Read Hmong Njua 2 Kauleethaus 10 Bible Online

2 Kauleethaus 10 - Hmong Njua bible

2 Kauleethaus 10

¹Kuv yog Paulus. Mej ua tuab zoo noog kuv tej lug. Muaj tuabneeg has tas, thaus kuv nrug mej nyob kuv ntshai mej, tabsis thaus kuv tsi nrug mej nyob lawm kuv ua tawv kawg le tuaj rua mej. Yexus Khetos pub kuv muaj lub sab mog sab muas hab lub sab hlub ib yaam le nwg, kuv txhaj thov ntuag mej has tas,

²thaus kuv tuaj saib mej, mej tsi xob ua rua kuv tau ua tawv rua mej, rua qhov kuv yeej muaj cuabkaav ua tawv rua cov tuabneeg kws thuam peb has tas, peb xaav kuas peb tau ntsej tau muag ib yaam le tuabneeg ibtxwm xaav.

³Peb yeej nyob huv nplajteb nuav tag, tabsis peb tsi tawmtsaam le tuabneeg ibtxwm tawmtsaam.

⁴Thaus peb tawmtsaam yeebncuab, peb tsi siv tej cuabyeej kws tuabneeg ibtxwm siv. Tabsis peb siv tej cuabyeej kws Vaajtswv tug kws muaj fwjchim muab rua peb, peb txhaj rhuav tau yeebncuab lub yeej kuas puamtsuaj;

⁵peb tshev tej tuabneeg kws qha tsi tseeb kuas puab tsi muaj lug has. Peb rhuav tej kws tuabneeg muab lug thaiv tsi pub suavdlawg paub Vaajtswv. Hab peb coj cov tuabneeg kws ua yeebncuab rua Vaajtswv lug noog Yexus Khetos lug.

⁶Thaus peb pum has tas mej noog lug lawm tag, peb maam le rau txim rua tej kws tsi noog lug.

⁷Mej ua tuab zoo saib tej kws mej pum. Mej cov ntseeg puas muaj ib tug khaav has tas, nwg yog Yexus Khetos tug tubkhai. Yog muaj, tug ntawd yuavtsum ua tuab zoo saib saib nwg yog tuabneeg zoo le caag, rua qhov peb yog Yexus Khetos cov tubkhai ib yaam nkaus le tug ntawd hab.

⁸Txawm yog kuv khaav has tas peb tug Tswv Yexus Khetos, nwg pub fwjchim rua peb los kuv yeej tsi txaajmuag hlo le. Nwg ua le ntawd kuas peb paab tau mej lub neej vaammeej, tsi yog yuav rhuav mej lub neej.

⁹Kuv has le nuav tsi yog kuv has kuas mej xaav has tas, kuv pheej sau ntawv tuaj hem mej.

¹⁰Tej zag yuav muaj tuabneeg has tas, “Paulus tej ntawv Paulus has tawv kawg le, tabsis thaus nwg tuaj nwg ua tug nyuas tuag e, nwg has lug tub tsi muaj kuab hlo le.”

¹¹Tug kws laam has le ntawd, nwg yuavtsum ncu ntsoov has tas, tej lug kws peb sau rua huv ntawv xaa tuaj rua mej, hab tej lug kws peb has thaus peb nrug mej nyob, tej ntawd yeej tsi txawv qhov twg le. Txawm yog peb nyob dleb nyob ze los peb yeej has ib yaam nkaus.

¹²Peb yeej tsi kaam muab peb pev rua cov tuabneeg kws puab khaav has tas puab zoo dlua lwm tug. Cov tuabneeg kws khaav le ntawd, puab ruag kawg le. Puab ib tug ntsuag ib tug hab muab ib tug pev rua ib tug.

¹³Peb cov, peb tsi khaav tshaaj tej kws peb muaj. Peb tsuas khaav txij tej kws Vaajtswv muab rua peb ua xwb, tej ntawd yog tej kws peb ua paab mej.

¹⁴Thaus peb tuaj saib mej hab qha Txujmoo Zoo kws has txug Yexus Khetos zaaj rua mej, peb tsi tau ua dlhau tej kws Vaajtswv kuas peb ua.

¹⁵Peb tsi tau muab teg num kws lwm tug ua coj lug khaav, peb tsuas khaav txij tej kws Vaajtswv muab rua peb ua xwb. Peb ca sab has tas, mej yuav muab sab rau ntseeg zuj zug ntxiv hab ca sab has tas, peb yuav ua tej num kws hajyam tseemceeb dlua tej nuav paab mej. Txawm yog le ntawd los peb tsuas ua txij le tej kws Vaajtswv tu ca rua peb ua xwb.

¹⁶Tom qaab ntawd peb yuav tau moog qha Txujmoo Zoo rua lwm qhov. Peb yeej yuav tsi khaav tej num kws lwm tug tub xub moog ua ca lawm ib zag le.

¹⁷Tabsis Vaajtswv txujlug has tas, “Tug kws xaav khaav, nwg tsuas muaj cuabkaav khaav tej kws Vaajtswv tub ua lug lawm xwb.”

¹⁸Rua qhov tug kws nwg laam khaav nwg xwb yeej tsi muaj leejtwg fwm nwg, tabsis tug kws Vaajtswv qhuas, suavdlawg puavleej yuav fwm tug ntawd.