Read Hmong Njua Yauhaas 21 Bible Online

Yauhaas 21 - Hmong Njua bible

Yauhaas 21

¹Tom qaab ntawd, Yexus rov lug tshwm rua nwg cov thwjtim pum nraag ntug Havtxwv Tinpelias; hab qhov kws nwg lug tshwm rua puab pum muaj le nuav.

²Ximoos Petus, Thaumas (tug kws muaj dlua ib lub npe hu ua Ntxaib), Nathana-ees (tug kws nyob huv lub zog Kanas peg xeev Kalilais), Xenpedais ob tug tub, hab muaj dlua ob tug ntawm Yexus cov thwjtim tuaj nyob ua ke.

³Ximoos Petus has rua cov thwjtim ntawd tas, “Kuv yuav moog ntaus ntseg.” Puab has rua Petus has tas, “Peb yuav nrug koj moog hab.” Puab txawm nce rua huv nkoj, mo ntawd puab ntaus ntseg ib mos, tabsis tsi tau ib tug ntseg le.

⁴Thaus kaaj ntug txoog, Yexus lug sawv tim ntug dlej, tabsis cov thwjtim tsi paub has tas yog Yexus.

⁵Yexus nug puab has tas, “Cov hluas, mej ntaus tsi tau ntseg le los?” Puab teb has tas, “Ntaus tsi tau ib tug le.”

⁶Yexus has rua puab tas, “Mej ca le ntaus mej lub vaag rua ntawm lub nkoj saab xis rua huv txhaj yuav tau ntseg.” Yog le ntawd, puab txawm muab lub vaag ntaus rua huv hab lub vaag maag tau ntseg ntau heev, puab nqug tsi tau lub vaag lug rua huv nkoj le.

⁷Tug thwjtim kws Yexus hlub has rua Petus has tas, “Tug sawv tid yog peb tug Tswv ntaag los sav!” Thaus Petus nov dlheev has tas peb tug Tswv, Petus txawm muab nwg lub tsho ntev lug naav, (Rua qhov nwg muab hle lawm) nwg txawm dlha rua huv havtxwv.

⁸Cov thwjtim kws tseem nyob huv lub nkoj, puab nkuam lub nkoj hab nqug lub vaag kws maag ntseg puv nkaus lug rua ntawm ntug dlej, rua qhov puab nyob tsi dleb ntawm ntug dlej kwvlaam le tsib caug dlaaj xwb.

⁹Thaus puab moog txug tim ntug lawm, puab pum ib cub thee cig ntsaa thuav muaj ntseg hab ncuav ci nyob sau cub thee ntawd.

¹⁰Yexus has rua puab tas, “Mej ca le nqaa cov ntseg kws mej nyavnyuas ntaus tau tug puav lug ntawm nuav.”

¹¹Ximoos Petus nce rua huv lub nkoj nqug lub vaag kws maag tau ntseg puv nkaus ntawd lug rua tim ntug, cov ntseg luj kws puab ntaus tau ntawd muaj ib puas tsib caug peb tug, txawm yog maag tau ntseg ntau npaum le ntawd los lub vaag tsi ndluag ib qho le.

¹²Yexus has rua puab tas, “Mej ca le lug noj tshais.” Cov thwjtim tsi muaj ib tug muaj cuabkaav nug Yexus has tas, “Koj yog leejtwg?” rua qhov puab paub has tas nwg yog puab tug Tswv.

¹³Yog le ntawd, Yexus txawm moog muab ncuav hab muab ntseg lug faib rua puab noj.

¹⁴Tom qaab kws Yexus sawv huv qhov tuag rov qaab lug lawm, nwg lug tshwm rua cov thwjtim pum peb zag rua zag nuav.

¹⁵Thaus puab noj tshais taag lawm, Yexus has rua Ximoos Petus has tas, “Ximoos Yauhaas tug tub, koj hlub kuv tshaaj puab cov nuav los?” Ximoos teb Yexus has tas, “Tug Tswv, koj yeej paub has tas kuv hlub koj.” Yexus has rua Ximoos has tas, “Koj ca le yug kuv cov mivnyuas yaaj.”

¹⁶Yexus rov has dlua zag ob has tas, “Ximoos Yauhaas tug tub, koj puas hlub kuv?” Ximoos teb Yexus has tas, “Tug Tswv, koj yeej paub has tas kuv hlub koj.” Yexus has rua Ximoos has tas, “Koj ca le yug kuv paab yaaj.”

¹⁷Yexus rov has dlua zag peb has tas, “Ximoos Yauhaas tug tub, koj puas hlub kuv?” Petus nyuaj sab heev rua qhov Yexus nug Petus peb zag has tas, “Koj puas hlub kuv?” Petus txawm has rua Yexus has tas, “Tug Tswv, koj yeej paub ib puas tsaav yaam huv tuabsi; koj yeej paub has tas kuv hlub koj.” Yexus has rua Petus has tas, “Koj ca le yug kuv paab yaaj.

¹⁸Kuv qha tseeb rua koj has tas, thaus koj tseem hluas koj xaav moog qhov twg, koj ca le tu cev zoj zeeg moog xwb. Tabsis thaus koj laug lawm, koj yuav xyaab teg rua luas khi hab luas yuav coj koj moog rua qhov chaw kws koj tsi xaav moog.”

¹⁹(Yexus has le ntawd, yog Yexus has tas, Petus yuav tuag le caag txhaj ua rua Vaajtswv tau koob meej.) Yexus has rua Petus has tas, “Koj ca le nrug kuv moog.”

²⁰Petus tig lug pum tug thwjtim kws Yexus hlub nyob tom obtug qaab; nwg yog tug kws txaav lug rua ntawm Yexus thaus puab noj mo hab nug has tas, “Tug Tswv, leejtwg yog tug kws yuav ntxeev sab rua koj?”

²¹Thaus Petus pum tug thwjtim ntawd, Petus nug Yexus has tas, “Tug Tswv, ua le tug txivneej nuav ne, tsua yuav zoo le caag?”

²²Yexus teb Petus has tas, “Yog kuv ca nwg nyob moog txug nub kws kuv rov qaab lug, yeej tsi ua le caag rua koj. Koj ca le nrug kuv moog!”

²³Zaaj ntawd nrov nchaa moog thoob plawg rua tej tuabneeg suavdlawg has tas, tug thwjtim ntawd yuav tsi tuag. Tabsis Yexus tsi tau has tas, tug thwjtim ntawd yuav tsi tuag; Yexus has tas, “Yog kuv ca nwg nyob moog txug nub kws kuv rov qaab lug, yeej tsi ua le caag rua koj?”

²⁴Tug thwjtim ntawd yog tug kws has tej lug nuav hab muab sau tseg rua huv ntawv; hab peb paub has tas, tej lug kws nwg has yeej muaj tseeb.

²⁵Tseem muaj ntau yaam kws Yexus tau ua taag lug lawm. Yog yuav muab tej ntawd sau tseg huv tuabsi rua huv ntawv, kuv xaav has tas lub nplajteb nuav yuav tsi muaj chaw txaus ntim tej ntawv ntawd.