Read Hmong Njua 1 Kauleethaus 8 Bible Online

1 Kauleethaus 8 - Hmong Njua bible

1 Kauleethaus 8

¹Nwgnuav kuv yuav has txug tej zaub mov kws luas muab fij rua dlaab rua mlom: peb yeej paub tej lug kws has tas, “Peb txhua tug puavleej muaj kev txawj ntse,” txawm le ntawd los tej kev txawj ntse yeej ua rua tuabneeg muaj kev khaavtheeb xwb; tabsis kev hlub txhaj ua rua tuabneeg muaj kev vaammeej.

²Tug kws xaav has tas nwg tub paub ntau yaam lawm, tug ntawd yeej tsi tau paub yaam kws tseemceeb le.

³Tabsis Vaajtswv yeej paub txhua tug kws hlub Vaajtswv.

⁴Kuv has txug qhov kws noj tej zaub mov kws luas muab fij rua dlaab rua mlom lawm: peb yeej paub has tas, “Tuabneeg nplajteb tej mlom tsi muaj ib tug muaj sa le,” hab peb paub has tas, “tsuas muaj tuab tug Vaajtswv xwb, yeej tsi muaj dlua lwm tug le lawm.”

⁵Txawm yog tuabneeg hu ntau tug ua “vaajtswv” tsi has nyob sau ntuj lossis nyob huv nplajteb nuav, yeej muaj ntau tug “vaajtswv” hab ntau tug “tswv”,

⁶tabsis peb tsuas muaj tuab tug Vaajtswv xwb, nwg yog Leej Txiv tug kws Tsim ib puas tsaav yaam hab yog tug kws tuav peb txujsa; tsuas yog muaj tuab tug Tswv xwb, nwg yog Yexus Khetos, nwg tsim ib puas tsaav yaam hab nwg tuav peb txujsa.

⁷Tabsis cov kws ntseeg muaj ibtxha tseem tsi tau paub tej nuav, puab yog cov kws ibtxwm teev mlom lug lawm. Yog le ntawd thaus puab noj zaub noj mov, puab tseem pheej xaav has tas, tej ntawd yog tej kws luas muab fij rua dlaab rua mlom lawm. Puab paub tej ntawd tsi tshua tseeb, puab txhaj xaav has tas yog puab noj ntshai nyob tsaam txhum.

⁸Tej zaub mov ntawd yeej paab tsi tau kuas peb nrug Vaajtswv sis raug zoo; txawm yog peb tsi tau noj los peb yeej tsi ntxaug, hab yog peb noj los peb yeej tsi rog.

⁹Tabsis mej yuavtsum ceevfaaj, tsi xob ca mej cov kws muaj cuabkaav noj tau tej zaub mov ntawd ua rua cov tuabneeg kws tsi tshua paub Vaajtswv yuam kev ua txhum.

¹⁰Nyob tsaam muaj ib tug kws tsi tshua paub Vaajtswv, tuaj pum mej cov kws yog cov paub, taabtom noj mov huv tsev teev dlaab teev mlom, nwg yuav ca le moog noj tej zaub mov kws muab fij rua tej dlaab tej mlom ntawd hab.

¹¹Tub yog vim mej yog cov paub, mej txhaj ua rua mej cov kwvtij kws tsi tshua paub Vaajtswv kws Yexus Khetos tub tuag theej puab lub txhoj lawm raug kev puamtsuaj.

¹²Qhov kws mej ua le ntawd, tub yog mej ua txhum Yexus Khetos ntaag, rua qhov mej ua rua tug ntseeg kws tsi tshua paub Vaajtswv xaav yuam kev.

¹³Yog tej zaub mov kws kuv noj ua rua puab ua txhum, kuv yuav tsi noj nqaj ntxiv lawm, kuv txhaj tsi ua rua leejtwg yuam kev ua txhum.