Read Hmong Njua Teg Num 22 Bible Online

Teg Num 22 - Hmong Njua bible

Teg Num 22

¹“Mej cov kws ua nam ua txiv hab ua kwv ua tij suavdlawg, mej ca le noog kuv yuav has dlaws kuv zaaj!”

²Thaus suavdlawg nov Paulus ua lug Henplais has, puab txawm nyob tuabywv noog. Paulus has tas:

³“Kuv yog tuabneeg Yudais, kuv yug huv lub nroog Talaxus kws nyob tim tebchaws Kilikias, tabsis kuv lug luj hlub nyob huv lub nroog Yeluxalees nuav. Nkamaliyees yog tug xwbfwb qha ntawv rua kuv ntaag. Kuv tau kawm peb cov yawmkoob txuj kevcai huv tuabsi lawm. Hab kuv muab sab rau ua Vaajtswv teg num ib yaam le naj nub nua mej pum kuv ua.

⁴Yaav taag lug kuv yog ib tug kws tau tsimtxom cov ntseeg. Muaj qee leej kuv muab tsimtxom tuag lawm. Kuv nteg cov ntseeg, tsi has quaspuj lossis txivneej coj moog kaw rua huv tsev lojcuj.

⁵Tug Povthawj Hlub hab cov Yudais tej numtswv puavleej paub has tas, kuv has tseeb xwb. Puab ua ntawv rua kuv nqaa moog rua cov kwvtij Yudais kws nyob peg lub nroog Damaxes, thaus ntawd kuv moog nteg cov ntseeg kws nyob peg khi hab caab lug rau txim rua nraag lub nroog Yeluxalees nuav.

⁶“Thaus yuav laug taav su kws kuv taabtom taug kev moog yuav txug peg lub nroog Damaxes, txawm muaj dluab tshaav ntuj ci nplaag sau ntuj tuaj rua kuv.

⁷Kuv txawm qaug ntawg rua huv aav, kuv nov ib lub suab has rua kuv tas, ‘Xaulus, Xaulus! Ua le caag koj tsimtxom kuv?’

⁸Kuv nug nwg has tas, ‘Tug Tswv, koj yog leejtwg?’ Nwg teb kuv has tas, ‘Kuv yog Yexus tug kws yog tuabneeg Naxales kws koj tsimtxom ntaag.’

⁹Cov txivneej kws nrug kuv moog puavleej pum tug dluab tshaav ntuj kws ci tuaj rua kuv, tabsis puab tsi nov lub suab kws has rua kuv.

¹⁰Kuv nug has tas, ‘Tug Tswv, yog le ntawd kuv yuav ua le caag?’ Tug Tswv txawm has rua kuv has tas, ‘Koj ca le sawv moog rua huv lub nroog Damaxes. Thaus koj moog txug tod, yuav muaj tuabneeg qha rua koj paub txhua yaam kws Vaajtswv yuav kuas koj ua.’

¹¹Tug dluab tshaav ntuj kws ci ci ntawd ua rua kuv ob lub qhovmuag tsi pum kev lawm. Ces cov txivneej kws nrug kuv moog ntawd txhaj le tuav kuv teg moog rua huv lub nroog Damaxes.

¹²“Nyob huv lub nroog Damaxes muaj ib tug txivneej hu ua Ananias kws coj Vaajtswv txuj kevcai nruj, cov tuabneeg Yudais kws nyob huv lub nroog Damaxes puavleej fwm nwg.

¹³Nwg tuaj saib kuv, nwg lug sawv ntawm kuv ib saab hab nwg has rua kuv tas, ‘Nyuas kwv Xaulus, koj ca le rov pum kev!’ Taamsim ntawd kuv ob lub qhovmuag txawm rov pum kev, hab kuv tsaa qhovmuag saib nwg.

¹⁴Nwg has rua kuv tas, ‘Peb cov yawmkoob tug Vaajtswv tub xaiv koj lug ua teg num kws Vaajtswv xaav kuas koj ua, hab kuas koj pum Vaajtswv tug Tubkhai kws ncaaj nceeg, hab nov lub suab kws nwg has rua koj.

¹⁵Rua qhov koj yuav ua timkhawv qha nwg zaaj kws koj pum hab koj nov lawm rua suavdlawg paub.

¹⁶Nwgnuav koj tseem yuav tog ua dlaabtsi? Koj ca le sawv tseeg ua kevcai raus dlej, hab tuav tug Tswv lub npe thov, nwg txhaj yuav zaam koj tej kev txhum.’

¹⁷“Thaus kuv rov lug txug huv lub nroog Yeluxalees nuav, kuv taabtom thov Vaajtswv huv lub Tuamtsev,

¹⁸kuv ua ywgtoog pum tug Tswv lug has rua kuv has tas, ‘Nwgnuav koj ca le tawm huv lub nroog Yeluxalees nuav moog, rua qhov cov tuabneeg kws nyob huv lub nroog nuav, puab yuav tsi noog tej lug kws koj ua timkhawv txug kuv zaaj.’

¹⁹Thaus kuv nov tug Tswv has le ntawd, kuv has rua nwg has tas, ‘Tug Tswv, suavdlawg puavleej paub has tas, kuv yog tug kws pheej moog nteg cov ntseeg koj txhua qhov huv tej tsev saablaaj. Kuv muab puab ntaus hab muab puab caab moog kaw rua huv tsev lojcuj.

²⁰Thaus cov tuabneeg kws ntxub Xatefanaus, muab Xatefanaus tug kws ua timkhawv txug koj zaaj tua povtseg, kuv nyob ntawd hab; kuv nrug puab pum zoo muab nwg tua povtseg. Hab cov tuabneeg kws tua Xatefanaus, puab hle puab tej tsho ca rua kuv zuv.’

²¹Tug Tswv has rua kuv tas, ‘Koj ca le moog, kuv yuav khaiv koj moog dleb heev, moog qha lwm Tsaav Tuabneeg.’ ”

²²Cov tuabneeg ntawd noog Paulus qha lug txug thaus Paulus has tas, Vaajtswv yuav khaiv nwg moog qha lwm tsaav Tuabneeg, puab txawm qw nrov nrov has tas, “Tug tuabneeg zoo le nuav, tsi tsimnyog ca nwg ua neej nyob, ca le muab nwg tua! Ca le muab nwg tua povtseg!”

²³Cov tuabneeg ntawd chim heev, puab txhaj qw nrov nrov hab hle puab tej tsho pov zum zawg rua nuav rua u, hab tsuab moov aav w rua sau nruab ntug.

²⁴Thaus tug thawj tubrog pawg txheeb pum le ntawd, nwg txawm kuas nwg cov tubrog coj Paulus moog huv lub yeej hab kuas puab muab Paulus nplawm, hab nug Paulus saib yog vim le caag cov Yudais pheej yuav qw tawmtsaam Paulus heev ua luaj le?

²⁵Tabsis thaus cov tubrog taabtom muab hlua khi Paulus yuav muab Paulus nplawm, Paulus has rua tug thawj tubrog pawg pua kws sawv ze ntawm Paulus has tas, “Thaus mej tseem tsi tau taug ib tug tuabneeg Loos zaaj, mej ca le muab nwg nplawm, puas lawv le txuj kevcai hab?”

²⁶Thaus tug thawj tubrog pawg pua nov Paulus has le ntawd, nwg moog qha rua tug thawj tubrog pawg txheeb has tas, “Ua le caag koj kuas peb muab tug txivneej ntawd nplawm? Nwg tub yog tuabneeg Loos hab los sav.”

²⁷Tug thawj tubrog pawg txheeb lug nug Paulus has tas, “Koj ca le qha kuv saib, koj yog tuabneeg Loos hab los?” Paulus teb has tas, “Kuv yeej yog tag.”

²⁸Tug thawj tubrog pawg txheeb txawm has tas, “Kuv yog tuabneeg Loos hab, tabsis kuv them nyaj ntau heev, kuv txhaj tau lug ua tuabneeg Loos.” Paulus teb has tas, “Koj them nyaj ntau, koj txhaj tau lug ua, tabsis thaus kuv yug lug, kuv yeej yog tuabneeg Loos lawm.”

²⁹Thaus cov tuabneeg kws yuav taug Paulus zaaj nov le ntawd, puab txawm txaav ntawm Paulus moog dleb zuj zug lawm. Thaus tug thawj tubrog pawg txheeb nov Paulus has tas, Paulus yog tuabneeg Loos, tug thawj tubrog ntawd ntshai heev, rua qhov nwg muab Paulus khi lawm.

³⁰Tug thawj tubrog pawg txheeb xaav paub tseeb has tas, tej lug kws cov Yudais nkaug Paulus ntawd yog le caag tag. Nub tom qaab tug thawj tubrog txawm kuas cov tubrog muab txuj saw hlau kws khi Paulus dlaws, nwg kuas cov thawj ntawm cov povthawj hab cov numtswv suavdlawg tuaj ua ke. Thaus suavdlawg tuaj txhij lawm, nwg txawm coj Paulus lug sawv taabmeeg suavdlawg.