Read Hmong Njua 2 Kauleethaus 11 Bible Online

2 Kauleethaus 11 - Hmong Njua bible

2 Kauleethaus 11

¹Txawm yog kuv has lug zoo le tug ruag has los thov mej ua sab ntev noog kuv tej lug.

²Kuv khib mej ib yaam le Vaajtswv khib, rua qhov mej zoo ib yaam le tug hluas nkauj kws tsi tau thaam dlua hluas nraug. Kuv tub qhab mej ca rua ib tug txivneej lawm, tug ntawd yog Yexus Khetos.

³Kuv ntshai nyob tsaam mej faav sab hab tsi muab sab npuab Yexus Khetos tag tag, ib yaam le thaus naab ntxag tau Evas faav sab.

⁴Rua qhov mej zoo sab noog cov tuabneeg kws qha Yexus Khetos zaaj txawv le peb qha. Mej tub tau Vaajtswv tug Ntsujplig hab Txujmoo Zoo kws peb qha lawm, tabsis mej tseem tsua moog nrhav lwm tug Ntsujplig hab lwm Txujmoo Zoo.

⁵Kuv yeej tsi tau xaav has tas, kuv muaj fwjchim yau dlua mej cov timthawj kws mej has tas, muaj fwjchim.

⁶Txawm yog kuv tsi tshua txawj has le tej tuabneeg txawj ntse has los kuv yeej paub tej kws kuv qha lub ntsab. Qhov tseemceeb txhua yaam num kws peb ua lug lawm, puavleej ua rua mej paub tseeb tej lug kws kuv has nuav huv tuabsi.

⁷Thaus kuv tuaj qha Txujmoo Zoo kws has txug Vaajtswv zaaj rua mej, kuv yeej tsi thov ib qho nqe zug le. Kuv txu fwjchim kuas mej tau ntsejmuag. Kuv ua le ntawd yog kuv ua txhum lawm los?

⁸Thaus kuv tuaj nrug mej nyob qha mej, yeej yog cov ntseeg kws nyob lwm qhov xaa nyaj tuaj yug kuv. Puab xaa nyaj tuaj rua kuv le ntawd, kuj ib yaam le kuv nyag puab cov nyaj tuaj ua num paab mej.

⁹Thaus kuv nrug mej nyob kuv tsi muaj nyaj siv, kuv yeej tsi thov mej paab kuv, rua qhov cov kwvtij kws tuaj peg Makedaunias tuaj, puab nqaa tej kws kuv tsi muaj tuaj rua kuv. Yaav taag lug lawm kuv tsi tau ua rua mej ntxhuv sab. Txawm yog yaav tom ntej nuav los kuv yeej yuav tsi ua rua mej ntxhuv sab hab.

¹⁰Kuv yeej paub Yexus Khetos tej lug kws yog qhov tseeb. Yog le ntawd, kuv paub has tas, tej kws kuv khaav nuav yuav nrov nchaa moog thoob plawg huv lub xeev Akhayas tsi muaj leejtwg yuav txwv tau le.

¹¹Vim le caag kuv txhaj has le nuav? Kuv tsi hlub mej los? Vaajtswv yeej paub has tas, kuv hlub mej.

¹²Tej kws nwgnuav kuv ua, kuv yeej yuav ua moog le kuas cov tuabneeg kws mej hu ua “timthawj,” puab txhaj tsi muaj lug khaav has tas, puab ua puab teg num ib yaam le peb ua.

¹³Puab cov ntawd yeej tsi yog timthawj tag, puab yog timthawj cuav. Puab ua puab teg num ntxag suavdlawg. Hab puab ua txuj ua le puab yog Yexus Khetos cov timthawj.

¹⁴Tej kws puab ua ntawd yeej tsi txaus leejtwg yuav poob sab. Txawm yog dlaab Ntxwgnyoog los nwg tub txa tau ua le ib tug timtswv ceebtsheej kws muaj fwjchim ci ntsaa ab.

¹⁵Yog le ntawd, yog dlaab Ntxwgnyoog cov tubkhai yuav txa ua le cov tubkhai kws ncaaj nceeg, yeej tsi nyuaj hlo le. Tabsis thaus kawg puab cov ntawd nyag yeej yuav tau lawv le tej kws nyag tau ua lug lawm.

¹⁶Kuv rov has dlua ib lus rua mej has tas, mej tsi xob xaav has tas, kuv yog tuabneeg ruag. Yog mej xaav le ntawd mej ca le ua sab ntev noog kuv tej lug, ca kuv khaav ob peb lus le tug ruag khaav.

¹⁷Tej lug kws kuv has nuav tsi yog tej kws peb tug Tswv Yexus kuas kuv has. Qhov kws kuv khaav nuav kuv leeg has tas, kuv has le tug ruag has tag.

¹⁸Yeej muaj tuabneeg coob coob, nyag naj nub khaav has tas nyag txawj nyag ntse. Yog le ntawd kuv yuav khaav le puab hab.

¹⁹Mej yeej txawj ntse heev lawm. Mej txhaj ua sab ntev noog cov tuabneeg ruag has.

²⁰Mej ua sab ntev rua cov tuabneeg kws yuam mej ua le nuav le u, cov kws noj mej tug, cov kws cuab muv cuab ntaa tog mej kev, ua saib tsi taug mej lossis ntaus mej ntsejmuag.

²¹Kuv txaajmuag leeg rua mej has tas, peb tsi muaj lub sab tawv ua le ntawd rua mej. Tabsis yog lwm tug tub muaj cuabkaav khaav le nuav le u, kuv yeej muaj cuabkaav khaav hab. Kuv has le nuav kuv has le tug ruag has.

²²Puab yog tuabneeg Henplais los? Kuv yeej yog hab. Puab yog tuabneeg Yixalayees los? Kuv yeej yog hab. Puab yog Anplahaas cov xeebntxwv los? Kuv yeej yog hab.

²³Puab yog Yexus Khetos cov tubkhai los? Kuv yog tug tubkhai kws zoo dlua puab. Kuv has le nuav kuv has le tug tuabneeg vwm has. Kuv ua num khwv dlua puab. Kuv raug kaw huv tsev lojcuj ntau dlua puab. Kuv raug luas nplawm ntau dlua puab. Kuv ntsib kev pluj kev tuag ntau dlua puab.

²⁴Cov Yudais muab kuv nplawm tsib zag, ib zag nplawm peb caug cuaj nplawg;

²⁵Cov tuabneeg Loos muab nplawm nplawm kuv peb zag. Muaj ib zag luas muab pobzeb ntaus kuv. Kuv caij nkoj tog peb zag. Muaj ib zag kuv poob rua huv havtxwv ib nub ib mos.

²⁶Thaus kuv taug kev moog rua nuav rua u, kuv ntsib teebmeem, tsi has dlej nyaab lossis tubsaab ntaus. Kuv tsaav tuabneeg hab lwm Tsaav Tuabneeg puavleej tsimtxom kuv. Kuv raug kev txomnyem tsi has huv tej nroog, huv haav zoov haav tsuag hab huv havtxwv, hab tej kwvtij kwv npawg los ua phem rua kuv.

²⁷Kuv khwv taag nub taag mo tsi tau su tsi tau pw yoo dlaab ndlub nris. Kuv tshaib kuv nqhes tsi muaj txaus noj txaus haus, tsi muaj rig tsho naav. Tsi muaj tsev nyob.

²⁸Tsi yog le ntawd xwb, kuv naj nub naj mo txhawj cov ntseeg kws nyob txhua qhov chaw.

²⁹Yog leejtwg qaug zug kuv yeej nrug tug ntawd qaug zug hab. Yog leejtwg ua txhum kuv nyuaj sab kawg le.

³⁰Yog kuv xaav has tas, kuv yuavtsum khaav xwb ces kuv yeej yuav khaav has txug zaaj kws ua rua suavdlawg pum has tas, kuv yog tug kws tsi muaj fwjchim dlaabtsi le.

³¹Tsimnyog peb ua rua Vaajtswv tug kws yog Yexus Khetos leej Txiv tau ntsejmuag moog ibtxhis le. Nwg yeej paub has tas kuv tsi has dlaag.

³²Thaus kuv nyob huv lub nroog Damaxes, Vaajntxwv Aletas kuas tug tswv xeev khaiv tubrog moog zuv lub roojvaag nroog tog nteg kuv.

³³Tabsis muaj tuabneeg muab ib lub tawb ntim kuv hab muab kuv tso dlauv ntawm qhovrais rua saab nrau, tug tswv xeev txhaj nteg tsi tau kuv.