Read Hmong Njua 2 Kauleethaus 5 Bible Online

2 Kauleethaus 5 - Hmong Njua bible

2 Kauleethaus 5

¹Peb paub has tas peb lub cev zoo le lub tsev pheebsuab kws nyob huv nplajteb nuav hab yog lub kws txawj puamtsuaj, Vaajtswv yuav ua ib lub tsev sau ntuj rua peb moog nyob, lub tsev kws nwg ua ntawd yuav nyob moog ibtxhis le.

²Nwgnuav peb kub sab lug xaav moog nyob lub tsev kws Vaajtswv ua ca rua sau ntuj ceebtsheej lawm;

³thaus peb lub tsev puamtsuaj lawm peb txhaj yuav muaj tsev nyob.

⁴Thaus peb tseem ua neej nyob nuav peb naj nub nyuaj sab kawg le. Tsi yog peb xaav rhuav peb lub cev kws zoo le lub tsev pheebsuab, tabsis peb xaav moog nyob lub tsev kws Vaajtswv ua sau ntuj ceebtsheej rua peb nyob, kuas peb lub cev kws txawj tuag hloov ua lub kws tsi txawj tuag.

⁵Vaajtswv yog tug kws tu peb ca tog nub kws nwg yuav muab lub cev tshab rua peb. hab nwg pub nwg tug Ntsujplig rua peb. Qhov kws nwg ua le ntawd tub yog ib qho tseemceeb kws qha rua peb has tas, peb yeej yuav tau tej kws nwg npaaj tseg rua peb lawm.

⁶Tub yog vim le ntawd peb txhaj muaj nplooj sab tawv qhawv tsi ntshai ib yaam dlaabtsi le. Peb paub has tas, thaus peb tseem nyob huv lub tsev pheebsuab nuav peb nyob dleb peb tug Tswv Yexus lub tsev.

⁷Thaus peb tseem ua neej nyob nuav, txawm yog peb tsi pum nwg los peb ca sab rua nwg.

⁸Peb tsi ntshai kev pluj kev tuag, rua qhov peb yeej xaav moog nrug peb tug Tswv Yexus nyob heev dlua le peb nyob huv lub tsev pheebsuab nuav.

⁹Txawm yog le caag los peb yeej yuav ua lawv le Vaajtswv lub sab nyam, tsi has peb tseem nyob huv nuav lossis moog nyob sau ntuj los peb yeej zoo sab,

¹⁰Rua qhov peb txhua tug yuavtsum moog sawv ntawm Yexus Khetos lub xubndlag. Nwg yuav taug peb zaaj hab muab nqe zug rua txhua tug lawv le tej num kws suavdlawg tau ua lug lawm, thaus suavdlawg tseem ua neej nyob nuav, tsi has ua zoo lossis ua phem.

¹¹Peb puavleej paub ntshai Vaajtswv, yog le ntawd peb txhaj naj nub yum suavdlawg lug noog Vaajtswv lug. Vaajtswv yeej paub peb txhua tug lub sab huv tuabsi. Kuv xaav has tas, nyaj mej yuav paub kuv lawm hab.

¹²Peb has le nuav tsi yog peb tsua yuav rov pav peb lub neej qha mej dlua, tabsis peb xaav ua rua suavdlawg paub has tas, vim le caag mej qhuas peb, mej txhaj yuav muaj lug teb cov tuabneeg kws nyam saib tuabneeg ntsejmuag xwb, tsi saib tuabneeg lub sab.

¹³Yog peb ua le tej tuabneeg vwm, yeej yog peb ua rua Vaajtswv tau ntsejmuag. Yog peb ua le tej tuabneeg kws muaj tswvyim, yeej yog peb ua paab mej.

¹⁴Yexus Khetos tug kws muaj lub sab hlub, nwg kaav taagnrho peb lub neej huv tuabsi, rua qhov peb pum has tas, muaj ib tug tuag theej suavdlawg lub txhoj. Lu lug ntawd qha has tas, suavdlawg puavleej koom nwg txujkev tuag.

¹⁵Nwg tuag theej txhua tug lub txhoj. Nwg ua le ntawd kuas cov tuabneeg kws tseem ua neej nyob puab tsi xob ua puab lub neej lawv le puab lub sab nyam, tabsis kuas puab ua puab lub neej lawv le nwg lub sab nyam. Nwg yog tug kws tuag, hab yog tug kws Vaajtswv tsaa sawv huv qhov tuag rov qaab lug. Nwg ua le ntawd tub yog vim nwg hlub puab.

¹⁶Nwgnuav peb tsi ntsuag leejtwg lub neej lawv le tuabneeg ibtxwm ntsuag. Txawm yog yaav taag lug peb pheej ntsuag Yexus Khetos lub neej lawv le tuabneeg ntsuag los nwgnuav peb tsi ua le ntawd lawm.

¹⁷Tug kws nrug Yexus Khetos koom ib txujsa, tug ntawd yog tuabneeg tshab. Nwg lub neej qub tub dlua lawm nwgnuav nwg muaj lub neej tshab.

¹⁸Ib puas tsaav yaam nuav puavleej yog Vaajtswv ua. Vaajtswv coj peb rov lug nrug Vaajtswv sis raug zoo, rua qhov peb ntseeg Yexus Khetos. Hab Vaajtswv muab teg num kws moog coj tuabneeg lug nrug Vaajtswv sis raug zoo rua peb ua.

¹⁹Zaaj kws peb naj nub qha, zaaj ntawd has tas, Vaajtswv coj txhua tsaav tuabneeg kws ntseeg Yexus Khetos lug nrug Vaajtswv sis raug zoo. Vaajtswv tsi suav has tas puab muaj txim, hab Vaajtswv muab zaaj kws has tas, Vaajtswv coj tuabneeg lug nrug Vaajtswv sis raug zoo rua peb qha.

²⁰Yog le ntawd, peb txhaj ua Yexus Khetos cov tubkhai, pev ib yaam le Vaajtswv qev peb qhovncauj ntuag mej. Yexus Khetos kuas peb ntuag mej has tas, mej yuavtsum ca Vaajtswv coj mej lug nrug Vaajtswv sis raug zoo.

²¹Yexus Khetos yeej ibtxwm tsi muaj txim, tabsis Vaajtswv muab peb lub txim rua nwg ris. Vaajtswv ua le ntawd kuas peb cov kws nrug Yexus Khetos koom ib txujsa ua tau tuabneeg ncaaj nceeg ib yaam le Vaajtswv yog tug kws ncaaj nceeg.