Read Hmong Njua Loos 4 Bible Online

Loos 4 - Hmong Njua bible

Loos 4

¹Yog le ntawd, peb yuav has le caag txug peb yawmkoob Anplahaas? Nwg ua nwg lub neej le caag?

²Yog Vaajtswv suav has tas Anplahaas ncaaj nceeg, vim tej num kws Anplahaas ua, ces Anplahaas yeej muaj lug khaav tau, tabsis Anplahaas yeej tsi muaj dlaabtsi yuav khaav tau rua Vaajtswv le.

³Vaajtswv txujlug has tas, “Anplahaas ntseeg Vaajtswv, vim qhov kws Anplahaas ntseeg ntawd, Vaajtswv txhaj suav has tas Anplahaas yog tuabneeg ncaaj nceeg.”

⁴Tug kws ua num nwg yeej tau nqe zug, tej nqe zug kws nwg tau, tsi yog tau dlawb, tabsis yog nwg khwv nwg txhaj tau.

⁵Tug kws tsi ca sab rua nwg teg num, tabsis ca sab rua nwg txujkev ntseeg, hab ntseeg Vaajtswv tug kws paab cov tuabneeg txhum kuas ua tau tuabneeg ncaaj nceeg, qhov kws nwg ntseeg le ntawd, Vaajtswv suav has tas nwg yog tug ncaaj nceeg.

⁶Daviv kuj has ib yaam le ntawd, thaus nwg has txug tug kws muaj kev kaaj sab, yog tug kws Vaajtswv suav has tas ncaaj nceeg, tsi yog tug kws ca sab rua nwg teg num:

⁷“Cov tuabneeg txhum kws Vaajtswv zaam txim rua lawm, yog cov kws tau zoo nyob kaaj sab lug.

⁸Tug kws Vaajtswv tsi suav nwg lub txim, tug ntawd tau zoo nyob kaaj sab lug.”

⁹Txujkev kaaj sab kws Daviv has nuav tsuas yog rua cov tuabneeg kws ua kevcai txav xwb, lossis rua cov tuabneeg kws tsi ua kevcai txav hab? Peb has tas, “Anplahaas ntseeg, Vaajtswv txhaj suav has tas Anplahaas yog tug kws ncaaj nceeg.”

¹⁰Thaus twg Vaajtswv suav has tas Anplahaas yog tug kws ncaaj nceeg? Ua ntej lossis tom qaab kws Anplahaas ua kevcai txav? Tsi yog tom qaab, tabsis yog ua ntej kws Anplahaas ua kevcai txav.

¹¹Qhov kws Anplahaas ua kevcai txav ntawd yog lub cim qha rua suavdlawg paub has tas Anplahaas ntseeg Vaajtswv, Vaajtswv txhaj suav has tas Anplahaas yeej ncaaj nceeg ua ntej kws nwg ua kevcai txav. Yog le ntawd, Anplahaas txhaj yog yawmkoob ntawm txhua tug kws ntseeg Vaajtswv, txawm yog puab tsi tau ua kevcai txav los Vaajtswv suav has tas puab yog tuabneeg ncaaj nceeg.

¹²Qhov kws Anplahaas yog cov tuabneeg kws ua kevcai txav tug yawmkoob, tsi yog vim puab ua kevcai txav, tabsis vim puab ntseeg ib yaam le peb yawmkoob Anplahaas ntseeg, Anplahaas xub ntseeg Vaajtswv, nwg maam le ua kevcai txav.

¹³Vaajtswv coglug rua Anplahaas hab Anplahaas cov xeebntxwv has tas, Vaajtswv yuav muab lub nplajteb nuav ua Anplahaas tug, Vaajtswv coglug le ntawd, tsi yog vim Anplahaas coj lawv le txuj kevcai, tabsis yog Anplahaas ntseeg, Vaajtswv txhaj suav has tas Anplahaas yog tug ncaaj nceeg.

¹⁴Yog Vaajtswv muab tej kws Vaajtswv coglug rua cov tuabneeg kws coj lawv le Txuj Kevcai, ces qhov kws tuabneeg ntseeg tsi muaj qaabhau hab Vaajtswv cov lug cog tseg yeej tsi muaj ib lus tseeb le.

¹⁵Vim muaj txuj kevcai Vaajtswv txhaj rau txim rua tuabneeg; yog tsi muaj txuj kevcai, yeej tsi muaj tuabneeg ua txhum kevcai.

¹⁶Vaajtswv coglug rua Anplahaas vim nwg ntseeg Vaajtswv, Vaajtswv yuav muab Vaajtswv txuj koob moov kws Vaajtswv coglug lawm pub dlawb rua Anplahaas cov xeebntxwv, tsi yog Vaajtswv pub rua cov kws coj lawv le txuj kevcai xwb, tabsis yog pub rua cov kws ntseeg ib yaam le Anplahaas ntseeg, rua qhov Anplahaas yog peb suavdlawg tug yawmkoob;

¹⁷lawv le Vaajtswv txujlug has tas, “Kuv tsaa koj ua txhua Tsaav Tuabneeg tug yawmkoob.” Vaajtswv tej lug cog tseg ntawd tseemceeb heev, tug Vaajtswv nuav yog tug kws Anplahaas ntseeg, nwg yog tug Vaajtswv kws tsaa tau cov tuabneeg kws tuag lawm sawv huv qhov tuag rov qaab lug hab yog tug kws has kuas muaj txhua yaam, ces txawm muaj lawv le nwg has.

¹⁸Txawm yog thaus Anplahaas tsi tau pum muaj lawv le tej kws Vaajtswv coglug tseg los Anplahaas tseem ntseeg hab ca sab has tas, “Nwg yuav tau ua ntau Tsaav Tuabneeg tug yawmkoob,” lawv le Vaajtswv txujlug has tas, “Koj yuav muaj xeebntxwv coob npaum le tej nubqub sau nruab ntug.”

¹⁹Anplahaas noobnyoog tub yuav muaj ib puas xyoo; nwg tug zug ntaug taag, hab Xalas los xeeb tsi taug tub lawm; txawm le ntawd los nwg tseem ca sab rua Vaajtswv.

²⁰Anplahaas ntseeg Vaajtswv tej lug cog tseg; qhov kws Anplahaas ntseeg hajyam ua rua Aplahaas ca sab rua Vaajtswv, hab nwg ua Vaajtswv tsaug.

²¹Anplahaas paub tseeb has tas Vaajtswv yeej ua tau lawv le Vaajtswv coglug tseg.

²²Tub yog vim Anplahaas ntseeg, “Vaajtswv txhaj suav has tas Anplahaas yog tug ncaaj nceeg.”

²³Lu lug kws has tas “Anplahaas ncaaj nceeg,” tsi yog has rua Anplahaas tuab leeg xwb,

²⁴tabsis yog has txug peb txhua tug kws Vaajtswv suav has tas ncaaj nceeg, hab ntseeg Vaajtswv tug kws tsaa peb tug Tswv Yexus sawv huv qhov tuag rov qaab lug.

²⁵Vim peb tej kev txhum Vaajtswv txhaj ca Yexus Khetos lug tuag theej peb lub txhoj, hab qhov kws Vaajtswv tsaa Yexus sawv huv qhov tuag rov qaab lug, yog ua kuas peb ua tau tuabneeg ncaaj nceeg.