Read Hmong Njua 1 Kauleethaus 14 Bible Online

1 Kauleethaus 14 - Hmong Njua bible

1 Kauleethaus 14

¹Mej yuavtsum sis hlub hab kub sab lug thov Vaaj Ntsujplig pub tswvyim rua mej, qhov tseemceeb yog thov lub tswvyim kws txawj qha Vaajtswv txujlug.

²Tug kws txawj has lug txawv txawv tsi yog has rua tuabneeg, tabsis yog has rua Vaajtswv, rua qhov tsi muaj leejtwg totaub tej lug kws nwg has. Tej lug kws nwg has ntawd, yog Vaaj Ntsujplig kuas nwg has.

³Tabsis tug kws qha Vaajtswv txujlug yog qha rua tuabneeg kuas paab tau suavdlawg, txhawb tau suavdlawg tug zug, hab nplig tau suavdlawg lub sab.

⁴Tug kws has tau lug txawv txawv tsuas paab tau nwg xwb, tabsis tug kws qha Vaajtswv txujlug, tug ntawd paab tau txhua tug ntseeg huv tuabsi.

⁵Kuv xaav kuas mej txhua tug has tau lug txawv txawv; tabsis kuv xaav kuas mej txawj qha Vaajtswv txujlug heev dlua. Rua qhov tug kws txawj qha Vaajtswv txujlug yog tug kws muaj nqes heev dlua tug kws has tau lug txawv txawv, yog nwg txhais tau tej lug txawv txawv ntawd txhaj yuav paab tau cov ntseeg xwb.

⁶Cov kwvtij, yog thaus kuv tuaj saib mej, kuv ca le has lug txawv txawv rua mej, puas muaj qaabhau rua mej? Yeej tsi muaj hlo le, yog kuv qha Vaajtswv tej lug qha tshwm lossis tej kev txawj ntse lossis tej lug kws Vaajtswv qha rua kuv lossis tej lug qhuab qha txhaj yuav muaj nqes rua mej.

⁷Tug tuabneeg kws tshuab raaj hab qoj nkauj nogncaas, yog nwg tsi txawj pus ntiv raaj hab pus ntiv nkauj nogncaas, yeej tsi muaj leejtwg paub has tas nwg tshuab hab qoj has le caag.

⁸Hab yog tug tuabneeg kws tshuab xyu nwg tshuab tsi meej, leejtwg txhaj yuav paub npaaj sis ntaus sis tua?

⁹Ib yaam nkaus le ntawd, yog mej has lug txawv txawv, cov noog yuav ua le caag totaub? Mej tej lug yuav tsi muaj qaabhau dlaabtsi.

¹⁰Txhua yaam lug kws tuabneeg nplajteb has, puavleej muaj lub ntsab, tsi muaj ib yaam kws tsi muaj lub ntsab lug le.

¹¹Tabsis yog kuv tsi paub tug tuabneeg kws nrug kuv thaam ntawd cov lug, ces kuv hab nwg nyag yog nyag ib tsaav tuabneeg.

¹²Mej txhua tug yeej kub sab lug xaav tau lub tswvyim kws Vaaj Ntsujplig pub, yog le ntawd, mej yuavtsum xub thov tej kws yuav paab tau cov ntseeg kuas vaammeej tsaiv.

¹³Tug tuabneeg kws has tau lug txawv txawv, nwg yuavtsum thov Vaajtswv pub tswvyim kuas nwg txawj txhais tau tej lug kws nwg has ntawd.

¹⁴Rua qhov tej lug txawv txawv kws kuv thov Vaajtswv yeej yog kuv tug ntsujplig thov, tabsis kuv tsi totaub tej lug ntawd.

¹⁵Yog le ntawd, thaus kuv yuav thov Vaajtswv yuavtsum yog kuv lub sab totaub tej lug kws kuv has; thaus kuv hu nkauj yuavtsum yog kuv lub sab totaub tej lug ntawd ib yaam nkaus.

¹⁶Thaus mej ua Vaajtswv tsaug yog mej has lug txawv txawv, cov tuabneeg kws tsi paub tej lug txawv txawv ntawd, puab yuav ua le caag paub nrug mej has “Amees”? Rua qhov puab tsi paub sov yog mej has dlaabtsi.

¹⁷Txawm yog mej txawj ua Vaajtswv tsaug npaum le caag los mej tej lug yeej paab tsi tau cov tuabneeg kws tsi totaub ntawd le.

¹⁸Kuv ua Vaajtswv tsaug kws kuv txawj has lug txawv txawv ntau dlua mej huv tuabsi.

¹⁹Tabsis thaus kuv qha cov ntseeg, yog kuv has tsib lu lug kws suavdlawg totaub, zoo dlua le kws kuv has kaum txheeb lu lug txawv txawv kws tsi muaj tuabneeg paub.

²⁰Cov kwvtij, mej tsi xob xaav le tej mivnyuas yau xaav, tabsis mej yuavtsum xaav le tej tuabneeg laug xaav; hab ua ib yaam le tej mivnyuas yau kws tsi paub ua phem ua.

²¹Vaajtswv txujlug sau tseg le nuav: “Tug Tswv has tas kuv yuav khaiv lwm Tsaav Tuabneeg tuaj qha cov tuabneeg nuav. Txawm le ntawd los kuv tsaav tuabneeg yuav tsi noog kuv tej lug.”

²²Tej lug txawv txawv kws tuabneeg has yog ua rua cov tsi ntseeg pum Vaajtswv lub fwjchim, tsi yog ua rua cov ntseeg pum. Tabsis qhov kws cev Vaajtswv txujlug yog ua rua cov ntseeg pum Vaajtswv lub fwjchim, tsi yog ua rua cov tsi ntseeg pum.

²³Yog le ntawd, thaus cov ntseeg tuaj ua ke noog lug qhuab qha, yog txhua tug pib has lug txawv txawv, cov ntseeg kws tsi totaub tej lug ntawd, hab cov tuabneeg kws tsi ntseeg, puab pum mej ua le ntawd, puab yuav ca le has tas mej vwm lawm.

²⁴Tabsis yog txhua tug qha Vaajtswv txujlug, thaus muaj cov tsi ntseeg lossis cov tuabneeg saab nrau qee leej tuaj noog, tej lug kws nwg nov ntawd yuav ua rua nwg paub nwg tej kev txhum, hab ua rua nwg paub has tas nwg yuav raug txim,

²⁵hab Vaajtswv yuav muab tej kws nwg xaav huv nruab sab nthuav rua suavdlawg paub, hab nwg yuav txhus caug ndlua pehawm Vaajtswv hab leeg has tas, “Vaajtswv nrug mej nyob ntawm nuav tag lauj!”

²⁶Cov kwvtij, mej puas paub tej kws kuv has ntawd yog dlaabtsi? Thaus mej tuaj ua ke pehawm Vaajtswv, ib tug coj hu nkauj, ib tug qhuab qha, ib tug qha tej kws Vaajtswv kuas nwg qha, ib tug has lug txawv txawv, hab ib tug txhais tej lug txawv txawv ntawd. Mej yuavtsum ua txhua yaam nuav, txhaj paab tau pawg ntseeg kuas vaammeej.

²⁷Yog leejtwg yuav has lug txawv txawv, tsuas pub ob leeg lossis peb leeg has xwb, ca ib leeg has taag ib leeg maam le has, hab yuavtsum muaj ib tug txhais tej lug kws puab has ntawd.

²⁸Tabsis yog tsi muaj leejtwg txawj txhais, tug kws has lug txawv txawv ntawd, ca nwg has tuabywv huv nruab sab hab has rua Vaajtswv xwb.

²⁹Ca ob leeg lossis peb leeg cev Vaajtswv lug, dlua le lwm tug ca puab noog hab xaav saib tej lug ntawd qha le caag.

³⁰Tabsis yog Vaajtswv kuas cov tuabneeg kws tuaj nyob ua ke ntawd, ib tug qha, ces tug kws taabtom qha ca le tsum.

³¹Mej cov kws qha Vaajtswv txujlug, mej ib leeg qha taag tsaiv ib leeg maam le qha, cov kws noog txhaj yuav kawm tau hab tej kws mej qha ntawd txhaj yuav txhawb tau suavdlawg tug zug.

³²Tug kws txawj qha Vaajtswv txujlug, nwg paub pib hab paub xaus,

³³Rua qhov Vaajtswv tsi xaav kuas peb ua dlog ua dlig, tabsis nwg xaav kuas peb ua muaj hauvpaug hauvntsis txhaj muaj kev kaaj sab. Thaus cov ntseeg tuaj ua kev noog lug qhuab qha,

³⁴cov quaspuj yuavtsum nyob tuabywv tsi xob has lug. Lawv le cov Yudais Txuj Kevcai has tas, cov quaspuj tsi muaj cai ua thawjcoj.

³⁵Yog cov quaspuj xaav paub dlaabtsi, kuas nyag nug nyag tug quasyawg tom tsev. qhov kws tug quaspuj has lug thaus suavdlawg taabtom noog lug qhuab qha, yog ib qhov kws txaajmuag heev.

³⁶Mej xaav has tas, Vaajtswv xub muab Vaajtswv txujlug rua mej ua ntej nua los? Lossis mej xaav has tas, mej tuab cov txhaj le paub Vaajtswv txujlug xwb.

³⁷Yog leejtwg xaav has tas nwg yog tug kws qha Vaajtswv txujlug, lossis xaav has tas Vaaj Ntsujplig tub pub fwjchim rua nwg lawm, tug ntawd yeej paub has tas, tej kws kuv sau tuaj rua mej nuav yog tug Tswv tej lug.

³⁸Tabsis tug kws tsi quavntsej tej nuav, mej tsi xob quavntsej tug ntawd hlo le.

³⁹Yog le ntawd cov kwvtij, mej ca le muab sab rau qha Vaajtswv txujlug, tabsis mej tsi xob txwv tug kws has tau lug txawv txawv.

⁴⁰Txhua yaam kws mej ua, mej yuavtsum ua kuas zoo hab tsi xob laam ua dlog ua dlig.