Read Hmong Njua Loos 11 Bible Online

Loos 11 - Hmong Njua bible

Loos 11

¹Kuv nug has tas, Vaajtswv tub tso nwg tsaav tuabneeg tseg lawm los? Yeej tsi tau muab tso tseg le! Kuv paub le nuav, rua qhov kuv yog ib tug Yixalayees, kuv yog Anplahaas xeebntxwv hab kuv yog xeem Npeenyamees.

²Vaajtswv tsi tau muab tsaav tuabneeg kws thaus u nwg xaiv tseg lawm tso povtseg ib zag le. Mej tub paub Vaajtswv txujlug zaaj kws has txug Eliyas thov Vaajtswv rau txim rua cov Yixalayees, Eliyas has tas,

³“Tug Tswv, puab muab koj cov cevlug tua povtseg, hab muab koj tej thaaj fij tsoo tawg taag huv tuabsi lawm; tsuas tshuav kuv tuab leeg xwb, tabsis puab tseem naj nub nrhav kuv tua povtseg hab.”

⁴Tabsis Vaajtswv teb Eliyas le caag? Vaajtswv has tas, “Kuv tub xaiv tau xyaa txheeb leej ca ua kuv tug lawm, puab yeej tsi tau txhus caug pe Npa-aas le.”

⁵Ib yaam nkaus le ntawd, nwgnuav Vaajtswv tub xaiv tau ib nyuas paab tseg lawm, Vaajtswv hlub puab kawg le.

⁶Vaajtswv xaiv tuabneeg tsi yog lawv le puab teg num, tabsis Vaajtswv hlub puab xwb. Yog Vaajtswv xaiv tuabneeg lawv le puab teg num, ces Vaajtswv txujkev hlub tsi yog txujkev hlub tag.

⁷Yog le caag cov Yixalayees tsi tau tej kws puab nrhav? Tsuas yog tej paab nyuas tuabneeg tsawg tsawg kws Vaajtswv xaiv lawm txhaj tau xwb; dlua le lwm paab ces ua ntsej laag muag dlig tsi nov Vaajtswv hu le,

⁸lawv le Vaajtswv txujlug has tas, “Vaajtswv ua rua puab lub sab hab puab lub tswvyim ruag lawm; puab muaj qhovmuag, tabsis puab tsi pum kev, puab muaj qhovntsej, tabsis puab tsi nov lug; puab ua le ntawd lug txug naj nub nua le.”

⁹Hab Daviv has tas: “Thov kuas puab tej rooj noj rooj haus ua ntaa npuj hab ua hlua maag puab, hab thov koj rau txim rua puab, kuas puab raug kev puamtsuaj;

¹⁰Thov kuas puab tej qhov muag dlig, kuas puab tsi xob pum kev, hab thov kuas puab tsaa tsi taug taubhau moog ibtxhis le.”

¹¹Yog le ntawd, kuv nug has tas, thaus cov Yudais dlawm qaug, puab tub raug kev puamtsuaj lawm los? Tsi yog le ntawd! Tabsis qhov kws puab dlawm qaug, ua rua lwm Tsaav Tuabneeg tau txujkev cawm dlim, cov Yudais txhaj khib heev.

¹²Cov Yudais ua txhum, tuabneeg nplajteb txhaj tau koob moov, hab vim cov Yudais tsi ntseeg, lwm Tsaav Tuabneeg txhaj tau koob moov nplua mag; yog cov Yudais ntseeg taagnrho, mas hajyam yuav tau koob moov ntau!

¹³Nwgnuav kuv has rua mej cov kws yog lwm Tsaav Tuabneeg. Kuv yeej yog ib tug timthawj rua lwm Tsaav Tuabneeg, kuv yuav muab teg num kws kuv ua saib tseemceeb.

¹⁴Tej zag yuav ua rua kuv tsaav tuabneeg khib, tabsis yuav cawm tau puab qee leej dlim.

¹⁵Thaus Vaajtswv tso cov Yudais tseg lawm, Vaajtswv coj lwm Tsaav Tuabneeg kws ua yeebncuab rua Vaajtswv lug nrug Vaajtswv sis raug zoo. Thaus Vaajtswv rov coj cov Yudais lug cuag Vaajtswv, puab yuav zoo ib yaam le cov tuabneeg tuag kws sawv huv qhov tuag rov lug.

¹⁶Yog muab lub ncuav ndlais ib qho fij rua Vaajtswv lawm, ces lub ncuav ntawd yog Vaajtswv le; hab yog muab cov caag ntoo fij rua Vaajtswv, ces cov ceg puavleej yog Vaajtswv le ib yaam nkaus.

¹⁷Vaajtswv muab cov ceg txiv ntoo roj nyeg txav, hab muab cov ceg txiv ntoo roj qus lug txuas rua ntawm tsob txiv ntoo roj nyeg qhov chaw. Mej cov kws yog lwm Tsaav Tuabneeg, mej yog cov ceg txiv ntoo roj qus, nwgnuav mej tau cov dlej kws tsob txiv ntoo roj nyeg kws yog cov Yudais nqug tuaj yug mej.

¹⁸Mej tsi xob saib tsi taug cov ceg kws Vaajtswv muab txav lawm. Mej tsi xob khaavtheeb, rua qhov mej yog ceg xwb, tsi yog cov ceg nqug dlej yug cov caag, tabsis cov caag nqug dlej yug cov ceg.

¹⁹Mej yuav has tas, “Qhov kws Vaajtswv muab cov ceg ntawd txav, tub yog Vaajtswv yuav muab peb lug txuas rua.”

²⁰Yeej yog le ntawd tag. Tub yog vim puab tsi ntseeg, Vaajtswv txhaj muab puab txav povtseg, hab muab mej lug txuas rua puab qhov chaw. Tabsis mej yuavtsum ceevfaaj; mej tsi xob khaav has tas mej tau lug nyob puab qhov chaw.

²¹Yog Vaajtswv tub muab cov Yudais kws zoo le tej ceg txiv ntoo roj nyeg txav povtseg; mej xaav has tas nwg yuav tseg mej hab nua los?

²²Yog le ntawd, mej ua tuab zoo xaav txug Vaajtswv txujkev hlub hab txujkev rau txim; Vaajtswv rau txim rua cov tuabneeg kws ua txhum, yog mej ua zoo moog le; Vaajtswv yuav hlub mej; yog mej tsi ua zoo Vaajtswv yuav muab mej txav tawm.

²³Yog cov Yudais tso qhov kws puab tsi ntseeg tseg hab tig rov lug cuag Vaajtswv, Vaajtswv yuav muab puab txuas rov rua ntawm puab qhov chaw; rua qhov Vaajtswv muaj fwjchim ua tau le ntawd.

²⁴Mej cov kws yog lwm Tsaav Tuabneeg, mej zoo le cov ceg txiv ntoo roj qus kws Vaajtswv muab lug txuas rua tsob txiv ntoo roj nyeg lawm. Cov Yudais zoo ib yaam le tsob txiv ntoo roj nyeg; yog Vaajtswv muab cov ceg kws nwg muab txav lawm, coj rov lug txuas rua ntawm tug ntoo yuav yoojyim dlua.

²⁵Yog le ntawd cov kwvtij, mej tsi xob khaav has tas mej yog cov kws txawj ntse, kuv xaav kuas mej totaub txug yaam kws tuabneeg tsi paub: Cov Yixalayees tsuas tawv ncauj ib ntus xwb, puab tsuas tawv moog txug thaus kws Vaajtswv coj lwm Tsaav Tuabneeg lug txhij lawm.

²⁶Thaus ntawd, cov Yixalayees txhua tug yuav dlim; lawv le Vaajtswv txujlug has tas: “Tug Cawmseej yuav lug sau lub roob Xi-oos lug; nwg yuav muab Yakhauj cov xeebntxwv tej kev txhum tshem huv tuabsi moog.

²⁷Kuv yuav zaam txim rua puab lawv le tej lug kws kuv tub cog tseg rua puab lawm.”

²⁸Vim cov Yudais tsi kaam leeg yuav Txujmoo Zoo, Vaajtswv txhaj ua yeebncuab rua puab. Qhov ntawd, ua rua mej cov kws yog lwm Tsaav Tuabneeg txhaj tau lug cuag Vaajtswv; tabsis Vaajtswv suav has tas puab yog Vaajtswv cov phoojywg vim puab cov yawmkoob.

²⁹Rua qhov Vaajtswv yeej tsi hloov sab rua tug kws Vaajtswv tub xaiv hab foom koob moov rua lawm.

³⁰Mej cov kws yog lwm Tsaav Tuabneeg, thaus u mej yeej tsi noog Vaajtswv lug ib yaam le puab hab, tabsis nwgnuav Vaajtswv hlub mej vim cov Yudais tsi noog Vaajtswv lug.

³¹Qhov kws naj nub nua cov Yudais tsi noog Vaajtswv lug, puab ua le ntawd kuas puab tau txais Vaajtswv txujkev hlub ib yaam le mej hab.

³²Vaajtswv ca kuas txhua tug tsi noog Vaajtswv lug, Vaajtswv txhaj zoo hlub puab.

³³Vaajtswv yog tug kws muaj ib puas tsaav yaam nplua mag! Vaajtswv muaj tswvyim hab kev txawj ntse! Leejtwg txhaj yuav paub Vaajtswv lub sab? Leejtwg txhaj yuav totaub tej kws Vaajtswv ua?

³⁴Lawv le Vaajtswv txujlug has tas: “Leejtwg txhaj yuav paub tug Tswv lub sab? Leejtwg txhaj yuav ua tau tug Tswv tug tuavxaam?

³⁵Leejtwg tau muab ib yaam dlaabtsi rua Vaajtswv, hab Vaajtswv pauj rov qaab rua nwg?”

³⁶Vaajtswv yog tug kws tsim ib puas tsaav yaam, Vaajtswv lub fwjchim tuav ib puas tsaav yaam hab ib puas tsaav yaam ntawd yog Vaajtswv le. Thov kuas Vaajtswv tau koob meej moog ibtxhis le! Amees.