Read Hmong Njua Yauhaas 18 Bible Online

Yauhaas 18 - Hmong Njua bible

Yauhaas 18

¹Thaus Yexus thov Vaajtswv taag lawm, Yexus coj nwg cov thwjtim hlaa lub kwj haa Kiloos moog rua saab tid. Qhov ntawd muaj ib lub vaaj, Yexus hab nwg cov thwjtim txawm moog rua huv lub vaaj ntawd.

²Yudas tug kws ntxeev sab rua Yexus yeej paub qhov chaw ntawd hab, rua qhov Yexus tub coj cov thwjtim moog ntau zag huv lub vaaj ntawd lawm.

³Yog le ntawd, Yudas txhaj coj ib paab tubrog Loos hab cov kws zuv lub Tuamtsev qee leej kws cov thawj ntawm cov povthawj hab cov Falixais tso tuaj rua huv lub vaaj; puab nqaa ntaaj, taws teeb, hab taws tsau cig laam lug tuaj.

⁴Yexus yeej paub tej xwm kws nwg yuav raug, nwg txaav zog moog nug puab has tas, “Mej tuaj nrhav leejtwg?”

⁵Puab teb has tas, “Peb tuaj nrhav Yexus tug kws yog tuabneeg Naxales.” Yexus teb has puab tas, “Nwg yog kuv ntaag.” Yudas tug kws ntxeev sab rua Yexus, nwg nrug puab sawv ua ke ntawd hab.

⁶Thaus Yexus has rua puab tas, “Nwg yog kuv ntaag,” puab thaub ncho rov qaab hab qaug pawg lug rua huv aav.

⁷Yexus rov qaab nug puab has tas, “Mej tuaj nrhav leejtwg?” Puab teb has tas, “Peb tuaj nrhav Yexus tug kws yog tuabneeg Naxales.”

⁸Yexus has rua puab has tas, “Kuv tub qha rua mej has tas, nwg yog kuv ntaag, yog mej tuaj nrhav kuv tag, mej ca le tso cov tuabneeg nuav moog.”

⁹(Yexus has le nuav kuas tav lawv le tej lug kws Yexus has tas, “Txiv, cov tuabneeg kws koj muab rua kuv lawm, tsi muaj ib tug pluj le.”)

¹⁰Ximoos Petus nqaa ib raab ntaaj, nwg rhu hlo nwg raab ntaaj tuab ntaag rua tug Povthawj Hlub ib tug qhev saab nploojntseg xis tu nrho. Tug qhev ntawd hu ua Malekhus.

¹¹Yexus has rua Petus has tas, “Koj ca le muab koj raab ntaaj ntxig rov rua huv naab. Koj xaav has tas kuv yuav tsi haus lub khob kws kuv Txiv muab rua kuv haus nua los?”

¹²Cov tuabneeg Loos tug thawj tubrog hab nwg cov tubrog hab cov Yudais cov tub ceevxwm txawm nteg Yexus hab muab nwg khi.

¹³Puab xub coj Yexus moog cuag Anas kws yog Kaiyafas yawmtxiv, xyoo ntawd Kaiyafas yog tug Povthawj Hlub.

¹⁴Kaiyafas yog tug kws has rua cov Yudais tej numtswv has tas, ca ib tug tuag zoo dlua ca suavdlawg tuag.

¹⁵Ximoos Petus hab muaj dlua ib tug thwjtim lawv Yexus qaab moog. Tug Povthawj Hlub paub tug thwjtim ntawd, tug thwjtim ntawd lawv Yexus moog rua ntawm lub tshaav puam huv tug Povthawj Hlub lub tsev,

¹⁶Petus sawv saab roojvaag nrau. Tug thwjtim kws tug Povthawj Hlub paub, nwg tawm tuaj has rua tug ntxhais qhev kws nyob ntawm roojvaag kuas coj Petus lug rua huv tsev.

¹⁷Tug ntxhais qhev kws nyob ntawm roojvaag has rua Petus has tas, “Koj yog tug txivneej kws raug nteg ntawd ib tug thwjtim los sav?” Petus teb has tas, “Kuv tsi yog.”

¹⁸Mo ntawd no heev, cov tubkhai hab cov tub ceevxwm rauv tau ib cub thee, hab suavdlawg sawv puagncig nte. Petus txawm moog nrug puab nte hab.

¹⁹Tug Povthawj Hlub nug Yexus txug Yexus cov thwjtim hab Yexus tej lug qhuab qha.

²⁰Yexus teb has tas, “Kuv taabmeeg qha rua tuabneeg suavdlawg; kuv yeej ibtxwm qha huv tej tsev saablaaj hab huv lub Tuamtsev, cov Yudais yeej naj zag tuaj noog kuv qha. Kuv yeej tsi tau has ib zaaj nraim nkoog qhov twg le.

²¹Koj tseem yuav nug kuv ua dlaabtsi? Koj ca le nug cov tuabneeg kws nov kuv qha saib kuv has le caag rua puab; puab yeej paub tej kws kuv qha huv tuabsi.”

²²Thaus Yexus taabtom has le ntawd, muaj ib tug tub ceevxwm nyob ze ntawd, txawm ca le tuab tawg ncuav rua Yexus ntsejmuag hab has tas, “Koj teb tug Povthawj Hlub le ko los!”

²³Yexus teb has tas, “Yog kuv has txhum, koj ca le qha kuv qhov txhum rua suavdlawg paub. Tabsis yog kuv has tseeb, ua caag koj laam ntaus kuv ua dlaabtsi?”

²⁴Ces Anas txhaj xaa Yexus moog rua Kaiyafas kws yog tug Povthawj Hlub, thaus ntawd puab tseem khi rawv Yexus.

²⁵Thaus Ximoos Petus tseem sawv nte tawg, cov tuabneeg kws nyob ntawd has rua Petus has tas, “Koj yog tug txivneej kws raug nteg ntawd ib tug thwjtim los tsi yog?” Tabsis Petus tsi leeg le, Petus has tas, “Kuv tsi yog.”

²⁶Tug Povthawj Hlub ib tug qhev kws yog tug txivneej kws Petus txav ib saab nploojntseg tu ntawd ib tug kwvtij txawm nug Petus has tas, “Puas yog kuv tub pum koj nrug tug txivneej ntawd nyob huv vaaj?”

²⁷Petus rov qaab has tas, “Tsi yog kuv.” Taamsim ntawd qab txawm qua.

²⁸Thaus kaaj ntug txoog, puab coj Yexus tawm huv Kaiyafas tsev moog rua ntawm Philaj lub loog. Cov Yudais tej numtswv tsi kaam moog huv lub loog, rua qhov puab tsi xaav ua kuas puab tsi huv, puab txhaj noj tau rooj mov kws ua Kevcai Hlaa Dlhau.

²⁹Yog le ntawd, Philaj txhaj tawm moog nug puab has tas, “Tug txivneej nuav ua txhum dlaabtsi, mej txhaj coj nwg tuaj cuag kuv?”

³⁰Puab teb has tas, “Yog nwg tsi tau ua txhum, peb yeej tsi coj nwg tuaj cuag koj.”

³¹Philaj has rua puab tas, “Mej ca le coj nwg moog hab taug nwg zaaj lawv le mej txuj kevcai.” Cov Yudais teb has tas, “Peb tsi muaj cai muab leejtwg tua povtseg.”

³²(Qhov nuav muaj lawv le tej lug kws Yexus tub qha ua ntej lawm has tas nwg yuav tuag le caag.)

³³Philaj rov qaab moog rua huv loog hab hu Yexus lug cuag nwg. Philaj nug Yexus has tas, “Koj yog cov Yudais tug vaajntxwv los?”

³⁴Yexus teb has tas, “Koj nug kuv lawv le koj paub lossis yog lwm tug qha kuv zaaj rua koj xwb?.”

³⁵Philaj teb has tas, “Koj xaav has tas kuv yog tuabneeg Yudais nua los? Tub yog koj tsaav tuabneeg hab cov thawj ntawm cov povthawj nteg koj tuaj rua kuv xwb. Koj ua txhum dlaabtsi?”

³⁶Yexus teb has tas, “Kuv lub tebchaws tsi yog lub nplajteb nuav. Yog kuv lub tebchaws yog lub nplajteb nuav, kuv cov thwjtim yeej yuav tawmtsaam kuas yeej, tsi pub leejtwg nteg tau kuv coj moog rua cov Yudais tej numtswv. Tabsis kuv lub tebchaws tsi yog lub nplajteb nuav.”

³⁷Philaj nug Yexus has tas, “Yog le ntawd, koj yog ib tug vaajntxwv los?” Yexus teb has tas, “Koj yog tug kws hu kuv ua vaajntxwv. Tub yog vim le nuav, kuv txhaj lug yug rua huv lub nplajteb nuav hab qha qhov tseeb. Txhua tug kws nyam qhov tseeb yeej noog kuv lug.”

³⁸Philaj nug Yexus has tas, “Qhov tseeb yog dlaabtsi?” Thaus Philaj has le ntawd taag, Philaj tawm rov moog cuag cov Yudais rua saab nrau hab has rua puab tas, “Kuv pum has tas, nwg tsi tau ua ib qhov txhum kws txaus txav txim tau rua nwg le.

³⁹Tabsis lawv le mej txuj kevcai, txhua zag kws mej ua Kevcai Hlaa Dlhau kuv tso ib tug tuabneeg raug txim rua mej, thaus lub caij kws mej ua Kevcai Hlaa Dlhau. Mej puas xaav kuas kuv tso cov Yudais tug Vaajntxwv?”

⁴⁰Puab txawm has nrov nrov rua Philaj has tas, “Tsi xob tso tug txivneej ntawd, koj ca le tso Npalanpas xwb.” (Npalanpas yog ib tug tuabneeg ntxeev num ntxeev tswv.)