Read Hmong Njua 1 Kauleethaus 10 Bible Online

1 Kauleethaus 10 - Hmong Njua bible

1 Kauleethaus 10

¹Cov kwvtij, kuv xaav kuas mej ncu ntsoov has tas, thaus peb cov yawmkoob nrug Mauxes moog tom taj suabpuam, muaj ib tauv fuab roog puab, hab puab puavleej hlaa dlhau Havtxwv Lab moog huv tuabsi.

²Qhov kws puab nyob huv tauv fuab hab moog huv havtxwv, qha has tas puab yog Mauxes cov thwjtim.

³Puab txhua tug puavleej tau noj cov mov kws Vaajtswv pub sau ntuj lug,

⁴hab puab puavleej tau haus cov dlej kws Vaajtswv kuas txhawv huv lub pobzeb lug. Yexus Khetos yog lub pobzeb kws naj nub nrug puab ua ke.

⁵Txawm yog le ntawd los muaj ntau leej ua tsi hum Vaajtswv sab, Vaajtswv txhaj ua rua puab tuag pawg lug tom taj suabpuam.

⁶Tej ntawd qha rua peb kuas peb tsi xob muaj lub sab ntshaw yaam kws phem ib yaam le puab cov ntawd ntshaw,

⁷puab cov ntawd muaj qee leej pe mlom, peb tsi xob ua le puab. Lawv le Vaajtswv txujlug has tas, “Suavdlawg nyob tsawg noj nyob tsawg haus taag, suavdlawg sawv dlha seev cev.”

⁸Puab cov ntawd muaj qee leej ua txhum kev nkauj kev nraug, tuab nub xwb puab tuag neeg nkaum peb txheeb leej, peb tsi xob ua txhum kev nkauj kev nraug le puab cov ntawd.

⁹Puab cov ntawd muaj qee leej sim tug Tswv sab, naab txhaj tum puab tuag pawg lug, peb tsi xob sim tug Tswv sab le puab cov ntawd.

¹⁰Puab cov ntawd muaj qee leej pheej ywg ywg, tug Timtswv kws kaav tubtuag teb txhaj ua rua puab puamtsuaj taag lawm, peb tsi xob ywg le puab cov ntawd.

¹¹Tej xwm kws puab raug ntawd tub yog luas qha suavdlawg, hab luas muab sau ca ntuag peb kuas peb ceevfaaj, rua qhov peb yog cov kws nyob tam kws yuav kawg.

¹²Yog leejtwg xaav has tas nwg tub sawv khov kho lawm, nwg yuavtsum ceevfaaj nyob tsaam nwg qaug.

¹³Tej kev sim sab kws mej raug, yeej yog tej kev sim sab kws suavdlawg ibtxwm raug. Vaajtswv yog tug ncaaj nceeg, nwg yeej tsi ca mej raug kev sim sab dlhau qhov kws mej yuav nyaj tsi taug, tabsis thaus mej raug kev sim sab, Vaajtswv yuav paab kuas mej ua taug sab ntev.

¹⁴Yog le ntawd cov phoojywg kws kuv hlub, mej tsi xob moog nrug luas pe dlaab pe mlom.

¹⁵Kuv has rua mej ib yaam le has rua cov tuabneeg kws paub qaabhau; mej ca le khaws kuv tej lug coj moog ua tuab zoo xaav.

¹⁶Peb ua Vaajtswv tsaug, rua qhov peb muaj lub khob koob moov nuav. Thaus peb haus cov cawv txiv maab huv lub khob nuav, tub yog peb qha has tas peb koom Yexus Khetos cov ntshaav. Thaus peb muab lub ncuav lug ndlais noj tub yog peb qha has tas, peb koom Yexus Khetos lub cev.

¹⁷Tsuas muaj tuab lub ncuav xwb, txawm yog peb muaj coob leej los peb suavdlawg koom ib lub cev, rua qhov peb noj tuab lub ncuav xwb.

¹⁸Yog mej ua tuab zoo saib cov Yixalayees; tug kws noj tej khoom fij sau lub thaaj, tug ntawd yeej muaj feem koom nrug Vaajtswv.

¹⁹Kuv has le ntawd, puas yog kuv has tas tej zaub mov kws muab fij rua mlom, hab tej mlom ntawd muaj nqes heev?

²⁰Tsi yog le ntawd, kuv has tas tej kws cov tuabneeg tsi paub Vaajtswv nqaa tuaj fij rua sau tej thaaj, yog puab fij rua dlaab xwb tsi yog fij rua Vaajtswv. Kuv yeej tsi xaav kuas mej koom nrug dlaab le.

²¹Mej haus tug Tswv lub khob hab haus dlaab lub khob yeej tsi tau. Yog mej yuav noj tug Tswv rooj mov hab noj dlaab rooj mov yeej tsi tau ib yaam nkaus.

²²Puas yog peb xaav ua kuas tug Tswv khib? Peb xaav has tas, peb muaj fwjchim luj dlua nwgnuav los?

²³Puab has tas, “Peb yeej muaj cai ua tau txhua yaam.” Yeej muaj tseeb le ntawd tag, tabsis tsi yog txhua yaam ntawd yuav zoo rua puab huv tuabsi. “Peb yeej muaj cai ua tau txhua yaam.” Tabsis tsi yog txhua yaam ntawd yuav paab tau puab huv tuabsi.

²⁴Yug tsi xob xaam pum yug zoo xwb, tabsis yug yuavtsum xaam pum lwm tug zoo hab.

²⁵Txhua yaam nqaj kws luas muag huv tej kab tej khw mej noj tau huv tuabsi tsi xob nug, yog mej xaav has tas noj tau.

²⁶Rua qhov Vaajtswv txujlug has tas, “Lub nplajteb hab ib puas tsaav yaam kws nyob huv lub nplajteb puavleej yog tug Tswv le.”

²⁷Yog tug tuabneeg kws tsi ntseeg hu mej moog noj mov, yog mej txaus sab moog hab tsi xaav le caag, mej ca le noj tej zaub mov kws luas tub npaaj tog mej lawm tsi xob nug le.

²⁸Tabsis yog muaj tuabneeg qha rua mej has tas, “Tej zaub mov ntawd, tub muab fij rua dlaab rua mlom lawm,” ces mej tsi xob noj, nyob tsaam tug kws qha rua mej ntawd xaav yuam kev, rua qhov mej muaj lub sab kws paub qhov phem qhov zoo,

²⁹kuv has le ntawd tsi yog kuv ntshai nyob tsaam mej xaav yuam kev, tabsis kuv ntshai nyob tsaam mej ua rua tug kws qha mej ntawd xaav yuam kev. Tej zag yuav muaj tuabneeg has rua kuv tas, “Txawm yog lwm tug yuav xaav le caag los ca kuv noj kuv.

³⁰Yog kuv tub ua Vaajtswv tsaug taag lawm kuv maam noj, leejtwg tseem yuav muaj cuabkaav txwv tsi pub kuv noj tej kws kuv ua Vaajtswv tsaug ntawd hab?”

³¹Yog le ntawd, mej yuav noj yuav haus lossis yuav ua ib yaam dlaabtsi, mej yuavtsum ua kuas Vaajtswv tau ntsejmuag.

³²Mej tsi xob ua ib yaam dlaabtsi kws yuav ua rua cov tuabneeg Yudais lossis lwm Tsaav Tuabneeg lossis cov ntseeg Vaajtswv tu sab. Mej ca le ua mej lub neej ib yaam le kuv ua kuv lub.

³³Ua ib yaam le kws kuv ua kuas hum suavdlawg sab, kuv tsi xaav ua kuas zoo rua kuv xwb, tabsis kuv xaav ua kuas zoo rua suavdlawg huv tuabsi, ua le ntawd puab txhaj yuav dlim puab lub txim.