Read Hmong Njua 2 Kauleethaus 2 Bible Online

2 Kauleethaus 2 - Hmong Njua bible

2 Kauleethaus 2

¹Yog le ntawd kuv txhaj ua ib sab tsi tuaj saib mej lawm, kuas mej txhaj tsi muaj kev nyuaj sab.

²Yog kuv ua rua mej nyuaj sab lawm, leejtwg yuav ua rua kuv rov zoo sab? Tsuas yog mej cov kws kuv ua rua nyuaj sab lawm, txhaj yuav ua rua kuv zoo sab xwb.

³Tub yog vim le nuav kuv txhaj sau thawj tsaab ntawv ntawd tuaj rua mej, kuv tsi tuaj saib mej nyob tsaam cov kws ua rua kuv zoo sab lawm, yuav ua rua kuv nyuaj sab. Kuv ca sab has tas thaus kuv zoo sab mej suavdlawg yeej yuav zoo sab hab.

⁴Thaus kuv sau tsaab ntawv ntawd tuaj rua mej, kuv nyuaj sab, ntxhuv sab hab lug kuv kua muag kawg le; tsi yog kuv txhobtxwm ua kuas mej nyuaj sab, tabsis yog kuv xaav kuas mej paub has tas kuv hlub mej heev.

⁵Yog leejtwg ua rua ib tug twg nyuaj sab, tsi yog nwg ua rua kuv xwb, tabsis yog nwg ua rua mej hab, qhov kws kuv has tas leejtwg, tub yog kuv tsi xaav has nyaav rua tug ntawd.

⁶Kuv xaav has tas mej cov kws rau txim rua tug ntawd, mej tub rau txaus lawm.

⁷Yog le ntawd, mej yuavtsum zaam txim rua tug ntawd hab ua tuab zoo ntuag nwg, nyob tsaam nwg tej kev nyuaj sab ntawd ua rua nwg tso Vaajtswv tseg.

⁸Yog le ntawd, kuv thov mej ua tuab zoo has rua nwg paub has tas mej hlub nwg.

⁹Kuv sau tsaab ntawv ntawd tuaj rua mej, tub yog kuv sim saib mej puas noog kuv lug.

¹⁰Thaus mej zaam txim rua leejtwg, kuv yeej zaam txim rua tug ntawd ib yaam nkaus hab. Yog tsimnyog kuv zaam txim rua leejtwg, kuv yeej zaam tug ntawd lub txim taabmeeg Yexus Khetos, vim kuv saib rua sau mej suavdlawg,

¹¹kuv ua le nuav kuas dlaab Ntxwgnyoog txhaj ntxag tsi tau peb; rua qhov peb tub paub nwg teg num taag lawm.

¹²Thaus kuv moog txug huv lub nroog Rhau-as kuv qha Txujmoo Zoo kws has txug Yexus Khetos, kuv pum tug Tswv tub qheb kev rua kuv ua num nyob huv lub nroog ntawd lawm.

¹³Tabsis kuv ntxhuv sab heev, rua qhov kuv tsi pum peb tug kwv Titus nyob huv. Yog le ntawd kuv txhaj ncaim cov tuabneeg ntawd hab moog rua peg Makedaunias lawm.

¹⁴Peb ca le ua Vaajtswv tsaug, rua qhov Vaajtswv naj nub coj peb txuj hauv kev, rua qhov Yexus Khetos tub ua rua peb muaj yeej lawm. Vaajtswv khaiv peb moog qha Yexus Khetos zaaj rua txhua qhov ib yaam le tej paa tshuaj tsw qaab kws tsw thoob plawg txhua qhov chaw.

¹⁵Rua qhov peb zoo le tej paa tshuaj tsw qaab kws Yexus Khetos muab fij rua Vaajtswv, tej paa ntawd tsw qaab ntxag moog rua cov tuabneeg kws taabtom yuav dlim hab cov tuabneeg kws taabtom yuav raug kev puamtsuaj.

¹⁶Cov tuabneeg kws taabtom yuav raug kev puamtsuaj, puab suav has tas tej paa ntawd yog tej kws ua rua puab raug kev pluj kev tuag; tabsis cov tuabneeg kws taabtom yuav dlim, puab suav has tas tej paa ntawd yog tej kws ua rua puab tau txujsa. Leejtwg txhaj yuav tsimnyog ua teg num nuav?

¹⁷Peb tsi zoo le cov tuabneeg kws muab Vaajtswv txujlug coj moog muag noj muag haus, tabsis yog Vaajtswv khaiv peb, peb txhaj qha ncaaj qha nceeg taabmeeg Vaajtswv, rua qhov peb yog Yexus Khetos cov tubkhai tag.