Read Hmong Njua Loos 3 Bible Online

Loos 3 - Hmong Njua bible

Loos 3

¹Puas yog cov Yudais tsimtxaj dlua lwm Tsaav Tuabneeg? Lossis qhov kws ua kevcai txav muaj nqes dlaabtsi?

²Yeej muaj nqes rua txhua yaam. Thawj qhov, yog Vaajtswv muab nwg txujlug rua cov Yudais tuav.

³Tabsis yog cov Yudais qee leej tsi ua lawv le Vaajtswv txujlug, puas ua rua Vaajtswv txujlug tsi muaj nqes lawm?

⁴Tsi yog le ntawd! Txawm yog txhua tug dlaag los Vaajtswv tsi dlaag, lawv le tub muaj lug sau tseg lawm has tas: “Thaus koj has lug suavdlawg yeej paub has tas koj has tseeb; thaus luas taug koj zaaj, suavdlawg yeej paub has tas koj tsi tau ua txhum.”

⁵Peb tsua yuav has le caag, yog peb tej kev txhum ua rua peb pum has tas, Vaajtswv yog tug ncaaj nceeg. Peb yuav has tas Vaajtswv txav txim tsi ncaaj rua peb nua los? (Kuv has lawv le tuabneeg has.)

⁶Tsi yog le ntawd! Yog has tas Vaajtswv ua tsi ncaaj, nwg yuav ua le caag muaj cuabkaav txav txim rua tuabneeg nplajteb?

⁷Yog has tas, kuv ua tsi ncaaj rua suavdlawg pum Vaajtswv tug kws ncaaj nceeg tug tshwjchim tseeb, ua le caag kuv tseem raug txim ib yaam le tug tuabneeg txhum hab?

⁸Ua le caag peb tsi has tas, “Peb moog ua txhum kuas peb tau qhov zoo”? Muaj qee leej thuam peb has tas, peb has le ntawd! qhov kws puab raug txim le ntawd yeej tsimnyog lawm.

⁹Peb cov kws yog tuabneeg Yudais, peb zoo dlua lwm Tsaav Tuabneeg los? Tsi yog le ntawd! Kuv tub qha rua mej lawm has tas txujkev txhum yeej kaav taagnrho cov tuabneeg Yudais hab lwm Tsaav Tuabneeg huv tuabsi.

¹⁰Lawv le Vaajtswv Txujlug has tas: “Yeej tsi muaj ib tug tuabneeg ncaaj nceeg hlo le,

¹¹tsi muaj ib tug totaub lossis nrhav Vaajtswv le.

¹²Txhua tug puavleej tso Vaajtswv tseg; puab txhua tug ua txhum huv tuabsi; tsi muaj leejtwg ua zoo le, txawm yog ib tug los tub tsi muaj.

¹³Puab lub qaa zoo ib yaam le lub qhov ntxaa kws qheb lug ca; puab tug nplaig has tej lug dlaag ntxag; puab tej lug muaj taug ib yaam le taug naab.

¹⁴Puab lub qhovncauj foom phem hab has tej lug ab lug dlaw xwb.

¹⁵Puab dlha ceev nrooj moog ua phem hab tua tuabneeg;

¹⁶txhua qhov kws puab moog, puab ua rua luas raug kev txomnyem hab puamtsuaj.

¹⁷Puab tsi paub nrug leejtwg sis raug zoo,

¹⁸lossis puab tsi paub ntshai Vaajtswv le.”

¹⁹Nwgnuav peb paub has tas txhua nqai kws Vaajtswv txuj Kevcai qha, yeej qha kuas tuabneeg fwm txuj Kevcai, kuas txhua tug tsi muaj lug has, hab Vaajtswv yuav txav txim rua txhua tug tuabneeg huv nplajteb nuav.

²⁰Rua qhov txhua tug kws ua lawv le txuj Kevcai yeej tsi muaj ib tug ncaaj nceeg taabmeeg Vaajtswv le; txuj kevcai ntawd tsuas qha kuas tuabneeg paub tuabneeg txujkev txhum xwb.

²¹Tabsis qhov kws nwgnuav Vaajtswv suav has tas tuabneeg ncaaj nceeg taabmeeg Vaajtswv tsi yog vim tuabneeg coj lawv le txuj kevcai. Qhov tseeb, Mauxes txuj Kevcai hab cov cev Vaajtswv lug los puavleej ua timkhawv has txug zaaj nuav.

²²Vaajtswv suav has tas txhua tug kws lug ntseeg Yexus Khetos txhaj yog tuabneeg ncaaj nceeg xwb, rua qhov Vaajtswv suav has tas txhua tug kws ntseeg Yexus Khetos zoo ib yaam nkaus:

²³Rua qhov txhua tug puavleej ua txhum hab tu ncua Vaajtswv tug tshwjchim lawm.

²⁴Vaajtswv txujkev hlub kws nwg muab pub dlawb rua tuabneeg, yog nwg khaiv Yexus Khetos lug tuag txhwv tuabneeg kuas dlim txim, Vaajtswv txhaj suav has tas tuabneeg ncaaj nceeg taabmeeg Vaajtswv.

²⁵Vaajtswv khaiv Yexus Khetos lug tuag theej tuabneeg lub txhoj, hab nwg cov ntshaav ntxuav tuabneeg tej kev txhum, Vaajtswv txhaj zaam tau tuabneeg lub txim, vim tuabneeg ntseeg Yexus Khetos. Vaajtswv ua le ntawd, qha has tas Vaajtswv yog tug ncaaj nceeg. Yaav taag lug Vaajtswv ua sab ntev hab tsi rau txim rua cov tuabneeg kws ua txhum.

²⁶Qhov kws Vaajtswv ua le nuav, qha has tas Vaajtswv yog tug ncaaj nceeg, Vaajtswv tsi suav tuabneeg lub txim, hab Vaajtswv paab kuas txhua tug kws ntseeg Yexus Khetos ua tau tuabneeg ncaaj nceeg.

²⁷Yog le ntawd, peb yuav ua le caag khaav tau? Yeej tsi muaj ib yaam dlaabtsi kws peb khaav tau le. Tsi has txuj kevcai twg lossis teg num twg le, tabsis yog qhov kws ntseeg Yexus Khetos xwb.

²⁸Yog le ntawd peb paub has tas, tug kws Vaajtswv suav has tas ncaaj nceeg yog tug kws ntseeg, tsi yog tug kws coj lawv le txuj kevcai qha.

²⁹Vaajtswv tsuas yog cov Yudais tug Vaajtswv xwb los? Nwg tsi yog lwm Tsaav Tuabneeg tug Vaajtswv los? Vaajtswv yeej yog lwm Tsaav Tuabneeg tug Vaajtswv hab.

³⁰Tsuas muaj tuab tug Vaajtswv xwb, Vaajtswv suav has tas txhua tug kws ntseeg Yexus Khetos, tsi has cov Yudais lossis lwm Tsaav Tuabneeg, yog cov kws ncaaj nceeg.

³¹Yog Vaajtswv ua le ntawd, peb yuav suav has tas Vaajtswv txuj kevcai tsi tseemceeb los? Tsi yog le ntawd! Peb cov kws ntseeg Yexus Khetos, peb hajyam suav has tas Vaajtswv txuj kevcai yog txuj kws tseemceeb.