Read Hmong Njua Yauhaas 3 Bible Online

Yauhaas 3 - Hmong Njua bible

Yauhaas 3

¹Cov Yudais muaj ib tug thawjcoj hu ua Nikaudemaus, nwg yog ib tug ntawm cov Falixais.

²Muaj ib mos nwg tuaj cuag Yexus hab has rua Yexus has tas, “Lanpis, peb paub has tas koj yog tug xwbfwb kws Vaajtswv khaiv lug. Tsi muaj leejtwg ua tau tej txujci tseemceeb kws koj ua nuav, tsuas yog tug kws Vaajtswv nrug nwg, tug ntawd txhaj ua tau xwb.”

³Yexus teb has tas, “Kuv qha tseeb rua koj has tas, yog leejtwg tsi yug dlua tshab, tug ntawd yeej tsi pum Vaajtswv lub Tebchaws le.”

⁴Nikaudemaus nug Yexus has tas, “Ib tug tuabneeg laug lawm, yuav ua le caag rov yug dlua tshab tau? Nwg yeej moog tsi tau rua huv nwg nam plaab hab rov yug dlua ib zag!”

⁵Yexus teb has tas, “Kuv qha tseeb rua koj has tas, tug tuabneeg kws tsi tau yug lug ntawm dlej hab ntawm Vaaj Ntsujplig, tug ntawd yeej moog tsi tau Vaajtswv lub Tebchaws le.

⁶Tug kws yog tuabneeg yug yeej yog tuabneeg, tabsis tug kws yug lug ntawm Vaaj Ntsujplig yeej yog ntsujplig.

⁷Koj tsi xob poob sab rua tej lug kws kuv qha rua koj has tas, txhua tug yuavtsum yug dlua tshab.

⁸Cua yuav ntsawj moog saab twg los yeej tau; koj nov cua tuaj, tabsis cua tuaj qhov twg tuaj lossis cua moog qhov twg koj yeej tsi paub. Txhua tug kws yug lug ntawm Vaaj Ntsujplig zoo ib yaam nkaus le ntawd.”

⁹Nikaudemaus nug Yexus has tas, “Yuav ua le caag txhaj muaj tau lawv le koj has ko?”

¹⁰Yexus teb has tas, “Koj tub yog cov Yixalayees ib tug xwbfwb, ua le caag koj tseem tsi paub tej nuav hab?

¹¹Kuv qha tseeb rua koj has tas; peb has tej kws peb paub hab qha tej kws peb pum xwb los mej yeej tsi muaj ib tug ntseeg tej lug kws peb qha le.

¹²kuv qha mej txug tej yaam kws nyob huv lub nplajteb nuav xwb, mej tub tsi ntseeg; yog kuv tseem qha tej yaam kws nyob sau ntuj ceebtsheej mej hajyam yuav tsi ntseeg.

¹³Hab yeej tsi tau muaj leejtwg moog txug sau ntuj ceebtsheej le, tsuas yog Tuabneeg Leej Tub xwb, nwg txhaj lug sau ntuj ceebtsheej lug.

¹⁴“Mauxes tsaa tug naab tooj rua sau tug ncej tom taj suabpuam le caag, luas yuav muab Tuabneeg Leej Tub dlai ib yaam le ntawd,

¹⁵yog le ntawd, txhua tug kws ntseeg nwg yuav tau txujsa ntev dlhawv moog ibtxhis.

¹⁶“Rua qhov Vaajtswv hlub tuabneeg nplajteb kawg le, nwg txhaj khaiv nwg tuab leeg Tub lug rua huv nplajteb, tug kws ntseeg nwg leej Tub yuav tsi tuag, tabsis yuav tau txujsa ntev dlhawv moog ibtxhis.

¹⁷“Qhov kws Vaajtswv khaiv nwg leej Tub lug rua huv nplajteb nuav, tsi yog lug txav txim rua tuabneeg nplajteb, tabsis yog lug cawm tuabneeg nplajteb kuas puab dlim puab lub txim.

¹⁸“Tug kws ntseeg Leej Tub yuav tsi raug txav txim; tabsis tug kws tsi ntseeg tub raug txav txim lawm, rua qhov nwg tsi ntseeg Vaajtswv tuab leeg Tub.

¹⁹Qhov kws txav txim yog le nuav: qhov kaaj tub lug rua huv lub nplajteb lawm, tabsis tuabneeg nyam qhov tsaus ntuj heev dlua nyam qhov kaaj, rua qhov puab nyam ua phem ua qas.

²⁰Tug kws nyam ua phem ua qas, yeej tsi nyam qhov kaaj hab tsi lug nyob huv qhov kaaj, rua qhov puab tsi xaav kuas suavdlawg pum puab tej kev phem kev qas.

²¹Tabsis tug kws nyam ua zoo yeej lug nyob huv qhov kaaj, kuas suavdlawg pum has tas nwg ua nwg teg num lawv le Vaajtswv lub sab nyam.”

²²Tom qaab ntawd, Yexus hab nwg cov thwjtim moog rua nraag xeev Yudas, Yexus nrug puab nyob tau ib ntus hab muab tuabneeg ua kevcai raus dlej.

²³Thaus ntawd, Yauhaas muab tuabneeg ua kevcai raus dlej huv lub zog Ainoos kws nyob tsi dleb ntawm lub zog Xalimes hab, rua qhov nyob ntawd muaj dlej ntau. Tuabneeg naj nub tuaj cuag Yauhaas, hab thov Yauhaas muab puab ua kevcai raus dlej.

²⁴(Thaus ntawd luas tseem tsi tau coj Yauhaas moog kaw rua huv tsev lojcuj.)

²⁵Yauhaas cov thwjtim qee leej nrug ib tug tuabneeg Yudais sis caav has txug txuj kevcai ntxuav.

²⁶Yog le ntawd, puab txhaj moog cuag Yauhaas hab has tas, “Xwbfwb, koj puas ncu qaab tug txivneej kws nrug koj ua ke ntawm tug dlej Yauladees saab nubtuaj kws koj has ntawd? Taamsim nuav nwg taabtom muab tuabneeg ua kevcai raus dlej, hab suavdlawg puavleej moog cuag nwg!”

²⁷Yauhaas teb has tas, “Txhua yaam kws tuabneeg muaj puavleej yog Vaajtswv pub rua puab.

²⁸Mej yeej nov kuv has tas, ‘Kuv tsi yog tug Mexiyas, tabsis kuv yog tug kws Vaajtswv khaiv lug ua nwg ntej xwb, mej suavdlawg yeej ua tau timkhawv le ntawd!’

²⁹Tug nkauj nyaab yog tug nraug vauv quaspuj; tabsis tug phijlaaj tsuas yog tug kws sawv ib saab ua luag hab noog xwb, thaus nwg nov tug nraug vauv tej lug, nwg zoo sab heev. Nwgnuav kuv zoo sab ib yaam nkaus le ntawd.

³⁰Nwg yuav muaj fwjchim luj zuj zug, tabsis kuv lub fwjchim yuav yau zuj zug.”

³¹Tug kws lug sau ntuj lug, nwg muaj fwjchim luj dlua suavdlawg. Tug kws nyob huv nplajteb, nwg yeej yog tuabneeg nplajteb hab has tuabneeg nplajteb zaaj, tabsis tug kws lug sau ntuj lug, nwg muaj fwjchim luj dlua ib puas tsaav yaam.

³²Nwg qha tej kws nwg pum hab tej kws nwg nov rua suavdlawg noog, tabsis tsi muaj leejtwg ntseeg nwg tej lug.

³³Tabsis tug kws ntseeg nwg tej lug, tug ntawd yeej ntseeg has tas Vaajtswv yog tug ncaaj nceeg.

³⁴Tug kws Vaajtswv khaiv lug, nwg yeej has Vaajtswv tej lug, rua qhov Vaajtswv pub Vaajtswv tug Ntsujplig puv npo rua tug ntawd.

³⁵Leej Txiv hlub nwg tug Tub kawg le hab muab ib puas tsaav yaam tso rua nwg kaav huv tuabsi.

³⁶Tug kws ntseeg leej Tub yuav tau txujsa ntev dlhawv moog ibtxhis; tabsis tug kws tsi noog leej Tub lug, yuav tsi tau txujsa, Vaajtswv yuav rau txim rua tug ntawd.