Read Hmong Njua Teg Num 15 Bible Online

Teg Num 15 - Hmong Njua bible

Teg Num 15

¹Thaus Paulus obtug tseem nyob huv lub nroog Aati-aukias, muaj ob peb tug txivneej tuaj nraag xeev Yudas tuaj txug huv lub nroog Aati-aukias. Puab qha cov ntseeg has tas, “Mej yuavtsum ua kevcai txav lawv le Mauxes txuj Kevcai mej txhaj yuav dlim mej lub txim.”

²Paulus hab Npananpas nrug puab cov ntawd sis caav txug zaaj nuav. Thaus kawg suavdlawg pum zoo ca Paulus hab Npananpas hab cov ntseeg kws nyob huv lub nroog Aati-aukias qee leej moog nraag lub nroog Yeluxalees, moog nrug cov timthawj hab cov txwjlaug saablaaj saib yuav ua le caag.

³Cov ntseeg txawm xaa obtug moog. Thaus puab taabtom taug kev moog hlaa lub xeev Faunikias hab xeev Xamalis, obtug qha cov ntseeg kws nyob huv ob lub xeev ntawd has tas, muaj lwm Tsaav Tuabneeg lug ntseeg Vaajtswv lawm hab. Thaus cov ntseeg nov le ntawd, cov ntseeg zoo sab kawg le.

⁴Thaus Paulus puab moog txug nraag lub nroog Yeluxalees, cov ntseeg, cov timthawj hab cov txwjlaug suavdlawg tuaj tog puab. Paulus obtug qha tej kws Vaajtswv paab obtug thaus obtug moog qha Txujmoo Zoo rua lwm Tsaav Tuabneeg rua puab noog.

⁵Tabsis cov ntseeg kws yog cov Falixais paab, muaj qee leej txawm sawv tseeg hab has tas, “Yuavtsum muab lwm Tsaav Tuabneeg kws lug ntseeg ntawd ua kevcai txav, hab kuas puab coj lawv le Mauxes txuj Kevcai.”

⁶Cov timthawj hab cov kws saib cov ntseeg txawm muab zaaj nuav lug saablaaj saib yuav ua le caag.

⁷Puab saablaaj ntev loo has tsi txawj hum, ces Petus txawm sawv tseeg has rua puab has tas, “Cov kwvtij, mej tub paub has tas thaus chivthawj, peb cov kws nyob ntawm nuav, Vaajtswv xaiv kuv ua tug qha Txujmoo Zoo rua lwm Tsaav Tuabneeg kuas puab tau nov hab lug ntseeg.

⁸Hab Vaajtswv tug kws paub suavdlawg lub sab, nwg pub Vaaj Ntsujplig tug Dlawbhuv rua puab ib yaam le nwg pub rua peb lawm. Vaajtswv ua le ntawd kuas suavdlawg paub has tas, Vaajtswv pum zoo hu lwm Tsaav Tuabneeg lug ntseeg hab.

⁹Vaajtswv suav has tas, lwm Tsaav Tuabneeg hab peb zoo tuab yaam nkaus. Vaajtswv zaam txim rua puab, tub yog vim puab ntseeg Vaajtswv.

¹⁰Yog le ntawd, ua le caag mej tseem yuav muab lub nraa nyaav rua cov ntseeg ris? Txawm yog peb cov yawmkoob hab peb los yeej ris tsi taug lub nraa ntawd. Mej ua le nuav kuj yog mej sim Vaajtswv sab.

¹¹Mej ua le ntawd tsi yog lawm. Qhov kws peb dlim peb lub txim tub yog vim tug Tswv Yexus hlub peb xwb. Puab los kuj ib yaam nkaus le peb hab.”

¹²Thaus Petus has le ntawd taag, suavdlawg txawm nyob tuabywv noog Npananpas hab Paulus qha txug tej txujci luj hab tseemceeb kws Vaajtswv ua thaus obtug moog qha lwm Tsaav Tuabneeg.

¹³Thaus obtug qha taag lawm, Yakaunpaus has tas, “Cov kwvtij, mej ca le noog kuv has!

¹⁴Ximoos nyavnyuas qha rua peb noog has tas, thawj zag kws Vaajtswv lug paab lwm Tsaav Tuabneeg, Vaajtswv xaiv ib cov lug ua Vaajtswv tsaav tuabneeg.

¹⁵Cov kws cev Vaajtswv lug tau qha txug zaaj nuav, lawv le Vaajtswv txujlug sau tseg has tas,

¹⁶‘Tug Tswv has tas, tom qaab ntawd kuv yuav lug muab Daviv lub tsev kws qaug lawm ua dlua tshab. Txawm yog lub tsev ntawd qaug taag lawm los kuv yuav ua dlua tshab.

¹⁷Kuv ua le nuav kuas txhua tsaav tuabneeg kws nyob huv qaab ntuj nuav tau kev lug cuag kuv, tsi has xeem twg le, txhua tug kws kuv xaiv ca lawm, puab yeej yuav lug cuag kuv.

¹⁸Tug Tswv kws has le nuav, nwg tub qha zaaj nuav rua suavdlawg paub thaus u lug lawm.’ ”

¹⁹Yakaunpaus has ntxiv tas, “Kuv xaav has tas, peb tsi xob kuas lwm Tsaav Tuabneeg kws taabtom lug ntseeg ua lawv le tej kevcai ntawd.

²⁰Tabsis peb ca le sau ntawv moog qha rua puab has tas, kuas puab tsi xob noj tej qhov txhua chaw kws luas muab fij rua dlaab lawm, hab tsi xob ntxag luas quaspuj luas quasyawg, tsi xob noj tej nqaj tsaj kws hlua zawm cejdlaab tuag hab tsi xob noj ntshaav.

²¹Rua qhov thaus u lug, txhua nub Xanpataus yeej muaj tuabneeg nyeem Mauxes txuj Kevcai huv tej tsev saablaaj hab muaj tuabneeg qha Mauxes tej lug huv txhua lub nroog.”

²²Tom qaab ntawd, cov timthawj, cov txwjlaug hab cov ntseeg suavdlawg pum zoo xaiv puab paab qee leej nrug Paulus hab Npananpas moog rua peg lub nroog Aati-aukias. Puab xaiv tau ob leeg nrug Paulus obtug moog, ob tug kws puab xaiv ntawd, ib tug yog Yudas kws muaj dlua ib lub npe hu ua Npaxanpas hab ib tug yog Xilas, suavdlawg puavleej fwm obtug.

²³Tsaab ntawv kws puab sau rua obtug nqaa moog has le nuav: “Peb cov kws yog cov timthawj hab cov txwjlaug kws yog mej cov kwvtij, peb sau tsaab ntawv nuav tuaj rua mej txhua tug ntseeg kws yog lwm Tsaav Tuabneeg kws nyob huv lub nroog Aati-aukias huv tebchaws Xilias hab huv tebchaws Kilikias.

²⁴Peb nov has tas, peb cov muaj qee leej tuaj ua rua mej ntxhuv sab. Tej kws puab qha mej ntawd, yeej tsi yog peb kuas puab tuaj qha.

²⁵Yog le ntawd peb txhaj saablaaj pum zoo has tas, ca peb xaiv peb cov ib ob tug nrug Npananpas hab Paulus kws yog peb ob tug kwvtij kws peb hlub tuaj saib mej.

²⁶Paulus obtug yog ob tug kws muab sab rau ua peb tug Tswv Yexus Khetos teg num, obtug tsi khauvxwm obtug txujsa.

²⁷Peb khaiv Yudas hab Xilas tuaj cuag mej, obtug yuav qha mej lawv nraim le tej kws peb sau tuaj rua mej nuav.

²⁸Vaaj Ntsujplig tug Dlawbhuv hab peb pum zoo has tas, peb tsi xob muab lub nraa nyaav rua mej ris, tsuas yog kuas mej coj tej yaam kws tseemceeb xwb.

²⁹Tej ntawd yog le nuav: Mej tsi xob noj tej qhov txhua chaw kws luas muab fij rua dlaab lawm, tsi xob noj ntshaav, tsi xob noj tej nqaj tsaj kws hlua zawm cejdlaab tuag hab tsi xob ntxag luas quaspuj luas quasyawg. Yog mej coj tau tej nuav, ces yog mej ua tau zoo lawm. Thov kuas mej tau nyob kaaj sab lug.”

³⁰Cov ntseeg txawm khaiv ob tug kws puab xaiv tau lawd nrug Paulus obtug moog. Thaus puab moog txug peg lub nroog Aati-aukias, puab hu cov ntseeg suavdlawg tuaj ua ke, hab muab tsaab ntawv ntawd rua cov ntseeg nyeem.

³¹Thaus cov ntseeg nyeem taag, puab suavdlawg zoo sab kawg le, rua qhov tsaab ntawv ntawd txhawb puab tug zug heev.

³²Yudas hab Xilas yog ob tug xwbfwb kws cev Vaajtswv lug. Obtug qha ntau zaaj rua cov ntseeg noog, tej kws obtug qha ntawd txhawb cov ntseeg tug zug heev.

³³Obtug nrug cov ntseeg nyob tau ib ntus, tom qaab ntawd cov ntseeg xaa obtug rov qaab kaaj sab lug moog cuag cov kws khaiv obtug tuaj.

³⁴Tabsis Xilas has tas, nwg yuav nrug puab nyob ntawd.

³⁵Paulus hab Npananpas tseem nyob huv lub nroog Aati-aukias tau ib ntus. Obtug hab muaj ntau leej sis paab qha Vaajtswv txujlug.

³⁶Tsi ntev tom qaab ntawd Paulus txawm has rua Npananpas has tas, “Wb moog saib cov ntseeg huv txhua lub nroog kws wb tau moog qha Vaajtswv txujlug rua puab lawm, saib suavdlawg nyob le caag.”

³⁷Npananpas xaav coj Yauhaas Malakaus nrug obtug moog,

³⁸tabsis Paulus tsi pum zoo coj, rua qhov thawj zag thaus puab moog txug tim Paafilias, Malakaus ca le tso obtug tseg tsiv lawm, nwg tsi paab obtug ua num kuas tav.

³⁹Paulus hab Npananpas obtug sis caav heev, ces obtug nyag txawm ncaim moog nyag lawm. Npananpas coj Malakaus nrug nwg moog, obtug caij nkoj hlaa havtxwv moog rua tim lub koog povtxwv Xaipas.

⁴⁰Paulus coj Xilas nrug nwg moog. Thaus cov ntseeg thov Vaajtswv foom koob moov rua obtug taag, Paulus txawm sawv kev moog.

⁴¹Paulus moog qha thoob plawg huv tebchaws Xilias hab tebchaws Kilikias. Tej kws nwg qha ntawd txhawb cov ntseeg tug zug heev.