yog nub kws mej suavdlawg tuaj ua ke rua ntawm Roob Xinais.

¹¹Thaus dlhau plaub caug nub plaub caug mo lawm, tug TSWV muab ob dlaim txag zeb kws nwg sau nwg tej lug cog tseg rua kuv.

¹²“Tom qaab ntawd, tug TSWV has rua kuv tas, ‘Koj ca le nqeg sau Roob Xinais nuav moog, rua qhov cov tuabneeg kws koj coj tsiv nraag tebchaws Iziv lug, tub ntxeev sab ua phem ua qas lawm. Puab tso tej kevcai kws kuv qha kuas puab ua tseg, hab puab nchuav tau ib tug mlom rua puab pe.’

¹³“Tug TSWV has ntxiv rua kuv tas, ‘Kuv paub cov tuabneeg nuav tawv ncauj heev.

¹⁴Tsi xob cheem kuv, kuv yuav ua kuas puab puamtsuaj moog, kuas tsi muaj leejtwg nov puab moo ntxiv le lawm. Tom qaab ntawd kuv yuav tsaa koj caajceg ua ib tsaav tuabneeg kws muaj fwjchim hab coob dlua puab.’

¹⁵“Yog le ntawd, kuv txhaj nqaa ob dlaim txag zeb kws sau Vaajtswv tej lug cog tseg nqeg sau roob lug. Thaus ntawd muaj nplaim tawg cig lab ploog sau roob.

¹⁶Kuv pum mej tso tug TSWV kws yog mej tug Vaajtswv tej lug kws nwg qha rua mej tseg sai kawg le, hab mej ua txhum rua tug TSWV, rua qhov mej muab kub nchuav ua ib tug mlom nyuj rua mej pe.

¹⁷Kuv txhaj muab ob dlaim txag zeb ntawd ntsawm tawg mog nyoos taabmeeg mej.

¹⁸Kuv txawm rov txhus caug ndlua khoov ua ntsejmuag ti nkaus aav hab thov tug TSWV tau plaub caug nub plaub caug mo, kuv tsi noj tsi haus ib yaam dlaabtsi le. Kuv ua le nuav, tub yog vim mej ua txhum rua tug TSWV hab ua rua nwg chim.

¹⁹Kuv ntshai tug TSWV txujkev chim, rua qhov nwg chim heev; nwg tub yuav ua kuas mej puamtsuaj, tabsis tug TSWV tseem noog kuv tej lug thov dlua ib zag hab.

²⁰Thaus ntawd, tug TSWV chim rua Aloos heev. Nwg tub yuav laug muab Aloos tua povtseg, kuv txhaj thov tug TSWV zaam txim rua Aloos.

²¹Kuv muab mej txujkev txhum kws yog tug mlom nyuj kws mej nchuav pov rua huv cubtawg, kuv muab tsoo ua moov nphoo rua huv tug dlej kws ndlwg sau roob lug.

²²“Thaus mej tseem nyob nraag Tanpelas, Maxas hab Kilaus-Hatavas, mej tau ua rua tug TSWV kws yog mej tug Vaajtswv chim heev.

²³Hab thaus kws tug TSWV khaiv mej tawm huv Kades Npane-as moog tua lub tebchaws kws tug TSWV yuav muab rua mej, mej ntxeev sab rua nwg; mej tsi ca sab hab tsi noog nwg lug.

²⁴Kuv paub mej txij thaus ntawd lug, mej pheej ntxeev sab rua tug TSWV tsi tseg le.

²⁵“Kuv khoov ti nkaus rua huv aav, thov tug TSWV tau plaub caug nub plaub caug mo, rua qhov tug TSWV tub ua ib sab lawm has tas, nwg yuav ua kuas mej puamtsuaj taag.

²⁶Kuv thov tug TSWV has tas, ‘Tug TSWV kws kaav ib puas tsaav yaam, thov koj tsi xob ua rua koj tsaav tuabneeg puamtsuaj. Puab yog cov tuabneeg kws koj tug zug hab lub fwjchim kws luj kawg nkaus cawm hab coj nraag tebchaws Iziv lug.

²⁷Thov koj ncu ntsoov Anplahaas, Ixaj hab Yakhauj kws yog koj cov tubkhai. Thov koj tsi xob xaav txug cov tuabneeg nuav tej kev tawv ncauj, kev phem hab kev txhum.

²⁸Nyob tsaam cov Iziv yuav has tas, koj coj tsi tau koj tsaav tuabneeg moog nyob huv lub tebchaws kws koj coglug tseg yuav muab rua puab nyob. Cov Iziv yuav has tas, koj ntxub koj tsaav tuabneeg, koj txhaj coj puab lug tua rua ntawm taj suabpuam nuav xwb.

²⁹Puab cov nuav yeej yog cov kws koj tau xaiv tseg ua koj tsaav tuabneeg, hab tub yog koj lub fwjchim kws luj kawg nkaus coj puab tawm nraag tebchaws Iziv lug.’