Read Hmong Njua 1 Kauleethaus 2 Bible Online

1 Kauleethaus 2 - Hmong Njua bible

1 Kauleethaus 2

¹Cov kwvtij, thaus kuv tuaj saib mej, kuv tsi tau tuaj qha Vaajtswv txujlug tseeb kws tsi muaj tuabneeg paub rua mej kuas zoo noog lossis qha lawv le kuv lub tswvyim xwb.

²Rua qhov kuv npaaj sab has tas thaus kuv tuaj txug tim mej, kuv yuav tsi qha lwm zaaj rua mej le, kuv tsuas qha kuas mej paub Yexus Khetos hab qhov kws Yexus tuag sau tug ntoo khaublig rua mej xwb.

³Yog le ntawd, thaus kuv tuaj nrug mej nyob, kuv qaug zug hab ntshai ua ib ce tshee nyo,

⁴tej lug kws kuv has hab tej lug kws kuv qha tsi yog tuabneeg lub tswvyim, tabsis yog tej lug kws qha kuas suavdlawg pum Vaajtswv tug Ntsujplig lub fwjchim,

⁵yog le ntawd, qhov kws mej ntseeg Vaajtswv tsi yog mej ca sab rua tuabneeg lub tswvyim, tabsis yog mej ca sab rua Vaajtswv lub fwjchim.

⁶Kuv yeej has tej lug txawj ntse rua cov tuabneeg kws paub taab lawm xwb, tabsis tsi yog cov tuabneeg tam nuav lossis yog cov numtswv tam nuav tej tswvyim kws taabtom yuav pluj moog.

⁷Tabsis kuv qha Vaajtswv lub tswvyim kws nyob nraim nkoog tsi muaj leejtwg paub, lub tswvyim ntawd Vaajtswv tub npaaj tseg rua peb thaus kws tsi tau tsim lub nplajteb nuav lug lawm.

⁸Cov numtswv kws kaav lub nplajteb nuav, yeej tsi muaj ib tug paub lub tswvyim ntawd; yog puab paub lawm, puab yuav tsi muab tug Tswv kws muaj tshwjchim ci ntsaa ab ntsa rua sau tug ntoo khaublig le.

⁹Tabsis muaj lug sau tseg rua huv Vaajtswv txujlug has tas: “Tej kws qhovmuag tsi tau pum, lossis qhovntsej tsi tau nov, hab tej kws tuabneeg lub sab xaav tsi txug has tas yuav muaj lug, Vaajtswv npaaj tej ntawd tseg rua cov tuabneeg kws hlub Vaajtswv lawm.”

¹⁰Tabsis Vaajtswv khaiv Vaaj Ntsujplig lug qha zaaj nuav rua peb paub; rua qhov Vaaj Ntsujplig yeej paub txhua yaam kws Vaajtswv xaav huv tuabsi.

¹¹Tuabneeg ib leeg yeej tsi paub ib leeg lub sab, tsuas yog nyag txhaj paub nyag lub sab xwb; ib yaam nkaus le ntawd, tsuas yog Vaajtswv tug Ntsujplig txhaj paub Vaajtswv lub sab xwb.

¹²Peb tsi ca sab rua tuabneeg lub tswvyim; tabsis peb ca sab rua Vaaj Ntsujplig tug kws Vaajtswv khaiv lug, kuas peb txhaj paub txhua yaam kws Vaajtswv pub rua peb.

¹³Yog le ntawd, thaus peb qha Vaajtswv zaaj rua cov tuabneeg kws muaj Vaajtswv tug Ntsujplig lawm, peb has tej lug kws Vaajtswv tug Ntsujplig qha rua peb xwb, peb tsi has tej lug kws cov tuabneeg txawj ntse qha rua peb.

¹⁴Tug kws tsi muaj Vaaj Ntsujplig, tug ntawd yeej tsi tau txais tej kws Vaajtswv tug Ntsujplig pub, rua qhov puab pum has tas tej ntawd tsi muaj qaabhau dlaabtsi, hab puab tsi totaub txug tej ntawd, rua qhov puab tsi muaj Vaaj Ntsujplig, puab txhaj tsi totaub tej ntawd.

¹⁵Tug kws muaj Vaaj Ntsujplig, tug ntawd txhaj paub has tas yaam twg muaj nqes hab yaam twg tsi muaj nqes, tabsis tsi muaj leejtwg paub tug ntawd lub sab.

¹⁶Lawv le Vaajtswv txujlug has tas: “Leejtwg txhaj paub tug Tswv lub sab? Leejtwg txhaj qha tau nws?” Tabsis peb tub muaj lub sab ib yaam le Yexus Khetos lub lawm hab.